Putum Edukesen Long Stret Ples Blong Hem

WAN man we i gat gudhan blong droem pija, i save mekem se ol pija ya oli luk olsem samting we i rili tru. Ol samting we hem i dro long fored blong pija, hem i mekem oli bigwan moa bitim ol samting we oli stap long medel mo biaen. Samting ya i sem mak long ol samting we yumi ting se oli impoten long laef blong yumi. Sam samting oli moa impoten bitim ol narafala samting.

Jisas Kraes i talem se: “Olgeta we oli luksave se oli nidim ol samting long saed blong speret, oli save haremgud, from we kingdom blong heven i blong olgeta.” (Matyu 5:3, NW) Olsem nao, ol gudfala samting long saed blong speret oli mas stap fasples long laef blong yumi. Ol samting long saed blong bodi oli mas kam long seken ples.

?Nao, edukesen i mas stap long wanem ples long laef blong yumi? Hem i rili wan impoten samting long ol Kristin. Man i nidim blong kasem samkaen mak long edukesen blong folem oda ya blong Baebol we aposol Pol i talem, se: “Man we i no wantem lukaot long olgeta famle blong hem, mo antap moa long hem, we i no save lukaot long olgeta we oli stap long haos blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.” (1 Timote 5:8) Antap long samting ya, blong folem oda we Jisas i givim long ol man blong hem, blong mekem disaepol mo “tijim olgeta blong oli folem olgeta tok ya we [hem] i givim finis long [olgeta],” yumi mas ‘gat save’ nao biaen yumi save tijimgud ol narafala.—Matyu 28:19, 20; Jon 17:3; Ol Wok 17:11; 1 Timote 4:13.

Oraet, be yumi mas putum edukesen long stret ples blong hem. Yumi no mas kasem edukesen jes blong gat bigfala save no blong gat stefeket nomo. Sipos yumi putum edukesen long ples we i hae tumas, samting ya i save mekem yumi harem nogud. I tru, maet hem i save givim sam gudfala samting long saed blong bodi, blong smoltaem. Be waes King Solomon i luksave se: “Yu wok from wan samting wetem olgeta waes, save, mo gudhan blong yu, mo biaen, yu mas livim olgeta samting ya long wan man we hem i no wok from.”—Eklesiastis 2:21, Today’s English Version.

Ol Wetnes blong Jeova oli intres long edukesen, i no jes blong kasem edukesen nomo, be blong kam moa gud long wok blong God mo blong sapotem olgeta wanwan long saed blong mane. Oli no stap kasem pei from Kristin minista wok blong olgeta, taswe plante oli mas wok blong winim mane blong sapotem olgeta. Maet samting ya i wan bigfala traem long ol fultaem Kristin minista blong ol Wetnes blong Jeova, we yumi kolem ol paenia. Oli mas folem wan plan we oli wok strong long Kristin minista wok blong olgeta, mo long semtaem, oli mas kasem naf mane blong olgeta wanwan mo famle blong olgeta, sipos oli mared.a—Proveb 10:4.

Afta we sam Wetnes blong Jeova oli skelemgud ol defren samting we i joen wetem edukesen, oli jusum blong kasem moa edukesen. I tru, oltaem oli mas lukaotgud blong putum edukesen long stret ples blong hem. ?Wanem i givhan long olgeta blong mekem olsem? Wan yangfala blong Brasil we nem blong hem Jon, i talem se: “Sam samting oli givhan long mi. Nating se mi mas stadi long naet, mi no mestem ol Kristin miting. Mo tu, long stat nomo, mi talemaot klia long ol fren blong mi long klas se, mi mi wan Wetnes blong Jeova.”

Eric, we hem tu i blong Brasil, i yusumgud ol jans blong hem blong tokbaot bilif blong hem long ol narafala, taem hem i stap gohed moa long skul blong hem. Hem i talem se: “Mi tingbaot skul olsem wan spesel teritori blong mi blong prij. Mi mekem Baebol stadi wetem sam tija mo studen, we naoia faef long olgeta oli baptaes finis, mo i gat tu we tufala i stap wok olsem elda.”

Richard i gobak blong skul haftaem blong kasem wan stefeket blong wok olsem wan man blong droem plan blong ol haos. Hem i talem se: “Skul blong mi i halpem mi blong faenem wok we i sapotem mi mo waef blong mi. Be i no hemia nomo. Hem i givim wan narafala jans long mi. Taem mi go blong givhan long ol Haos Kingdom we oli bildim kwiktaem nomo, mi toktok wetem ol man we oli lukaot long wok ya, ale mi faenemaot se oli nidim ol man blong droem plan olsem mi.b Naoia mi yusumgud edukesen blong mi blong mekem wok ya. Antap long samting ya, mi mo waef blong mi, mitufala i gat tingting blong wok long fyuja long wol hedkwota no long bigfala wok blong ol Wetnes blong Jeova, blong bildim ol haos raonabaot long wol.”

Long semtaem, plante Wetnes blong Jeova oli wok blong sapotem olgeta mo famle blong olgeta long saed blong mane, be oli no kasem moa edukesen. Mary i eksplenem se: “Mi winim mane blong sapotem mi taem mi wok olsem haosgel blong tu dei long wan wik. Samting we i narakaen se, long wan haoa, mi kasem moa mane bitim sam long ol man we mi wok blong olgeta. Be mi tingbaot wok blong mi olsem wan samting we i halpem mi long wan narafala rod. Wok ya i mekem se mi save gohed long wok blong paenia. Mo mi no harem nogud long disisen ya we mi mekem.”

