I Gat Rod Blong Kamgud

“Yumi mas jus: Stop blong dring mo kamgud, no gohed blong dring mo ded.”—Wan alkolik we i kamgud.

TINGBAOT sipos wan naet yu wekap mo yu luk haos blong yu i kasem faea. Kwiktaem yu kasem help, mo sloslou faea hem i ded. ?Olsem wanem, bambae yu gobak insaed mo mekem olsem we i no gat samting i hapen? No gat. Haos ya i nogud olgeta mo i nidim blong mekem i gud bakegen bifo yu gat gud laef.

Sem mak bakegen, wan alkolik we i stat blong lego alkol i kasem sem trabol. Alkol i spolemgud laef blong hem, ating blong plante yia. Naoia i lego alkol. “Faea” i finis, be hem i mas mekem wan bigfala wok blong bildim bakegen ol nyufala tingting mo fasin long laef blong hem, sipos hem i wantem lego alkol olgeta. Ol haf we oli kam naoia oli save givhan long wan alkolik blong nomo drong.

1. Save Enemi

Baebol i talem se ol samting we bodi i wantem “oli gohed blong mekem wan faet agens long sol.” (1 Pita 2:11, NW) Grik wod ya we oli tanem i kam “gohed blong mekem wan faet” hemia i min se “mekem wok blong ami,” mo hem i holem tingting ya blong spolem ol samting long taem blong wo.—Skelem Rom 7:23-25.

Sem mak long wan gudfala soldia hem i mas tekem taem blong stadigud long ol trik blong enemi blong hem, alkolik i mas stadigud long fasin ya we hem hem i no save lego strong dring mo olsem wanem alkol i save spolem hem mo olgeta we oli stap kolosap long hem.a—Hibrus 5:14.

2. Jenisim Fasin Blong Dring Mo Jenisim Tingting

Wan dokta i talem se: “Fasin blong no moa dring i minim se yu mas sakemaot botel mo bebi tu.” Hemia i min se, i no fasin blong dring nomo i mas jenis; tingting tu i mas jenis.

Baebol i waes blong talem se: “Mekem tingting blong yufala i nyufala olgeta.” (Rom 12:2) “Tekemaot olfala laef ya blong yufala . . . , wetem ol fasin blong hem.” (Kolosi 3:9) Sipos alkolik ya i jenisim ol fasin blong hem be olfala laef ya i stap yet, alkolik ya bambae i dipen long wan narafala samting we i nogud—no i gobak long olfala fasin bakegen.

3. Toktok Wetem Wan We Yu Trastem Hem

Wan proveb long Baebol i talem se: “Hemia we i stap hem wan oltaem bambae i tingbaot hem wan nomo; bambae hem i agens long ol waes ya we i save wok.” (Proveb 18:1) Nating we hem i no moa dring, alkolik ya i save mekem eskyus long ol fasin blong hem yet. Olsem ya nao, hem i nidim blong toktok wetem wan man we i trastem hem mo man ya i rere blong lesin long hem be i gat strong tingting long ol stret fasin tu (plante taem oli kolem wan ‘sponsa’). I gud moa sipos sponsa ya i wan man we hem i alkolik bifo nao hem i winim finis ol traem blong lego alkol mo hem lego. (Skelem Proveb 27:17.) Wan sponsa olsem hem i mas respektem bilif blong alkolik long saed blong skul, mo hem i mas rere blong lego sam samting we hem i wantem mekem blong givim taem blong givhan long alkolik oltaem.—Proveb 17:17.

4. Longfala Tingting

Sloslou hem i save kamgud. I tekem taem blong alkolik ya i kamgud bakegen. Ating i had blong sevem vatu, wari long saed blong wok, mo famle i olbaot. Taem yu kam fri long alkol i no min se yu kam fri long trabol. Fastaem alkolik ya we i stap kamgud ating hem i save harem nogud olsem we hem i fesem laef we i no gat meresin ‘blong stretem ol trabol blong hem.’ Taem ol trabol olsem oli kam antap, alkolik ya we i stap kamgud i save tingbaot ol gudfala advaes ya blong man blong raetem Ol Sam we i talem se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala. Hem i no save letem stret man i lus.”—Ol Sam 55:22.

