?Olsem Wanem Famle i Save Halpem Hem?

Wan toktok blong ol man long Is i talem se: “Fastaem man i tekem wan dring biaen dring i tekem wan dring, mo laswan dring i tekem man.”

YU STAP wokbaot long saed blong wan sofsof graon. Wantaem nomo, leg blong yu i stat blong draon long hem. Kwiktaem biaen, leg blong yu i lus moa. Moa yu traehad blong kamaot long hem, yu draon moa.

Man we i no save lego dring i draonem famle blong hem long sem fasin. Woman ya we i dipen long man blong hem we i alkolik hem i traehad bigwan blong jenisim alkolik ya. Hem i soemaot lav long hem, hem i tok strong long hem, be man ya i gohed blong dring. Woman ya i haedem dring blong hem be hem i pem moa. Woman ya i haedem mane blong hem be hem i tekem long wan fren blong hem. Hem i traehad blong pulum man ya blong tingbaot lav blong hem long famle blong hem, long laef mo long God, be i no wok. Moa hem i traehad, ful famle i draon moa long trabol blong alkol. Blong halpem alkolik ya, ol memba blong famle oli mas luksave stampa fasin blong man we i no save lego dring. Oli nidim blong save from wanem sam “ansa” i no wok oltaem, mo oli mas stadi blong save wanem ol rod ya we oli rili wok.

Man we i no save lego dring i no olsem wan man we i dring we i lusum hed. Hem i fasin we man i no save lego dring. Fasin blong man ya se hem i tingbaot alkol oltaem mo hem i no save kontrolem fasin blong hem blong dring alkol. Sam man we oli gat gud save oli agri se i no save kamgud bakegen, be man we i no save lego dring hem i save winim trabol ya sipos hem i no moa dring long ful laef blong hem.—Skelem Matyu 5:29.

Long sam fasin oli save skelem samting ya long sik blong suga. Man we i gat sik blong suga i no save tekemaot sik ya long bodi blong hem, be hem i save kontrolem sik ya sipos hem i no moa kakae suga. Sem mak bakegen, wan alkolik i no save jenisim bodi blong hem we i wantem dring oltaem be i save kontrolem fasin blong bodi, sipos i lego alkol fulwan.

Yes, hem i isi blong talem be i hadwok blong mekem. Alkolik ya i blaen long wan samting we hem i no save. ‘Fasin blong mi i oraet nomo.’ ‘Famle blong mi i lidim mi blong dring.’ ‘?Wetem wan bos olsem blong mi, hu i no save dring?’ Plante taem famle blong hem oli bilivim ol eskyus blong hem mekem se oli ting se fasin blong hem i oraet tu. ‘Papa blong yu i nidim blong spel long en blong dei.’ ‘Papa i nidim blong dring. From we mama i stap toktok tumas.’ Oli talem ol tok ya blong haedem samting we i stap long famle: Papa i wan alkolik. “Hemia nomo i rod blong famle i save stap tugeta,” Dokta Susan Forward i talem. “Ol gyaman, ol eskyus, mo ol tok haed oli kamaot oltaem long haos olsem we win i stap blu oltaem.”

Ol memba blong famle oli no save pulumaot alkolik ya long graon we i sofsof gogo olgeta nomo oli mas go aot. Ating samfala i talem, ‘!Alkolik nomo i nidim help, i no mi!’ Be yu mas luksave: ?Hamas taem yu harem nogud long tingting blong yu mo yu kasem ol trabol from fasin blong alkolik ya? ?Hamas taem fasin blong hem i mekem yu yu kros, yu wari, yu no moa save wanem blong mekem, yu fraet? ?Hamas taem yu stap long haos blong lukluk long alkolik ya bitim we yu save mekem sam impoten wok? Taem ol memba blong famle we oli no alkolik oli stat blong mekem laef blong olgeta i gud, ating alkolik ya i save folem.

Stop blong tekem ol trabol. Ating alkolik i save talem se: ‘Sipos yufala i mekem i gud long mi, mi mi no save dring.’ “Alkolik i nidim se yu bilif long samting ya ale bambae hem i save putum trabol blong hem long saed blong dring long yu,” man blong givim advaes, Toby Rice Drews i talem. Yu no mas bilivim. Alkolik ya i no dipen nomo long alkol be long ol man we oli sapotem slak fasin blong hem tu. Sipos ol memba blong famle oli bilif long toktok blong hem, oli save pulum hem blong gohed blong dring.

Wan proveb blong Baebol long saed blong fasin kros ating i stret nomo long wan alkolik: “Letem hem i kasem ol frut blong hem. Sipos yu karemaot hem long trabol wan taem, bambae yu mas mekem bakegen.” (Proveb 19:19, Today’s English Version) Yes, letem alkolik ya i singaot bos blong hem, i go hem wan long bed, i klinim hem wan. Sipos ol famle oli mekem ol samting ya long hem, oli stap halpem hem moa blong hem i dring gogo hem i ded.

Yu mas askem help long sam narafala. Hem i had mo ating hem i no save mekem blong wan memba blong famle i kamaot hem wan long sofsof graon. Yu nidim sapot. Kasem help long ol fren blong yu we oli no agri wetem ol eskyus blong alkolik mo we oli no save livim yu yu stap olsem nomo.

Sipos alkolik i agri blong kasem help, hemia i wan rod blong yu save glad. Be hemia i stat nomo blong kamgud bakegen. Blong katem alkol mo tekemaot long bodi i save tekem sam dei nomo. Be blong jenisim tingting we i dipen long alkol, i strong moa bakegen.

[Bokis blong pija long pej 5]

Ol Saen Blong Makemaot Alkolik

Saen Blong Makemaot: Wan alkolik i wari tumas long taem blong hem blong dring. Taem i no dring alkol, hem i stap tingting long alkol.

No Save Kontrolem: Fasin blong hem blong dring i defren long wanem we hem i tingting blong mekem, i nating sipos hem i gat strong tingting blong blokem.

Strong Fasin Blong Hem:Ol prapa rul blong hem (“Mi neva dring mi wan,” “Mi neva dring long taem blong wok” mo i gohed olsem) hemia blong haedem trufala tingting blong alkolik se: “Mi no mas letem wan samting i blokem mi long dring blong mi.”

Hem i No Stap Lusum Hed: Hem i save ‘tekem strong dring be no lusum hed,’ be hemia i no wan blesing—plante taem fasin ya i saen blong man we i no save lego dring.

Ol Frut We i Nogud: Ol stret fasin long saed blong dring i no save spolem famle blong wan man, wok blong wan man, mo bodi blong wan man. Be man we i no save lego dring i mekem olsem.—Proveb 23:29-35.

Haedem Rong We Oli Mekem: Alkolik i yusum ol tok we oli haedem slak fasin blong hem, hem i ting se hem i no mekem bigfala rong mo hem i mekem eskyus long fasin blong hem.