Ol Tut Blong Limpet Oli Spesel

Snel ya limpet we i laef long solwota, i gat wan sel i goraon long hem, long fom blong wan kon. Hem i gat plante strong tut we i narakaen lelebet. Oli wokem ol tut blong hem wetem ol tred blong wan strong ston, hemia goethite we long stamba blong hem, i gat ol protein.

Tingbaot: Long wan pat blong hem we i luk olsem tang blong man, i fulap gud long ol tut we i benben—we wan tut i no longfala bitim wan milimeta—mo i sap olsem wan fael. Wanwan tut i mas strong gud blong hem i save brekbrekem gud ol gras blong solwota antap long ol ston blong i save kakae.

Ol man blong stadi oli wantem save se ol tut blong limpet oli strong gud olsem wanem bifo we oli brokbrok. Nao, taem oli lukluk ol tut blong hem long wan spesel glas, oli faenemaot se oli strong gud bitim plante samting we oli stadi long hem bifo, mo tu, oli strong bitim tred blong spaeda. Man we i lidim stadi ya, i se: “I gud yumi traem tingting gud mo folem fasin we oli wokem ol tut blong limpet blong wokem ol niu samting.”

Ol man blong stadi oli bilif se oli save wokem sam samting we i strong gud olsem tut blong limpet blong wokem ol trak, bot, plen mo tut blong man.

?Wanem tingting blong yu? ?Tut blong limpet we oli wokem long spesel fasin, i kamaot olsem nomo, no i gat wan Man we i wokem?