Ol Yangfala Oli Askem . . .

?From Wanem Papa Mama Blong Mi Oli No Soemaot Moa Intres Long Mi?

Wan yangfala gel i talemaot ol nogud filing we hem i gat se, “Taem mi askem mama blong mi blong toktok wetem mi blong faef menet nomo, oltaem hem i bisi.”

KRISTINA i gat 16 yia blong hem—hem i no mared mo hem i gat bel. Hem i sore tumas long nogud frut we hem i kasem, mo hem i kros tu. Hem i stap krae se, “Mama blong mi i neva eksplenem ol samting ya long mi, hem i neva gat taem blong tingbaot mi long wanem samting we mi stap mekem.”

?Yu stap harem olsem samtaem—se papa mo mama blong yu tufala i no intres long yu? Maet yu no soemaot ol wari blong yu olsem Kristina i mekem. Mo yu save se blong gat papa mama we tufala i no tingbaot yu i no wan eskyus blong mekem samting we i no stret. Nating se i olsem, yu save harem nogud tumas taem tufala i no tingbaot yu. Nating se yu stap kam moa kolosap long mak blong bigman, be yu yu gat strong filing yet se yu nidim lav blong papa mama mo sapot blong tufala. Yu save harem se yu stap yu wan nomo taem papa mama blong yu oli no moa tingbaot yu. Wan yangfala gel i talemaot ol nogud filing blong hem se, “Taem mi askem mama blong mi blong faef menet long taem blong hem, oltaem hem i bisi.”

From samting ya, yumi no sapraes long wan stadi we oli mekem mo oli faenem se 25% blong ol yangfala oli “harem se oli no gat inaf taem blong stap wetem papa mama blong olgeta.” Wan yangfala i talem se: “Mi harem se mi wantem stap kolosap moa long papa mama blong mi mo blong tokbaot ol filing blong mi long gudfala fasin wetem tufala.” Mo tu nating se ol yangfala wetem papa mama blong olgeta oli stap wanples, be ol filing blong olgeta oli defdefren. Maet oli no stap toktokgud tugeta blong mekem filing blong olgeta i joengud.

From Wanem Oli No Tingbaot Yu

Tingbaot: Yu bin wet long fuldei blong tokbaot wan trabol wetem mama blong yu. Be taem hem i kambak long wok, hem i sidaon long wan jea mo i stap lesingud long ol nyus we televisin i stap givimaot long aftenun. Taem yu kam blong storeyan long hem, hem i kros mo i ronemaot yu, mo i talem se, “?Yu no luk se mi stap traem blong spel?”

?Hem i no gat lav? Si hem i gat lav, taem sam papa mama oli mekem fasin olsem we oli no wantem toktok wetem ol pikinini blong olgeta, i no from we oli wantem mekem olsem. Be yumi stap laef long wan taem we ‘laef long wol ya i strong tumas.’ (2 Timote 3:1-3) Mo papa mama blong yu oli save harem nogud long plante samting naoia bitim bifo. Maet tufala i stap wari long wan samting, tufala i wantem tumas blong mekem wan samting be tufala i no winim, no maet tufala i taed tumas mekem se tufala i no moa gat paoa blong soemaot ol gudgudfala fasin long yu. Samting ya i tru moa taem papa nomo i stap wetem yu long haos no taem mama nomo i stap wetem yu long haos. Kasem taem we papa mo mama blong yu oli harem tok we yu talem from wari we yu gat, oli save tingting se evri samting i gud nomo.

Mo tu ol papa mama oli save gat sam narafala wari bakegen. Sipos papa blong yu i wan Kristin we i bigman long saed blong speret, maet hem i save karem ol bigfala responsabiliti insaed long kongregesen. (Skelem wetem 2 Korin 11:28, 29.) Mo maet mama blong yu i stap harem nogud from wan sik blong hem we i stap kam bigwan moa, be ating hem i no stap talemaot samting ya long yu. ?Yu yu gat ol brata mo ol sista? Sipos yes, papa mama blong yu bambae oli bisi tumas blong lukaot long ol nid blong olgeta tu.

