?Oli Fasem Dedbodi Blong Jisas Long Kaliko Blong Turin?

Ansa we Baebol i givim

Baebol i no tokbaot kaliko ya we oli kolem Kaliko blong Turin. Plante man oli ting se hem i kaliko ya linen we oli fasem dedbodi blong Jisas Kraes long hem. Taswe ol skul we oli talem se oli Kristin oli tingbaot kaliko ya olsem wan samting we i tabu we i tabu. Kaliko ya i stap naoia long wan spesel bokis we i protektem hem, long wan jos haos long taon ya Turin long Itali.

?Olsem wanem? ?Baebol i soemaot se oli fasem dedbodi blong Jisas long Kaliko blong Turin? Nogat.

Traem tingbaot tri samting long saed blong kaliko ya we oli defren long samting we Baebol i talem.

1. Kaliko ya i longfala olsem 442 sentimeta, i bigwan olsem 113 sentimeta, mo oli somap wan narafala kaliko long saed blong hem we i bigwan olsem 8 sentimeta.

   Samting we Baebol i talem: Oli no fasem dedbodi blong Jisas long wan pis kaliko nomo, be long plante longlongfala pis. Oli no kavremap hed blong hem long sem kaliko we oli yusum blong fasem ol narafala haf blong bodi blong hem. Taem Jisas i laef bakegen, wan aposol i kam long beregraon, mo “i luk ol pis kaliko ya linen oli stap” long hol blong ston we i emti. Baebol i talem se: “Kaliko we i kavremap hed blong hem, i no stap wetem ol narafala pis kaliko, be oli rolem mo oli putum gud i stap hem wan.”—Jon 20:6, 7.

2. I gat ol mak long kaliko ya we plante man oli talem se hem i blad blong dedbodi we oli no wasem.

   Samting we Baebol i talem: Taem Jisas i ded, ol disaepol blong hem oli rerem dedbodi blong hem “folem kastom blong ol man Jiu blong berem man.” (Jon 19:39-42) Kastom blong olgeta i blong wasem dedbodi mo rabem wetem oel mo senta. (Matiu 26:12; Ol Wok 9:37) Taswe, ol disaepol oli wasem dedbodi blong Jisas bifo we oli fasem long kaliko.

3. Wan buk (Encyclopædia Britannica) i talem se kaliko ya i longfala, mo i gat pija blong wan man we i “slip long hem. Oli benem kaliko blong kavremap narafala haf blong hed mo bodi blong man ya.”

   Samting we Baebol i talem: Ol disaepol blong Jisas oli tokbaot ded blong hem, hol blong ston we i emti, mo ol woman we oli luk “tu enjel we tufala i talem long olgeta se hem i laef.” (Luk 24:15-24) Sipos kaliko ya i stap long gref blong Jisas, i klia se ol disaepol bambae oli tokbaot pija we i stap long hem. Be Baebol i no talem wan samting long saed ya.

?I stret blong ona long kaliko ya olsem wan aedol?

Nogat. Nating sipos kaliko ya i tru, be i rong blong ona long hem olsem wan aedol. Traem tingbaot sam tok blong Baebol we i soemaot from wanem i rong.

1. I no nid blong yusum long wosip. Jisas i talem se: “God hem i Spirit, mo olgeta we oli wosipim hem, oli mas wosipim hem long spirit mo long trutok.” (Jon 4:24) Wosip we i tru i no joen wetem ol aedol o samting blong bifo we man i ona long olgeta.

2. Baebol i agensem. Tenkomanmen i talem klia se yumi no mas wosipim ol aedol. (Dutronome 5:6-10) Bakegen, Baebol i talem long ol Kristin se: “Yufala i mas stap longwe long ol aedol.” (1 Jon 5:21) Maet samfala oli talem se kaliko ya i no wan aedol, be i soemaot bilif blong olgeta nomo. Be wan samting i save kam wan aedol taem man i ona long hem.a Taswe, ol man we oli wantem mekem God i glad, oli no leftemap o givim ona long eni samting, mo hemia i minim kaliko ya tu.