5. Joen Long Ol Gudfala Fren

Wan alkolik hem i mas askem long hem wan se: ‘?Ol fren blong mi oli sapotem mi blong no moa dring no oli gohed blong tokbaot “fasin blong bifo,” mekem se mi harem we mi stap mestem sam gudfala samting?’ Proveb 18:24 i talem se: “I gat sam man we oli gat fasin blong spolem ol fren blong olgeta, be i gat sam man we oli fasgud long ol fren blong olgeta moa, i bitim wan stret brata.” Yumi mas luksave hu ya ol tru fren mo hu ya olgeta we oli save spolem yumi.

6. No Trastem Yu Wan Tumas

“!Mi mi glad we mi glad—mi no moa gat tingting blong dring bakegen!” Wan alkolik we i tok olsem, hem i tinghae tumas from we hem i stap jenis, be hem i no luksave bigfala paoa we fasin blong lego dring i save holemtaet hem. Filing ya blong haremgud bitim mak taem hem i jes lego dring, oli kolem ‘pink klaod,’ be i stap smoltaem nomo. “Yu traem skelemgud tingting blong yu,” buk ya Willpower’s Not Enough i talem. “Sipos yu no mekem olsem bambae yu wan yu mekem yu foldaon, mo taem yu foldaon long wan klaod, i longwe blong kasem graon.”—Skelem Proveb 16:18.

7. Lukaot No Foldaon Long Narafala Nogud Fasin

Plante we oli lego dring, oli kakae i bitim mak no oli bisi tumas long wok, oli man blong spolem mane long plelaki mo sam moa samting. ‘?Wanem i rong? Naoia mi mi no moa dring,’ ating alkolik we i no moa dring i talem olsem. I tru, sam samting long saed blong bodi oli save givhan sipos alkolik i mekem sam narafala samting. Be sipos yu mekem sam samting no sam wok blong kilim ol filing blong yu nomo, samting ya i save mekem yu yu haremgud blong smoltaem, be hem i wan gyaman filing nomo.

8. Mekem Nyu Program Long Famle

!Plante alkolik, olgeta nomo oli save spolem gudfala wok blong olgeta, taem oli stat kamgud! ?From wanem? From we fasin blong no drong i olsem nyufala laef. Samtaem alkolik i save harem se hem i wantem gobak long olfala fasin blong laef we hem i savegud long hem. Antap moa, taem alkolik ya i no moa drong, samting ya i jenisim program insaed long famle. From samting ya, wanwan memba blong famle i mas jenisim wok blong hem. Buklet ya Recovery for the Whole Family i talem se: “Famle i mas sakemaot program we oli stap folem mo oli mas putum wan nyu program long ples blong hem.” I klia from wanem sam man oli talem se fasin blong alkolik blong kamgud i wan famle bisnes.—Skelem 1 Korin 12:26.

9. Lukaot Blong No Kam Olsem Bifo

Taem yu trastem yu wan tumas, yu joen long ol nogud fren, yu mekem ol narafala fasin blong tekem ples blong fasin blong dring alkol mo taem yu wantem stap yu wan oltaem, ating oli save mekem yu yu foldaon long olfala fasin bakegen. Yu mas toktok oltaem wetem wan we yu trastem hem sipos yu luk se ol fasin ya oli kamaot long yu.

Wan alkolik we i stap kamgud i talem se: “Olgeta alkolik oli stop blong dring. Sam long mifala oli laki, oli stop taem oli laef yet.”

[Futnot]

[Bokis blong pija long pej 7]

Sipos Oli Mas Tekem Meresin

Ol meresin we oli gat alkol long hem oli save wekemap yu blong dring bakegen mo oli save lidim yu blong yu gobak olsem bifo.

Dokta James W. Smith i talem se: “Yumi no sapraes blong luk wan man we bifo hem i alkolik i dring alkol bakegen, afta plante yia finis we hem i kamgud, sipos hem i dring kof meresin we i gat alkol long hem. Wan alkolik i nogud long enikaen meresin we i kwaetem man no i daonem tingting. Sipos hem i mas dring meresin olsem, alkolik ya i mas . . .

1. luk wan dokta blong i save soemaot wanem trabol i save kamaot from.

2. talem long wan we i trastem hem, mo i gud sipos hem i save talem long hem bifo hem i tekem meresin ya evritaem.

3. raetemdaon evri meresin we hem i tekem.

4. stop blong tekem meresin taem hem i no moa nidim.

5. sakem ol meresin we i stap taem hem i no moa nidim blong tekem.