Ol Man Blong Ridim Wekap! Oli Talem

Ol Woman Taem mi stat ridim “Ol Woman—?Wanem Fyuja Blong Olgeta?,” long Wekap! blong Epril 8, 1998, (Epril-Jun, 1998 long Bislama) mi mi stat krae bigwan. Neva bifo wan samting i tajem mi olsemia. Tangkiu tumas blong enkarajem mifala blong lukluk i go long fiuja, long taem ya we bambae i no moa gat man i mekem trabol.

C. J., Yunaeted Stet

Taem mi luk we plante defdefren woman long olgeta ples blong wol oli gat hadtaem, samting ya i tajem mi. Mi mi ridim olgeta wok we ol woman oli mas mekem—Plante taem olgeta nomo oli sapotem famli—nao samting ya i tajem mi. Mi tu mi mi wan mama, mi gat tu pikinini. Mo plante taem mi krae taem laef i had tumas long mi. Be toktok ya i halpem mi blong kasem save se fasin blong laef blong mi i isi moa, bitim plante narafala woman.

K. S., Yunaeted Stet

Tibi Mi mi laekem tumas ol tok long “Tibi—Sik Ya We i Kilim Plante Man i Ded Hem i Kambak.” (Wekap! blong Julae-Septemba, 1998 long Bislama) Mi mi kasem Tibi long 1988 nao mi kamgud bakegen. Yu talem stret se ol sikman oli mas tekem meresin blong olgeta “olwe nomo evri dei.”

Y. L., Franis

Mama blong hasban blong mi i no laekem tumas ol fasin blong Jos. Be hem i luk magasin ya long wan tebel long haos blong mi, mo hem i ridim hem. Nao hem i askem blong mi letem hem i karem magasin ya i go long haos blong hem. Mi mi gat jans blong givim tu narafala Wekap! i go long hem. Tangkiu from hadwok blong yufala, we yufala i wokem magasin ya.

L. N., Yunaeted Stet

I gat 11 yia i pas finis, mi mi kasem sik ya Tibi. Ol tok blong yufala oli stret nomo. Samtaem mi harem olsem we taem mi stap ridim tok ya, mi stap pastru long sik ya bakegen. Mi tangkiu long Jeova from laef ya we hem i givim long yumi, mo from olgeta advaes we yumi kasem long ol Wekap! blong protektem laef blong yumi.

G. B., Itali

Mi mi kasem sik ya, nao mi mas tekem meresin long sikis manis. Toktok blong yufala i tijim mi moa long sik ya we i save kilim man i ded. Moa impoten ya, hem i halpem mi blong wokem wan strong bilif long Kingdom blong God we bambae i stretem problem ya olgeta.

P. P., Indonesia

Yia 2000 Tok ya “Baebol i Talem Wanem: ?Yia 2000 i impoten olsem Wanem?” long Wekap! blong Mei 8, 1998, (Julae-Septemba, 1998 long Bislama) i mekem mi mi tingbaot gud poen ya. Mi mi glad from we yufala i no fraet blong tok stret long mifala, se yumi no mas traem talem prapa tingting blong yumi long saed ya. Mo yufala i talem stret tu se bifo, Jeova i talem se hem i gat prapa fasin blong hem blong kaontem ol yia, gogo bambae dei blong hem i kam.

S. W., Yunaeted Stet

Laef Mo Ded Long Kambodia Tangkiu from tok ya “Longfala Trep Blong Mi Blong Aot Long Laef Mo Ded Long Kambodia.” (Mei 8, 1998, Julae-Septemba 1998 long Bislama) Mi glad blong mekem wok blong Jeova long stret fasin, mo mi harem gud taem mi luk we plante narafala oli mekem sem mak, nating we oli stap tingbaot yet ol nogud samting we oli mekem bifo. Olsem fasin blong Wathana Meas, we hem i wan soldia bifo, nao hem i kilim sam man i ded blong hem wan i save stap laef. Mi sek taem mi ridim stori blong hem, se hem i mas haed tri manis long wan hol. Hem i no save yet se smol taem biaen, bambae hem i kasem save long Jeova—!nambawan jans long laef blong hem ya!

C. M. S. L., Brasil