Ol Man Blong Ridim Wekap! Oli Talem

Ol Man We Oli Laekem Pijin Mi laekem tumas blong ridim haf ya “Wajem Ol Pijin—?Wan Nambawan Samting We Eniman i Intres Blong Mekem?” (Oktoba-Desemba, 1998) Be hummingbird, we yufala i talem se hem i wan pijin blong “Not/Sentrol Amerika,” man i save faenem tu long Saot Amerika.

J. P., Argentina

Smol toktok we mifala i raetem i no fulwan, tangkiu blong mekem poen ya i klia.—ED.

Hariken Pauline Oltaem mi glad taem mi tingbaot se mi joen long wan ogenaesesen we i rili kea long ol man. Tangkiu from nambawan stori ya “Tu Haf Blong Wan Disasta.” (Janewari-Maj, 1999) !I mekem mi mi haremgud blong harem se sam man oli luksave we ol Witnes blong Jeova oli ‘no wok olbaot mo oli no stap stil mo giaman’!

D. F. S., Brasil

Ol Misinari We Oli No Fraet Afta we mi ridim haf ya “Mifala i No Moa Laef Blong Mekem Wok Blong Mifala” (Epril-Jun, 1999), mi wantem tumas blong talem tangkiu from ol naesfala stori ya we oli mekem bilif blong mifala i strong moa. Long ples blong mi, hemia long Briten, mifala i faenem i had blong prij from we plante man oli no kea long gud nius. Be, samting ya i nating nomo skelem wetem wanem we Jack mo Linda Johansson tufala i fesem. Stori blong tufala i rili tajem hat blong mi mo i mekem mi mi glad long wanem we mi gat.

L. J., Engglan

Mi mo waef blong mi, mitufala i mekem wok blong fultaem paenia sam yia finis nao, mo mitufala i save se i no isi blong lan long wan niufala teritori. Brata mo sista Johansson tufala i tok klia nomo blong talemaot filing we tufala i gat taem tufala i mas go laef long narafala ples. Stori blong tufala i soemaot se, i no mifala nomo we i faenem i had, mo mifala i mas gohed blong dipen long Jeova.

S. E. C., Brasil

Mekem Trutok i Kam Wan Haf Blong Laef Mi mi gat 12 yia, mo mi laekem haf ya “Ol Yangfala Oli Askem . . . ?Olsem Wanem Mi Save Mekem Trutok i Wan Haf Long Laef Blong Mi?” (Janewari-Maj, 1999) Naoia we skul i stat finis, mi faenem i had lelebet blong rerem ol Kristin miting. Be mi mas pemaot taem. Mi ting se haf ya bambae i halpem plante yangfala blong oli laekem moa Jeova mo stanap strong long trutok.

C. S., Potugal

Wan yia bifo, mi stap askem mi wan ol semfala kwestin ya long saed blong trutok. Mi no sua sipos mi rili laekem trutok no sipos mi folem nomo from famle blong mi. Ale, mi mekem samting we yufala i tokbaot—mi pruvum trutok long mi wan tru long dip stadi blong Baebol. Naoia mi hapi talem se trutok i wan haf blong laef blong mi. !Mak blong mi hemia blong kam wan fultaem paenia!

H. N., Yunaeted Stet

?Bambae Wan Sta i Foldaon? Mi gat ten yia blong mi, mo mi laekem tumas tok ya “Baebol i Talem Wanem: ?Bambae Wol i Save Lus From Wan Sta We i Foldaon Long Skae?” (Janewari-Maj, 1999) Naoia mi save se bambae i no gat wan sta we i kam spolem wol ya blong yumi, from we Jeova i wantem we bambae yumi laef long paradaes long wol.

J. P., Yunaeted Stet

!Finis Long Smok! Tok ya “!Yu Save Winim From We Mifala i Win Finis!” i mekem mi mi sek. (Janewari-Maj, 1999) Mi mi jes finisim wan Baebol stadi we mi bin mekem long wan woman we i stap smok. Hem i stap kam long olgeta miting, be hem i no save gohedgud long fasin blong hem, from we sigaret i holem hem. Mi mi givim finis sam magasin i go long hem blong hem i save finis long smok, be nogat. Naoia mi stap prea blong niufala tok ya i save halpem hem blong winim nogud fasin ya.

E. C., Yunaeted Stet