I tru tu se plante papa mama oli no save lukaotgud long nid blong ol pikinini blong olgeta from we oli traem blong winim ol bigfala trabol olsem fasin blong dring tumas alkol. Mo plante narafala oli no kasem save yet olsem wanem blong soemaot intres long ol pikinini blong olgeta. Tru ya, ol papa mama nao oli mas givim eksampel, blong ol pikinini oli lanem fasin blong laekem ol man. (Skelem wetem 1 Jon 4:19.) Mo maet papa mama blong yu oli gruap wetem papa mama we oli no bin soemaot intres long olgeta.

Mo i gat wan narafala samting se samfala kastom oli no tingbaot ol nid blong ol yangfala man. Long samfala ples long Afrika, kastom blong olgeta i talem se long taem we papa i kakae, mama mo ol pikinini oli mas kakae long wan defren taem. ?Wanem samting i kamaot from? Kolin, wan yangfala boe blong Afrika we i gat 14 yia i talem se: “I hadwok blong harem long filing blong mi se mi stap kolosap long papa mama blong mi. Mi harem olsem we mi stap laef mi wan nomo.”

Ol Trap Blong Ronwe Long Ol

Nating se risen we papa mama blong yu oli no tingbaot yu i olsem wanem be i save mekem yu yu harem nogud mo yu kam kros. Sam yangfala oli soemaot samting ya taem oli no joengud no oli no wantem obei long papa mama blong olgeta. Samfala oli gat fasin blong agens mo oli ting se hem i wan rod nomo blong pulum papa mama blong oli save tingbaot ol filing blong olgeta. Be olsem Kris­tina, we yumi tokbaot long stat, ol yangfala we oli agens plante taem oli mekem olgeta nomo oli harem nogud. “Fasin blong olgeta we oli no gat plante waes, hemia nao samting we bambae i kilim olgeta i ded.” Hemia ol woning we Proveb 1:32 i talem.

Long narafala rod, i nogud blong traem blong fogetem trabol ya—antap moa sipos yu stap harem nogud tumas. Proveb 24:10 i askem se: “?Yu yu letem tingting blong yu i foldaon long dei blong trabol? Paoa blong yu bambae i smol nomo.” Ol trabol soa we yu kasem long ol filing blong yu oli save bitim soa we yu kasem long bodi blong yu. (Proveb 18:14) Mo sipos yu letem oli stap, oli save gohed blong mekem yu yu harem nogud taem yu kam bigman. Tingbaot yangfala man ya we nem blong hem Yohan. Hem i talem se, “Taem mi stap kam bigwan, papa blong mi we i man blong dring alkol i neva mekem wan samting taem mi nidim hem tumas.” Yohan i gohed se: “Hem i tingting tumas long ol prapa trabol blong hem nao i no save lesin long mi.” Taem Yohan i kam bigman, hem i harem nogud blong longtaem from we tingting blong hem i foldaon mo hem i harem se hem i sem.

Wetem help blong sam gudfala fren, Yohan i save stat blong haremgud long tingting blong hem bakegen. Ekspiryens blong hem i soemaot se i impoten blong traem faenem sam gudfala rod blong winim ol trabol we yu save kasem long haos.

Pulum Tufala Blong Soemaot Intres Long Yu

Tingbaot se samtaem papa no mama i no save statem storeyan wetem yu. Ale yu nao yu save statem storeyan we i soemaot se yu intres long tufala. (Matyu 7:12; Filipae 2:4) Askem tufala sipos yu save folem tufala taem oli go samples blong tekem wan samting. Askem olgeta sipos yu save halpem olgeta long sam rod, ating blong rerem kakae no blong klinim ples. Bambae yu save stat blong tokbaot ol wari blong yu, olsem se wanem i stap hapen long skul.

