Wok Blong Wan Dokta
SAMWE long seven yia we i pas finis, Dai Suzuki, wan boe we i gat 10 yia, i lusum laef blong hem from wan akseden long trak. Nyus i talem se i fol blong papa mama blong Dai we oli no keagud long hem, oli folem ol rul blong Baebol, blong no letem blad transfyusen long pikinini blong tufala. Papa mama blong Dai oli Wetnes blong Jeova. Afta we ol polis oli lukluk long bisnes ya, oli talem se i no risen ya se papa mama blong hem oli no keagud.
Ol Wetnes blong Jeova long Japan mo long ol narafala ples oli glad long ol traehad we ol dokta oli stap mekem blong sevem laef blong ol man, mo ol Wetnes oli no wantem wok agens long ol dokta mo olgeta we oli wok long ol haospetal. Oli tekem ol meresin blong tede mo oli akseptem samting we ol dokta mo ol dresa oli save mekem long olgeta, we i no joen wetem blad transfyusen. Be taem wan dokta i wantem mekem wan samting long olgeta we i agensem ol rul blong Baebol we oli stap holemstrong long olgeta, oli lesin long God. (Ol Wok 4:19) Baebol i givim stret loa ya: “Bambae yufala i no kakae blad.”—Ol Wok 15:29.
Ol Wetnes blong Jeova oli no stap spolem bilif blong olgeta long ol loa blong God, taswe oli jusum fasin blong fiksimap ol sik blong olgeta we i no joen wetem fasin blong yusum blad transfyusen. I tru, fasin ya blong gat defren tingting we i no laenap wetem tingting blong ol dokta i save mekem se ol dokta oli mas yusum waes blong olgeta moa blong givhan long ol Wetnes. Be plante moa long ol dokta mo ol haeman long ol haospetal oli stap faenem sam rod we i laenap wetem jus blong ol Wetnes blong Jeova. Wan eksampel, wan nyuspepa long Japan, Mainichi Shimbun, i talem se i no longtaem “sam haospetal oli traehad blong mekem se ol man oli no stap lusum tumas blad mo tu oli rere blong no yusum blad taem oli katem man.”
Haf blong magasin ya i talem se long Ageo Kosei Haospetal, stat long 1989 go kasem Janewari 1992, 14 long ol Wetnes blong Jeova we oli bin katem olgeta from sik oli kamgud nating se oli no tekem blad. Ol dokta long haospetal ya oli lesin long disisin blong ol man. Rul blong hem i blong storeyan wetem ol Wetnes we oli sik, long saed blong hamas blad we wanwan i save lusum mo ol denja we oli stap taem oli katem olgeta mo oli no yusum blad. Taem sikman i saenem wan pepa blong talem se hem nao i tekem ful responsabiliti from disisin blong hem, oli save katem hem from sik ya we oli no yusum blad transfyusen.
?Wanem i mekem se ol dokta long haospetal ya oli akseptem ol Wetnes we oli sik mo respektem ol jus we oli mekem blong fiksimap sik blong olgeta, nating se ol narafala haospetal oli no wantem tekem olgeta? Mainichi Shimbun, i talem tok blong Toshihiko Ogane, daerekta blong haospetal ya, se: “Wok blong dokta i blong respektem raet blong sikman ya blong mekem laswan disisin long ol samting we dokta i wantem mekem long hem mo blong dokta i traem bes blong hem blong mekem ol samting long sikman ya we i laenap wetem disisin blong hem. Pepa we sikman ya i saenem i impoten tumas long bisnes ya.”
Nyuspepa ya i gohed i se, “Long saed blong ol Wetnes blong Jeova, oli gat ol komiti blong olgeta long 53 taon long Japan blong givhan long ol fren blong olgeta we oli bilif. Plan blong olgeta komiti ya, i blong storeyan wetem ol dokta mo haeman blong ol haospetal long saed blong fasin blong katem man we oli no yusum blad.” Samting we i kamaot se, bigfala namba blong ol dokta, ol haospetal mo ol haeman we oli lukaot long sik naoia oli glad blong folem disisin blong ol Wetnes blong Jeova long saed blong rod we oli jusum blong fiksimap ol sik.
Naoia, moa long 1,800 dokta long Japan mo bitim 24,000 dokta raonabaot long wol oli glad blong folem disisin blong ol Wetnes, taem oli yusum ol narafala meresin blong givhan long olgeta, be oli no yusum blad transfyusen. Bitim 800 komiti blong haospetal oli bin storeyangud wetem ol dokta we oli ting se “wok blong wan dokta” i blong respektem ol disisin we man i mekem.