Ol Man Blong Ridim Wekap! Oli Talem

Wan Kwin We i Waes Nambawan stori blong yufala long saed blong Catherine Parr (“Wan Kwin We i Waes i Mekem Rabis Plan Blong Wan Bisop i Foldaon,” Janewari-Maj,1999) i mekem mi tingbaot stori blong Kwin Esta long Baebol. !Tufala woman ya oli soemaot bigfala waes! !Nating se mi mi no wan Wetnes blong Jeova, mi neva mestem wan Wekap! we i kam! Plante taem, mi stap tingting from wanem ol narafala man oli no laekem ol buk blong yufala olsem we mi mi laekem olgeta.

M. D. S. F., Brasil

Mi faenem se stori blong histri blong Henry 8 mo waef blong hem Cathrine Parr i rili pulum intres. Nambawan wok. Yufala i mekem dip stadi long haf ya, mekem se stori ya i stret, mo i klia.

C. G., Itali

Rod we yufala i yusum blong tokbaot store ya i mekem mifala i harem olsem we mifala i stap wetem Kwin Catherine long taem ya. Tankiu blong prentem ol haf olsem ya mekem se mifala we i stap long saed blong wol ya, i save kasem save long ol kastom blong ol kantri longwe.

L. G. and L. G., Venesuela

Ol Mak Long Fes Mifala i tankiu long haf ya we mifala i bin kasem hemia ya “Ol Mak Long Fes”—Wan ‘Aedentiti Kad’ long Naejeria we i stap lus.” (Epril-Jun,1999) Mi mo hasban blong mi, mifala i gat ol fren long Afrika we oli gat ol mak long fes blong olgeta, mo mifala i stap tingbaot se oli blong wanem. Mifala i kasem ansa long kwestin blong mifala long atikol ya.

M. V., Itali

Ol Laeon Tankiu from haf ya “Laeon —Bigfala Puskat Blong Afrika.” (Epril-Jun,1999) Haf ya hem i impoten tumas long mi, from we long plante yia finis mi laekem ol laeon. Mi tinghae long olgeta from we oli naes tumas mo oli no fraet. Wan dei mi wantem stap wetem “pikinini blong laeon.”—Aesea 11:6-9

E. A. S., Brasil

Fes Mo Bodi Blong Jisas Tankiu tumas from ol haf ya “Jisas—?Fes Mo Bodi Blong Hem i Olsem Wanem? ?Jisas i Olsem Wanem Naoia?” (Janewari-Maj, 1998) Plante pija blong Jisas we yumi faenem long ol Jos mo ol film, oli soemaot hem long wan fasin we i rong. Mi laekem blong ridim haf ya we i tokbaot wok blong Jisas naoia mo wanem bambae hem i mekem long fyuja. Hem i no olsem wan smol bebi we i stap slip long haoskakae blong ol anamol.

M. W., Ostria

I gud tumas blong ridim se Jisas i no wan man we i slakslak. Hem i no wan man we oltaem fes blong hem i soem sore, olsem we plante pija we ol man oli stap mekem oli soem. Defren olgeta, hem i wan man we i strong we i folem gud fasin blong Papa blong hem, God ya we “ i wan hapi God.”—1 Timoti 1:11, NW.

R. O. R., Brasil

Long pej 8, yufala i talem se “God i karem laef blong Jisas mo i putum i go long bel blong wan woman Jyu we i neva slip wetem wan man samtaem.” ?From we Jisas i stretgud olgeta, samting ya i minim se hem i no gat wan mak blong Adam nating long hem?

J. G., Yunaeted Stet

Bifo we Jisas i bon, enjel ya Gabriel i talem long Meri se: “Tabu speret bambae i kam long yu, mo paoa blong God ya we i hae we i hae, bambae i kavremap yu olsem wan sado. Nao from samting ya, pikinini ya blong yu bambae i tabu, i blong God, mo ol man bambae oli save singaot hem, se Pikinini blong God.” (Luk 1:35) I klia se, tabu speret blong God i mekem se wan eg insaed long bel blong Meri i gru, taem God i tekem laef blong faswan Pikinini blong hem long ples blong ol speret man i kam daon long wol. Taswe yumi sua se tabu speret i lukaotgud se paoa blong laef blong stret Pikinini ya, i karemaot eni sin blong Adam we i stap long eg blong Meri. Be long semtaem, Meri i pasem sam samting long bodi blong hem i go long pikinini blong hem. From samting ya, maet lukluk blong Jisas i semak long Meri.—ED.