Be samtaem, maet yu gat sam bigfala trabol blong tokbaot. Ating i nogud blong traem storeyan wetem papa taem hem i stap slip long jea, i stap spel afta long strong wok we hem i bin mekem long dei. Traem blong faenem “stret taem”—taem we hem i gat tingting blong spel mo glad—blong tokbaot ol bisnes blong yu. (Proveb 15:23) Ating bambae hem i wantem moa blong soemaot intres blong hem long ol trabol blong yu.

Be, ?olsem wanem sipos papa mama oli no wantem soemaot intres long yu yet, nating se yu traehad blong pulum olgeta?a Proveb 15:22 i mekem yumi tingbaot se, “Olgeta plan blong man oli save foldaon sipos oli no toktok gud tugeta fastaem.” Yes, yu save talemaot long papa mo mama blong yu (long kaen fasin mo wetem ol gudfala rod) se yu harem se oli no soemaot inaf intres long yu mo samting ya i mekem yu yu harem nogud mo yu harem se oli no laekem yu. Maet yu save talem long olgeta se samtaem yu wantem nomo we oli talem sam gudfala toktok blong leftemap tingting blong yu no yu save kasem sam help long olgeta.

Ating papa mo mama blong yu tufala i save sapraes blong save se yu gat tingting olsem. Oli save hareap blong talemaot se oli gat lav long yu mo ating oli save talem sore we oli bin soemaot narafala fasin long yu. Plante taem papa mo mama blong yu bambae tufala i save traehad blong jenisim ol fasin we tufala i bin mekem taem yu talemaot trabol blong yu long olgeta.

Long narafala rod, taem yufala i storeyan long bisnes ya ating bambae yu luksave se yu tu yu bin gat sam rong tingting long saed blong tufala. Ating yu no bin luksave samfala defren kaen rod we oli bin soemaot intres long yu. Nating se i olsem wanem, be fasin blong tokbaot ol bisnes ya i wan impoten rod blong stretem ol trabol long haos.

Kasem Ol Samting We Yu No Gat

?Olsem wanem sipos papa mama blong yu, tufala i no soemaot intres long yu yet? I tru se samting ya i save mekem yu yu harem nogud. Be i gat ol narafala rod we i stap rere blong yu save folem.

Wan eksampel, traem faenem wan man—wan man we i olfala bitim yu—we i save toktok wetem yu long ol samting we yu no save tokbaot wetem papa mama blong yu. Olsem Proveb i talem, i gat wan fren i stap “we i rere blong givhan long taem blong trabol.” (Proveb 17:17) Lukaotem wan fren olsem. Be yu mas traem skelem ol advaes blong hem, yu mas sua se ol advaes ya i stret long ol nid blong yu mo i laenap wetem Tok blong God.

Wan narafala stampa samting we i save givhan long yu mo i save sapotem yu, hemia kongregesen blong ol Wetnes blong Jeova. Long ples ya yu save faenem ol brata mo ol sista long saed blong speret, ol papa mo ol mama we oli save soemaot trufala intres long yu mo oli givhan long yu blong gohedgud long saed blong speret mo long saed blong filing. (Mak 10:30) Kolin, wan yangfala man long Afrika we yumi tokbaot fastaem, i faenem ol fren olsem. Hem i harem se hem i nidim wan man blong lidim hem, ale hem i stat blong go long ol miting blong ol Wetnes blong Jeova. I no longtaem hem i fren wetem ol memba blong kongregesen nao hem i harem se hem i kasem lav we hem i wantem. Long taem ya papa mo mama blong hem mo ol brata mo sista blong hem tu oli stat blong kam long ol Kristin miting.

Ating papa mama blong yu oli rili stap tingbaot yu, be wan samting nomo, ating oli no luksave ol nid blong yu. !Mekem sam samting, mo letem oli save se wanem ol nid ya! ?Hu i save? Ating bambae yu faenemaot se oli intres moa long yu bitim tingting we yu gat.

[Futnot]

[Tok blong pija long pej 23]

Ol papa mo mama tede oli harem nogud long plante samting mo oli taed tumas mekem se oli no save tingbaot ol trabol blong ol pikinini blong olgeta