Holokos Musium Mo Ol Wetnes Blong Jeova

RABIS gavman blong Nasi i kilim i ded plante man we oli no gat fol, antap moa ol man Jyu mo ol man we oli kolem Slav. Be, wan skul—Ol Wetnes blong Jeova—oli no agri nating blong obei long gavman blong Nasi, i no from oli leftemap wan laen no nesen moa bitim narafala, be from strong tingting we oli gat blong folem ol rul blong Baebol.—Jon 17:14, 16.

Gavman blong Nasi i mekem nogud tumas long Ol Wetnes blong Jeova—i kilim plante long olgeta. ?From wanem? From sam bisnes long saed blong skul, ol Wetnes oli no agri blong joen wetem olgeta mo blong wok long ‘Jeman Leba Fran’ mo oli sakemaot eni promes we Hitler i askem olgeta blong mekem long hem olsem Lida blong olgeta. Taswe gavman blong Nasi i putum tabu long wok blong olgeta olsem wan ogenaesesen long Epril 1933. Oli agensem olgeta from oli talem se oli no obei long ol loa we gavman i putum long ol man mo se oli no obei long ol samting we ol jyos oli talem, taswe Ol Wetnes oli stap long medel blong ol faswan grup blong man we oli putum olgeta long ol rabis kalabus. Wan nyuspepa blong musium i talem se, “Biaen, bitim 30,000 Wetnes we gavman blong Nasi i mekem nogud long olgeta.”

Oli dediketem Holokos Memoriol Musium, we i stap long Wasington, D.C., long Amerika, blong givim store blong ol grup blong man, wetem Ol Wetnes blong Jeova tu, we gavman blong Nasi i bin mekem nogud long olgeta. Wan magasin i talem se “bambae ol man Amerika mo ol man we oli kam long ol narafala kantri, we oli blong skul blong ol man Jyu mo Ol Wetnes blong Jeova we gavman blong Hitler i mekem nogud long olgeta from we oli no wantem stap ananit long hem, oli gat spesel intres long musium ya.” Ol samting we ol man nomo oli wokem we oli kipim long musium ya, ol pepa, video we i gat toktok blong ol man we oli bin luk ol samting ya, ol pija blong histri, mo ol sinema blong ol samting we i hapen long taem ya, ol ekspiryens we ol grup blong man we oli no gat fol oli kasem long taem blong faet ya oli stap insaed long musium ya, ples blong putum buk, mo ol store blong olgeta. Musium ya i gat wan video kaset we oli bin toktok wetem 74 Wetnes blong Jeova we gavman blong Nasi i bin mekem nogud long olgeta. Musium ya i open long pablik long Epril 1993.

[Foto Credit Line blong pija long pej 31]

Courtesy of United States Holocaust Memorial Museum