?Yu Yu Bin Tingbaot Samtaem?

?Yu yu bilif se man i gat wan sol we i no save ded, we i stap laef afta we bodi i ded? Plante milyan, no maet plante bilyan man, oli bilif se man i gat wan sol we i go long wan narafala wol no long wan narafala laef taem man i ded, no i go laef insaed long wan anamol no wan narafala samting. ?Baebol i talem wanem long saed blong sol? Bambae yu faenem se ol kwestin we oli kam biaen oli pulum intres blong yu mo bambae oli mekem yu kasem klia save moa. Blong faenem ol ansa, mifala i askem long yu blong jekem ol vas blong Baebol we oli stap long ples ya no lukluk pej 27.

1. ?God i bin wokem Adam long heven no long wol?—Jenesis 1:26-28.

2. ?God i wokem Adam blong hem i save ded, no hem i no save ded?—Jenesis 2:15-17.

3. ?Sipos Adam i no bin brekem loa blong God mo mekem sin, bambae hem i ded?—Rom 6:23.

4. ?Samting we Adam i mekem, i pruvum se hem i save ded, no hem i no save ded?—Jenesis 3:19; 5:5.

5. ?From sin blong hem, Adam i lusum wan hom long wol ya no wan long heven?—Jenesis 1:26-28.

6. ?Sipos Jisas i kam blong stanemap bakegen wanem we Adam i bin lusum, wanem nao bambae i kamgud bakegen?—Ol Sam 37:29; Rom 5:18, 19; Revelesen 21:1-4.

7. ?Olsem wanem, Adam i gat tu haf blong hem, sol mo bodi?—Jenesis 2:7; 1 Korin 15:45.

8. ?Sipos yu bilif se Adam i wan sol mo bodi, wanem haf nao i sin, sol no bodi?—Ol Sam 51:1-4.

9. Sipos yu ansa se, “sol,” ?from wanem nao bodi i mas harem nogud?

10. Sipos yu ansa se, “bodi,” ?from wanem nao sol i mas kasem laef?

11. Sipos wan man i go long heven taem hem i ded, ?samting ya i pruvum se sin mo ded oli blesing, bitim wanem we Baebol i talem se, wan panis?—Rom 5:12; 6:21-23.

12. ?Wanem panis God i givim long Adam from sin blong hem—ded, no gohed blong stap laef long narafala ples?—Jenesis 2:16, 17; 3:19.

13. ?I gat wan panis blong bodi mo narawan blong sol?—Eklesiastis 9:5, 10; Esikel 18:4.

14. ?God i bin tingting blong mekem man i harem nogud blong olwe long helfaea?—Jeremaea 7:31.

15. Long tingting blong Pol, ?wanem pei blong sin?—Rom 6:23.

16. ?Pol i tokbaot fasin blong harem nogud blong olwe long wan helfaea?—Rom 6:7.

17. Sipos i rili gat helfaea, ?from wanem wan man i mas harem nogud blong olwe blong pem sin blong hem we i mekem long laef blong hem we i sot nomo? ?Stret fasin blong God blong jajem man i daon moa long hemia blong man?—Rom 9:14.

18. ?Ol olfala blong bifo oli bilif se oli gat wan sol we maet i go long heven no long bigfala faea blong hel?—Jenesis 37:35; Ol Sam 89:48; Ol Wok 2:34.

19. ?Wanem trufala hop blong ol dedman?—Jon 5:28, 29; 11:23-26; Ol Wok 24:15.

20. Sipos i no gat sol we i gohed blong laef afta ded, ?olsem wanem samfala (144,000) oli save go rul wetem Kraes long heven?—1 Korin 15:42-49, 53, 54; Revelesen 14:1, 4; 20:4.a

?Yu Yu Bin Tingbaot Samtaem? Ol Ansa We Baebol i Givim

Ol vas blong Baebol we oli kam biaen oli sam long ol vas we oli talem finis wetem ol kwestin long pej 23:

1. “God i stat wokem man, i olsem pija blong hem . . . Hem i wokem tufala, man mo woman . . . God i talem long tufala, i se: ‘Yutufala i mas gat pikinini, mo yutufala i mas kam plante blong fulumap wol. Mo yufala i mas mekem wol ya i stap aninit long han blong yufala.’ ”—Jenesis 1:27, 28 NW.

