Ol Eksperiens We Man i Kasem Taem Klosap Hem i Ded—?Oli No Minim Wanem?

Ansa we Baebol i givim

Plante man oli talem se oli rimemba we oli aot i go samples, o oli luk wan laet we i saen o wan ples we i naes tumas taem klosap oli ded. Buk ya Recollections of Death i talem se ‘sam man oli talem se hemia janis blong luk se i gat laef long wan narafala ples.’ Baebol i no stap tokbaot eksperiens blong man we klosap i ded. Be hem i talemaot trutok we i soemaot se hemia i no vison blong wan laef long narafala ples.

Ol dedman oli no moa save wan samting.

Baebol i talem se ol dedman “oli no moa save wan samting.” (Prija 9:5) Taem yumi ded, yumi no go long wan narafala ples o yumi stap tingting long wan samting, be yumi no moa laef i stap. Tijing ya se taem man i ded sol blong hem i aot i go laef samples, i no kamaot long Baebol. (Esikel 18:4) Taswe man i no save talem se taem klosap hem i ded, hem i luk heven, hel, o wan narafala ples blong laef.

?Lasaros i luk wanem taem hem i ded?

Stori blong Lasaros long Baebol i tokbaot eksperiens blong wan man we i ded tru. Hem i ded fo dei finis bifo we Jisas i mekem hem i laef bakegen. (Jon 11:38-44) Sipos i tru we Lasaros i go stap long wan gudfala ples afta we hem i ded, Jisas i spolem hem taem i tekem hem i kambak laef long wol ya. Be i no gat wan tok blong Lasaros nating long Baebol we i soemaot se hem i go laef samples afta long ded. Sipos i gat laef afta long ded i sua se bambae hem i tokbaot. I gud blong makem se, Jisas i tokbaot taem ya we Lasaros i ded olsem se Lasaros i slip ded, we i no save wan samting nating.​—Jon 11:11-14.