Ol Man Blong Ridim Wekap! Oli Talem

AIDS Mi wantem talem tangkiu long yufala from haf ya “Faet Agensem AIDS—?Bambae Ol Man Oli Winim?” (Julae-Septemba, 1999) Hem i givim plante gudfala save. Mi mi gat 19 yia mo mi lanem plante samting long saed blong AIDS mo HIV long skul mo long haos. Be tingting blong mi i fasfas yet. Haf ya i halpem mi blong luksave se i impoten blong waesgud taem mi jusum wan fren blong mared wetem mo blong mi folem wan fasin blong laef we i klin.

S. T., Yunaeted Stet

Ol haf ya we yufala i raetem oli givim gudfala save, oli stret, mo oli talem trufala samting. Mi mi gat AIDS blong bitim ten yia finis. Wan fren i stap tijim mi long Baebol wetem ol buk blong yufala. Tangkiu we yufala i no fraet nating blong prentem ol haf olsem ya.

B. W., Yunaeted Stet

Mi no save stop blong ridim Wekap! go kasem we mi finisim olgeta haf ya long saed blong AIDS. Mi neva ridim ol stret save olsem hemia we haf ya i tokbaot. Mo hemia i impoten tumas from we mi mi wan nes. Tangkiu bigwan.

D. E., Jemani

Mi talem tangkiu long haf ya from we pikinini blong mi i bin lego Kristin fasin blong laef mo i kambak bakegen we AIDS i kasem gud hem. Wetem help blong Jeova, naoia hem i gat ol gudfala fasin long saed blong spirit. Helt blong hem i gud lelebet from ol meresin we hem i stap tekem. Mifala i save se i gat plante man we oli gat sik ya finis be oli no luksave yet. Hemia wan impoten samting we olgeta we oli wantem mared oli mas tinghevi long hem.

N. J., Yunaeted Stet

Mustas Blong Jisas Long haf ya “Jisas—?Fes Mo Bodi Blong Hem i Olsem Wanem? ?Hem i Olsem Wanem Naoia?” (Janewari-Maj, 1999), ol pija blong yufala oli soem se Jisas i no obei long loa we i stap long Levitikas 19:27: “Yufala i no mas katem hea blong yufala long saed blong hed blong yufala, mo yufala i no mas katem mustas blong yufala.” ?From wanem ol pija blong yufala oli no soem Jisas wetem hea we oli no katem long saed blong hed blong hem?

C. S., Inglan

God i givim loa ya blong blokem ol man Jiu blong folem ol stael blong katem hea no mustas blong olgeta olsem ol hiten man oli stap mekem. Be, loa ya i no minim se ol man Jiu oli no gat raet nating blong katem mustas no hea blong fes blong olgeta. Stori we i stap long 2 Samuel 19:24 i soemaot se oltaem ol man Jiu oli “katem mustas” blong olgeta, oli stap katem gud ol hea blong fes blong olgeta. Yumi no save se oli katem folem wanem stael, be hemia i dipen long kastom we i stap finis long medel blong olgeta. Ol stadi we ol man blong digim graon oli mekem, i pruvum se ol man Jiu oli gat plante defren stael blong katem mustas blong olgeta long ol handred yia we i pas. Taswe pija we mifala i wokem blong Jisas wetem wan sotfala mustas we oli katem gud, mo ol hea long saed blong hed we oli katem gud, i laenap wetem ol pruf ya.—ED.

Tabu Spirit Mi mi wantem talem tangkiu long yufala from nambawan haf ya “Baebol i Talem Wanem: ?Wanem Ya Tabu Spirit Blong God?” (Epril-Jun, 1999) Nating se mi mi wan Witnes blong Jeova blong sam yia finis, mi wantem blong lanem moa long saed blong Jeova God. Haf ya i givim wan nambawan ansa long kwestin we i stap long taetel blong hem mo i isi blong kasem save. Moa we mi kasem save long Jeova mo ol wok blong hem, moa we mi lavem hem tumas.

Y. B., Rasia

Posen Blong Kilim Bebet Mi mo waef blong mi mitufala i glad long haf ya “Posen Blong Kilim Bebet i Spolem Garen Tu.” (Julae-Septemba, 1999) Mitufala i kea bigwan long ol samting we oli stap raonabaot long yumi, mo mitufala i stap traem blong agensem fasin blong posenem graon ya. I gud blong faenem se i gat ol man long Brasil, Jaena, mo sam narafala kantri, we oli tinghevi long samting ya mo we oli stap mekem sam gudfala samting blong givhan.

W. G., Kanada