OL YANGFALA OLI ASKEM
?Olsem Wanem Baebol i Save Givhan Long Mi?—Haf 1: Kasem Ol Gudfala Samting Long Baebol
“!Mi traem blong ridim Baebol, be mi harem se i had from we i bigwan tumas!”—Briana we i gat 15 yia.
?Yu tu yu harem olsem? !Haf ya bambae i givhan long yu!
?From wanem i gud blong ridim Baebol?
?Olsem wanem? ?Yu harem se yu no intres tumas blong ridim Baebol? Sipos yes, i no yu nomo, plante man oli olsem. Maet yu gat tingting ya se Baebol i gat plante taosen pej we oli fulap long raeting mo i no gat pija—i no olsem we yu stap lukluk TV o video.
Yu traem tingbaot sipos yu faenem wan bigfala bokis we ol man blong bifo oli putum ol sas samting long hem. ?Bambae yu wantem tumas blong save wanem i stap insaed?
Baebol i olsem bokis ya. Hem i gat ol sas samting insaed, hemia ol waes advaes we i save givhan long yu blong
Mekem ol gudfala desisen
Joen gud wetem papa mo mama blong yu
Faenem ol gudfala fren
Winim wari
?Olsem wanem wan olfala buk olsem i save givhan long yumi tede? Traem tingbaot: “Olgeta tok blong Baebol oli kamaot long God fastaem.” (2 Timoti 3:16) Hemia i min se ol advaes we i stap long Baebol, oli kamaot long Nambawan Man blong givim advaes.
Baebol i olsem wan bokis we i fulap long ol sas samting, hemia ol waes advaes
?Wanem plan we mi save folem blong ridim Baebol?
Wan rod, hemia blong ridim long stat go kasem en. Hemia bambae i givhan long yu blong yu kasem ol bigfala tingting long Baebol. I gat plante defren plan we yu save folem blong ridim Baebol. Tingbaot tufala plan ya:
Yu save ridim ol 66 buk blong Baebol olsem we oli stap, Jenesis kasem Revelesen.
Yu save ridim folem ol yia we ol samting oli hapen.
Traem hemia: Long Apendiks A7 long New World Translation i gat wan lis blong ol yia we ol bigfala samting i hapen long laef blong Jisas long wol.
Seken plan we yu save folem: Yu jusum wan stori blong Baebol we i stret long samting we yu stap fesem. Eksampol:
?Yu wantem faenem ol fren we yu save trastem? Ridim stori blong Jonatan mo Deved. (1 Samuel, japta 18 kasem 20) Biaen, fulumap pepa ya, “How to Find Loyal Friends” blong lanem sam samting long stori ya.
?Yu wantem gat moa paoa blong winim ol samting we oli traem yu? Ridim stori blong Josef, mo faenemaot olsem wanem hem i winim samting we i traem hem. (Jenesis japta 39) Biaen, fulumap pepa ya “How to Resist Temptation . . . Joseph—Part 1” mo “Falsely Accused! Joseph—Part 2” blong lanem sam impoten lesen.
?Yu wantem save olsem wanem prea i save givhan long yu? Ridim stori blong Nehemaea. (Nehemaea japta 2) Biaen, yu fulumap pepa ya “God Answered His Prayer” blong lanem sam impoten lesen.
Traem hemia: Taem yu ridim Baebol, meksua se yu stap long wan ples we i kwaet blong yu save tingting gud long samting we yu stap ridim.
Namba tri plan, hemia blong jusum wan stori o wan long Ol Sam, ridim, mo biaen tingbaot olsem wanem i save givhan long yu. Afta we yu ridim, askem ol kwestin olsem:
?From wanem Jehova i raetem ol tok ya long Baebol?
?Wanem fasin o wok blong Jehova we stori ya i soemaot?
?Olsem wanem blong folem save ya long laef blong mi?
Traem hemia: !Mekem wan plan! Raetemdaon dei we yu wantem statem program blong yu blong ridim Baebol.