?Baebol i Talem Wanem Long Saed Blong Strong Dring? Sipos Yumi Dring, ?Yumi Mekem Sin?
Ansa we Baebol i givim
Man i no mekem sin sipos hem i no dring tumas alkol. Baebol i tokbaot waen olsem wan presen we i kam long God we i mekem man i save haremgud long laef. (Ol Sam 104:14, 15; Prija 3: 13; 9:7) Mo tu, Baebol i tokbaot waen olsem wan gudfala meresin.—1 Timoti 5:23.
Jisas i dring waen taem hem i stap long wol. (Matiu 26:29; Luk 7:34) Long taem blong wan mared, hem i mekem wan long ol bigfala merikel blong hem, taem hem i tanem wota i kam waen mo i givim olsem wan gudfala presen.—Jon 2:1-10.
Denja we i kamaot from fasin blong dring bitim mak
Nating se Baebol i no talem se i tabu blong dring waen, be hem i agensem fasin blong dring bitim mak mo fasin blong drong. Taswe, wan Kristin we i jusum blong dring alkol bae hem i no mas dring bitim mak. (1 Timoti 3:8; Taetas 2:2,3) Baebol i givim plante risen blong no dring tumas.
Man i no moa yusum gud tingting mo i no moa luksave samting. (Ol Proveb 23:29-35) Wan man blong drong i no save folem advaes ya blong Baebol we i se “yufala i givim bodi blong yufala i go long God olsem wan sakrefaes we i laef mo i tabu, mo we God i glad long hem. Hemia wan tabu wok we yufala i mas yusum gud tingting blong yufala blong mekem.”—Rom 12:1.
Man we dring bitim mak i no moa fraet blong mekem samting we i rong mo ‘i mekem hed ... i krangke nomo.’—Hosea 4:11; Efesas 5:18.
Man i kam pua mo i kasem plante problem blong helt.—Ol Proveb 23:21, 31, 32.
Fasin blong dring tumas mo drong i no mekem God i glad.—Ol Proveb 23:20; Galesia 5:19-21.
?Olsem wanem blong luksave se yu dring bitim mak?
Wan man we i dring tumas alkol i putum laef blong hem mo ol narafala long denja. Baebol i talem se wan man we i drong i no moa tingting gud, i no moa wokbaot gud, i laekem rao, mo i no talem ol tok we i kaen. (Job 12:25; Ol Sam 107:27; Ol Proveb 23:29, 30, 33). Mo tu olgeta we oli stap dring smosmol oli save “dring bitim mak” we biaen oli kasem bigfala trabol from.—Luk 21:34, 35.
Blokem fasin blong dring bitim mak
Baebol i tokbaot sam taem we ol kristin oli mas lukaotgud blong no dring alkol nating:
Sipos i save mekem ol narafala oli foldaon long sin.—Rom 14:21.
Sipos fasin blong dring alkol i brekem loa blong kantri.—Rom 13:1.
Sipos wan man i no save kontrolem fasin blong hem blong dring. Olgeta we oli stap safa from we oli alkolik mo from we oli dring tumas alkol, oli mas tekem aksen kwiktaem.—Matiu 5: 29, 30.