Wom Blong Gini Ol Lasdei Blong Hem

Man blong !Wekap! long Naejiria i raetem store ya

DEI YA i hot, olsem evri dei. Chinyere i fasem bebi blong hem long baksaed blong hem, i tekem tufala drae frut (calabash gourd) we oli yusum skin blong olgeta olsem wan botel, mo i joenem ol narafala man blong velej long rod we i gat plante smok. Oli wokbaot wanples i gokros long wan open ples we san i hot tumas long hem, oli godaon long wan wora, wan ples nomo blong tekem wora long ples ya. Long wora ya woman ya i wokbaot sloslou i godaon long saed blong wora we i gat sofmad mo i glis mo i go insaed long wora blong kasem wora we wora i kam antap kasem long ni blong hem.

Woman ya i luk ol algita we oli stap slip long ol drae gras long saed blong wora mo we oli stap slip aninit long wora ya, be hem i no fraet long olgeta. Wan man we i stanap long saed blong wora i talem se: “Yumi no mekem trabol long olgeta, mo olgeta oli no mekem trabol long yumi.”

Yumi no save talem tok olsemia long ol narafala laef samting we oli stap insaed long wora ya. Chinyere i no save luk olgeta; oli smol tumas. Oli stap insaed long wora we i stap ron i go insaed long samting we hem i stap yusum blong karem wora.

Ol Wom Blong Gini We Oli Denja Tumas

Chinyere i gobak long haos blong hem we wol blong hem oli mekem wetem sofmad mo ruf blong hem oli mekem wetem lif mo hem i kafsaedem wora ya i go insaed long wan graonpot. Afta we ol smosmol doti oli no moa flot, hem i dring. Wan yia biaen hem i luk wan samting daon long leg blong hem we hem i harem olsem wan smol soa long string blong karem blad long leg. Be samting ya i no wan smol soa long string blong karem blad long leg. Wan smol bebet we man i no save luk wetem ae blong hem we i stap insaed long wora we hem i dring i bin kam bigwan, wan wom blong gini we i gat 80 sentimita.

I no longtaem bambae wom ya i mekem wan boela long skin blong hem we i soa tumas. Ale, bambae boela ya i brok, mo sofsof wom ya we i gat kala bambae i stat blong kamaot, tri sentimita no bitim tri sentimita evri dei. Bambae i tekem tu kasem fo wik—ating i go moa—blong hem i kamaot fulwan. Long taem ya, bambae Chinyere i no save mekem wan samting, mo bambae hem i harem i nogud tumas. Boela we i brok finis i save gat doti i go insaed long hem, we i save mekem ol sik ya, tetanus, sepsis, atritis, no wan bigfala boela.

Wan wom nomo i mekem Chinyere i harem nogud, be plante taem wan man i save kasem trabol from plante wom, ating twelef no bitim twelef wom long semtaem nomo. Plante taem oli kamaot daon long leg, be samtaem oli muf mo oli kamaot long narafala haf blong bodi, olsem skin blong hed, long jes, mo long tang.

Be, from we i gat wan bigfala plan blong kilimaot ol wom blong gini, ating bambae i no longtaem oli kilim ol wom ya. Raonabaot long wol, olsem Wol Helt Ogenaesesen i soemaot, naoia wom ya i stap mekem trabol long kolosap tri milyan man nomo, kolosap olgeta ya oli stap long Pakistan, India, mo 17 kantri long Afrika. Kolosap ten yia bifo, hem i kilim kasem ten milyan man. Long Esia, naoia kolosap bambae oli finisim wom blong gini; long plante kantri long Afrika we oli kasem trabol from, maet wok we oli stap mekem bambae i finisim wom ya long en blong 1995.

Wan Longfala Histri

Wom blong gini i bin mekem bigfala trabol long ol man i stat bifo i kam, antap moa long Medel Is mo Afrika. Oli faenem wan wom blong gini taem oli lukluk dedbodi blong wan yangfala gel we i laef long taem bifo long Ijip, we i gat 13 yia. Sore tumas, hem i bin lusum tufala leg blong hem, ating from soa we wom blong gini i mekem long leg blong hem.

I gat plante pruf long ol hanraet blong bifo. Faswan pruf we i tokbaot wom blong gini hemia long wan hanraet blong Ijip. Hem i tokbaot fasin blong fasem wan wom blong gini i goraon long wan stik taem hem i stap kamaot long skin. Bitwin 200 B.K.T. mo 100 B.K.T., wan man Gris, nem blong hem Agatharchides blong Cnidus i raetem se: “Ol sik man we oli kasem sik blong olgeta long Red Si oli harem nogud long plante samting mo oli no save wanem samting we i hapen long olgeta fastaem, wan samting se ol wom, ol smosmol snek, we i kamaot long olgeta, i kakae ol leg mo ol han blong olgeta, mo taem yu tajem, oli gobak insaed, oli go fasem olgeta insaed long ol masel, mo samting ya i mekem man ya i harem i nogud tumas we i no gat wan samting blong blokem soa ya.”

Blong Winim

Tok ya se, “I gud blong blokem wan sik bitim we yu traem blong tekemaot,” i stret blong folem long saed blong sik we wom blong gini i givim, from we i no gat wan meresin. Taem wan man i dring wora we i gat wom blong gini insaed, i no gat wan samting we ol dokta no meresin i save mekem kasem taem we kolosap wom ya i kamaot long skin, bifo we hem i bin kam olsem wan boela. Long taem ya wan dokta we i gat gudhed samtaem i save tekemaot wom ya afta we hem i katem skin smol long saed blong wom long medel blong soa. Ale hem i yusum wan tul we i gat huk long hem blong tekemaot haf blong wom ya, i hivimap olgeta antap long skin. Biaen hem i lukaotgud blong pulumaot ol narafala haf blong wom, i tekem sam menet blong finisim wok ya.

Be, taem wom ya i stat blong kamaot hem wan, soa ya i blokem wom ya blong yu no save pulumaot isi nomo. Ale, kolosap nambawan samting we sik man ya i save mekem, i blong folem fasin blong bifo blong lukaotgud blong mekem wom ya i goraon long wan smol stik taem hem i stap kamaot. Yu mas lukaotgud blong wom ya i no brok. Sipos hem i brok, haf we i stap i gobak insaed long sik man ya mo i mekem man ya i harem nogud, mo i mekem narafala soa.

Ol dokta oli save mekem smol samting nomo blong faetem wom blong gini long bodi blong man we i kasem. Be oli save mekem plante samting blong winim ol wom ya bifo we hem i go insaed long bodi blong man.

Faetem Ol Wom Blong Gini

Wan rod i blong kasem wora we i gud, olsem wora long wel, we wom blong gini i no save stap insaed. Wan narafala rod i blong tijim ol man blong velej blong boelem wora blong olgeta blong dring no blong kafsaedem tru long wan kaliko we i klin. Namba tri samting i blong tekem strong meresin we i no save mekem trabol long ol man no anamol, mo putum i go insaed long reva blong kilim ol wom.

Long ol nesen we sik ya i bigwan yet long olgeta, i gat bigfala wok i stap gohed blong lukaotem ol velej we wom ya i mekem bigfala trabol long olgeta mo blong givhan long ol man ya blong oli blokem sik ya. Kam kasem naoia, ol traehad ya i bin karem bigfala frut. I luk olsem se naoia wom blong gini i kasem ol lasdei blong hem. Mo bambae i no gat wan man i save sore taem ol wom blong gini oli finis.

[Tok blong pija long pej 26]

Yu no mas dring wora we i no klin sipos yu no boelem no mekem i pastru long wan kaliko we i klin fastaem