?Wan Witnes Blong Jehova i Save Risaen Long Jos Blong Hem?
Yes. Wan Witnes i save risaen long tu defren rod:
Hem i talem. Hem i save talemaot no i save raetem wan leta blong talemaot desisen blong hem se hem i no moa wantem stap olsem wan Witnes blong Jehova.
Hem i soemaot long ol fasin blong hem. Wan man i save mekem wan samting we i mekem se hem i no moa save joen wetem ol Witnes blong Jehova long ful wol. (1 Pita 5:9) Eksampol, maet hem i go joen long wan narafala jos mo hem i talemaot se i wantem folem jos ya.—1 Jon 2:19.
?Sipos wan man i no moa prij mo go long miting, yufala i luk hem se i risaen finis?
Nogat. Man we i no moa wantem joen wetem ol Witnes blong Jehova no i risaen, hem i defren long man we bilif blong hem i slak. Plante taem, olgeta we oli slak no oli no moa wosipim God, oli no lego bilif blong olgeta, be oli harem nogud from we tingting blong olgeta i foldaon. Mifala i no stap longwe long ol man olsem, be mifala i traehad blong givhan long olgeta blong mekem bilif blong olgeta i strong bakegen. (1 Tesalonaeka 5:14; Jud 22) Sipos wan man olsem i nidim help, ol elda long kongregesen oli faswan blong go givhan long hem.—Galesia 6:1; 1 Pita 5:1-3.
Be ol elda oli no gat raet blong fosem wan man blong i gohed blong stap olsem wan Witnes blong Jehova. Evri man wanwan oli mas mekem prapa desisen blong olgeta long saed blong jos we oli wantem folem. (Josua 24:15) Mifala i bilif strong se olgeta we oli wantem wosipim God, oli mas glad blong mekem from we i kamaot long hat blong olgeta.—Ol Sam 110:3; Matiu 22:37.