Ol Man Oli Talem

Edukesen Long Seks Mi mi raetem leta ya blong talemaot tangkyu we i stap long hat blong mi from ol haf we yufala i raetem long saed blong “Edukesen Long Seks—?Hu Bambae i Givim?” (Namba tu Wekap! 1992) Mi mi gat tu pikinini mo neva mi mi toktok wetem tufala long bisnes ya. Papa mama blong mi tufala i no bin tijim mi long saed ya, taswe mi no save wanem mi mas talem long tufala pikinini blong mi mo olsem wanem blong talem. Be taem mi ridim magasin ya, mi toktok wetem tufala wanwan. Mi haremgud blong mekem olsemia, hem i wan ekspiryens we ol papa mama oli no mas mestem.

M. A. P., Spen

Haf ya long magasin ya i no yusum doti tok, hem i klia mo hem i tok wetem respek blong eksplenem olsem wanem mifala i save tijim ol pikinini blong mifala long seks. Tangkyu tumas from yufala i givhan long mi blong luksave se mi mi no mekem wok blong mi long saed ya. Naoia mi stretem bisnes ya, tangkyu long gudfala magasin ya.

V. B., Franis

Mi mi wan woman we mi gat 25 yia finis, naoia mi mi luksave tingting blong Baebol long saed blong seks. Fasin blong slip olbaot we oli talem se yu save haremgud long hem i nating nomo, hem i mekem se yu lusum pis long tingting blong yu nomo. Mi mi no moa wan pikinini no wan yangfala, be mi mi lanem sam nambawan lesen long magasin ya.

S. H., Amerika

Mi mi neva ridim wan magasin olsemia long laef blong mi. Hem i nambawan we yufala i tijim mifala olsem wanem blong givim edukesen long seks long ol pikinini blong mifala mo long semtaem givhan long olgeta blong tinghae long ol gudfala fasin blong seks.

N. C., Itali

Mi mi wan mama we mi gat tu yangfala gel. Mi mi bin storeyan gud wetem tufala long olgeta samting long saed blong seks. Be mi mi gat tu yangfala boe tu, tufala i gat 11 mo 9 yia blong tufala. Mi mi toktok smol wetem tufala long saed blong seks, be mi no bin tokbaot ol jenis we bambae oli mas kamaot long bodi blong tufala. Long aftenun ya nomo nambawan magasin blong yufala i kam long pos blong mifala. Bambae hem i givhan long mi blong toktok wetem tufala boe blong mi.

P. W., Ostrelya

Mi mi wan yangfala gel, mo taem mi ridim magasin ya hem i givhan bigwan long mi. Papa mama blong mi tufala i no save olsem wanem blong tijimgud mifala long saed blong seks. Be wetem help blong Jeova, mi bin blokem ol fasin we oli agensem loa blong hem long saed blong seks. Mi hop se magasin ya bambae i givhan long ol papa mama we oli no toktok yet wetem ol pikinini blong olgeta long saed ya.

A. M., Meksiko

Tingting blong yufala se edukesen long seks i mas stap olsem wan “tok haed” long famle maet hem i mekem hadwok long sam man we oli ridim magasin ya blong yufala. Ol man we oli givhan long ol man long trabol, ol tija, ol dresa, mo plante narafala man oli kasem trening blong lukaotem ol saen long ol pikinini blong soemaot se samfala oli mekem nogud long olgeta long saed blong seks. Taem wan pikinini i yusum tok ya “tok haed” long saed blong seks, hem i wan saen, from we plante man we oli spolem ol pikinini oli talem long olgeta se oli mas haedem samting ya.

E. R. N., Amerika

Plante man we oli ridim magasin ya oli talem samting ya long mifala, mo mifala i sore sipos mifala i mekem sam man we oli tingbaot plante bisnes blong spolem ol pikinini oli wari. Mifala i glad we yufala i talem poen ya long mifala. Blong mekem i klia, maet i moa gud sipos ol papa mama oli tokbaot seks olsem we hem i “bisnes blong ol man wanwan” i no “tok haed.”—Olgeta we oli raetem magasin ya.