?Hu Bambae i Sevem Ol Man We Oli No Joen Long Ami?—?Baebol i Talem Wanem?

Yunaeted Nesen i talem se:

Stat long 7 Oktoba kasem 23 Oktoba 2023, faet ya long Gasa long Isrel i kilim i ded bitim 6,400 man we oli no joen long ami, mo 15,200 man oli kasem kil. Antap long hemia, plante taosen man oli mas lego ples blong olgeta.
Mo long 24 Septemba 2023, wo we i hapen bitwin Rasia mo Yukren i kilim i ded 9,701 man long Yukren we oli no joen long ami, mo 17,748 oli kasem kil.

?Baebol i givim wanem hop long ol man we oli safa from ol wo ya?

Wan risen we i givim hop

Baebol i talemaot se God bambae i “finisim ol wo long olgeta ples long wol.” (Ol Sam 46:9) Bambae hem i yusum gavman o kingdom blong hem long heven, blong smasem mo finisim olgeta gavman blong man mo i tekem ples blong olgeta. (Daniel 2:44) Yes, Kingdom blong God bambae i mekem ol man oli kam fri long ol trabol ya.

Makem samting we Jisas Kraes we i King long Kingdom blong God bambae i mekem:

“Bambae hem i sevem ol puaman we oli stap krae from help, mo olgeta we oli no gat nem, mo olgeta we i no gat helpa. Bambae hem i gat sore long man we i no gat nem, mo puaman, mo bambae hem i sevem laef blong man we i pua. Bambae hem i tekemaot olgeta long han blong ol man we oli mekem i strong tumas long olgeta, mo long raf fasin.”—Ol Sam 72:12-14.

God bambae i yusum Kingdom blong hem blong finisim fulwan ol rabis fasin mo ol wo we oli stap mekem ol man oli safa mo harem nogud.

“Hem bambae i ravemaot wota blong ae blong olgeta, mo bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:4.

I no longtaem Kingdom blong God bambae i mekem sam bigfala jenis long wol. Baebol i talem se bambae i gat ‘ol faet mo yumi harem nius blong ol faet’ olsem we i stap hapen tede. (Matiu 24:6) Ol faet ya mo ol narafala samting we i stap hapen oli soemaot se yumi stap laef long “ol las dei” blong rul blong ol man.—2 Timoti 3:1.