2. “Long olgeta tri long garen, yu yu save kakae long hem, olsem yu yu wantem. Be tri ya blong save wanem samting i gud mo wanem samting i nogud, yu no mas kakae long hem. From we sipos yu yu kakae long hem, long sem dei nomo bambae yu ded tru.”—Jenesis 2:16, 17 NW.

3. “Pei we ol man bambae oli kasem, from we oli stap mekem sin, hemia we bambae oli ded from. Be presen we God i stap givim i go nomo long ol man, hemia laef we i no save finis, from we oli joen long Jisas Kraes, Masta blong yumi.”—Rom 6:23.

4. ‘Long swet blong fes blong yu, bambae yu hadwok blong kasem bred blong kakae, gogo bambae yu yu gobak long graon we yu yu bin kamaot long hem fastaem. From we yu yu graon nomo, mo bambae yu yu gobak long graon.’—Jenesis 3: 19.

5. Lukluk No. 1.

6. “!Yu luk! Naoia God i mekem ples blong hem wetem ol man . . . Hem bambae i ravemaot wora blong ae blong olgeta. Nao bambae i no moa gat man i ded mo man i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”—Revelesen 21:3, 4.

7. “Nao Jeova God i tekem sam graon, i wokem man long hem, mo hem i blu long nus blong man ya, i putum win blong laef long hem. Nao long fasin ya, man ya i kam wan laef ‘sol’.” (Jenesis 2:7 NW) Tok ya “sol” i kamaot long Hibru tok ya neʹphesh, “samting we i pulum win.” “Fas man Adam, olsem Baebol i talem, i kam wan sol we i laef.” Makem, “i kam,” i no “oli givim.”—1 Korin 15:45, The Jerusalem Bible.

8. “Oltaem mi mi savegud ol sin blong mi. Sin ya we mi mekem i agens long yu nomo, mi mi mekem ol samting ya we i nogud tumas long fes blong yu.”—Ol Sam 51:3, 4.

9, 10. I no nidim vas blong Baebol.

11. “Bifo, fastaem olgeta, wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.”—Rom 5:12.

12. Lukluk No. 4.

13. “Ol man we oli laef oli save se bambae oli mas ded. Be ol dedman oli no save wan samting nating. . . From we i no gat wok no plan no save no waes long Seol, ples ya we bambae yu yu go long hem.” (Eklesiastis 9:5, 10) “Sol blong papa i olsem sol blong pikinini tu—olgeta oli blong mi. Sol we i stap mekem sin—hem nao bambae i ded.”—Esikel 18:4.

14. “Mo oli wokem ol hae ples blong Topet . . . blong bonem ol pikinini boe mo ol pikinini gel blong olgeta long faea. Neva mi talem se ol man oli mas mekem wan samting olsemia, mo neva hat blong mi i tingbaot samting ya tu.”—Jeremaea 7:31.

15. Lukluk No. 3.

16. “Taem wan man i ded, man ya i fri. Hem i no moa stap aninit long paoa blong fasin blong sin.”—Rom 6:7.

17. “?Ale, bambae yumi talem olsem wanem? ?Yumi save talem se God i mekem i no stret? !No gat! Hem i mekem i stret nomo.”—Rom 9:14.

18. “Deved, hem i no go antap long heven.”—Ol Wok 2:34.

19. “Mi putum tingting blong mi long God blong luk sem samting ya nomo we olgeta ya oli stap tingbaot. Hemia samting ya, we God bambae i mekem olgeta man oli laef bakegen long ded, ol man we oli stret, wetem ol man we oli no stret.”—Ol Wok 24:15.

20. “From we bodi ya blong yumi we oli blong ded, oli mas jenis blong kam we bambae oli no moa save ded samtaem. Bodi ya blong yumi we oli blong lus oli mas jenis blong kam we bambae oli no moa save lus samtaem.” Sipos man i mas kasem fasin ya we bambae “hem i no moa save ded samtaem,” ale, hem i bon wetem. (1 Korin 15:53) “Nao mi luk, mo antap long bigfala hil ya Saeon, i gat Smol Sipsip blong God i stap stanap. Mo i gat wan handred fotefo taosen man oli stap wetem hem. . . God i pemaot olgeta finis, i tekemaot olgeta long ol narafala man, nao oli fri, oli olsem ol fas kakae blong garen, oli blong givim i go long God mo long Smol Sipsip ya.”—Revelesen 14:1, 4.

[Futnot]