Steve i gat sem filing olsem. Hem i talem se: “Taem mi stat blong mekem wok blong paenia, samfala oli talem long mi se: ‘?Bambae yu mekem wanem sipos yu mared mo gat pikinini? ?Bambae yu kasem naf mane blong pem ol samting we yu nidim?’ Samting we i kamaot se, mi mekem plante defren wok. Mo samting ya i mekem se mi gat ekspiryens long kolosap olgeta wok we yu save tingbaot. Naoia, mi gat wan waef we mi mas lukaot long ol nid blong hem, be mi faenem se mi stap winim moa mane bitim samfala we oli wok wetem mi, we oli gat stefeket blong kolej.”

Maet sam papa we oli no bilif oli wantem se ol pikinini blong olgeta oli kasem moa edukesen, mo Baebol i soem se oli gat raet blong askem samting ya. Be, taem samting ya i hapen, ol yangfala oli save folem Matyu 6:33, oli save tekem sam kos we oli halpem olgeta blong kam gud moa long wok blong Jeova, no maet kos ya i openem rod long olgeta blong oli joen long fultaem Kristin minista wok taem oli stap yet long skul.

Edukesen We i Bigwan Bitim Ol Narafala Edukesen

Olgeta Wetnes blong Jeova, nating se oli skulgud no oli no skulgud, oli gat wan samting we i sem mak. Oli luksave se edukesen we i moa impoten we man i save kasem tede, i stanap long Tok blong God, Baebol. Jon 17:3 i talem se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” Nomata wanem edukesen wan Kristin i kasem, fasin blong kasem save long Jeova mo Pikinini blong hem, Jisas, i mas stap fasples long laef blong hem.

Ol Kristin blong faswan handred yia oli soem rod. Manaen i wan man we i kasem edukesen wetem ‘Herod ya we i king blong Galili,’ be hem i wok strong long medel blong ol profet mo ol tija blong kongregesen blong Antiok. (Ol Wok 13:1) I sem mak, Pol i skul go kasem mak ya we tede, i olsem edukesen blong yunivesiti. Nating se i olsem, afta we hem i kam wan Kristin, hem i putum trening blong hem long stret ples blong hem. Save we hem i gat long saed blong fasin joen blong ol man, loa, mo histri, hem i no yusum blong mekem ol narafala oli sapraes long bigfala save blong hem, be hem i yusum blong prij long ol defren kaen man.—Ol Wok 16:37-40; 22:3; 25:11, 12; 1 Korin 9:19-23; Filipae 1:7.

Ol man long faswan handred yia, oli no save ol Kristin long taem ya from level blong edukesen blong olgeta. No gat. Plante long olgeta ‘oli no gat nem mo oli no skulgud.’ Oli no bin kasem trening long ol skul blong ol man Jyu. Be samting ya i no minim se oli no gat edukesen. Ol man mo woman ya oli reregud blong givim ansa long ol man from bilif blong olgeta—wan samting we i givim pruf se oli bin kasem edukesen long wan gudfala stampa.—Ol Wok 4:13.

From samting ya, olgeta Kristin oli intres tumas long edukesen. Long semtaem, oli traehad blong ‘jusumaot ol samting we oli moa impoten.’ Taswe oli putum edukesen—mo ol narafala wok—long stret ples blong olgeta.—Filipae 1:9, 10.

[Ol Futnot]

[Bokis blong pija long pej 7]

I Stret Nomo We Hem i Kasem Gudfala Toktok Ya

Wan yia bifo we Matthew i finis long hae skul, hem i tingtinggud olsem wanem hem i save sapotem hem wan taem hem i kam olsem fultaem Kristin minista blong ol Wetnes blong Jeova. Afta we Matthew mo papa mama blong hem oli prea mo tingtinggud long bisnes ya, oli ting se sipos Matthew i kasem moa edukesen, bambae samting ya i givhan long hem blong kasem mak blong hem. Olsem nao, hem i aplae blong kasem wan skolasip.c Man blong givim advaes long skul blong Matthew i raetem wan leta i go wetem pepa ya blong askem skolasip. Hemia nao ol gudfala toktok blong hem:

“Long tu yia haf we oli jes pas, mi haremgud tumas blong stap olsem man blong givim advaes mo fren blong Matthew. Matthew i wan yangfala we laef blong hem i no olbaot . . . Hem i gat bigfala bilif mo strong tingting, mo hem i soemaot ol fasin ya taem hem i joen wetem ol narafala mo long ol samting we hem i mekem.

“Long ol yia we oli pas, Matthew i stap kasem trening blong mekem Kristin minista wok. Wan Kristin minista long jyos blong hem i no kasem pei from wok blong hem. Wok we oli mekem i rili kamaot stanap long lav. Matthew i wan yangfala we i no tingbaot hem wan nomo, i gat fasin blong tingtinggud mo i tingbaot narafala. Skolasip ya i save mekem se man ya blong bilif i gat rod blong sapotem hem wan, taem i gohed long trening blong hem mo long wok ya we i no kasem pei from.

“Blong toktok moa long ol wok we man i no kasem pei from mo ol wok blong halpem ol man long komuniti: Matthew i stap spenem plante haoa blong prij long ol haos wanwan long ol wiken, afta long skul mo long taem blong skul holede. Hem i stap givhan long ol man long komuniti ya mo plante narafala man bakegen. Matthew i soem se hem i save olsem wanem blong lidim narafala mo hem i gat gudhan blong mekem olsem, taem hem i stap mekem Baebol stadi wetem ol yangfala mo ol olfala tu. . . . Hem i naf blong pulum ol man blong mekem wan samting, mo blong halpem olgeta blong kasem mak we oli naf blong kasem. Long klasrum, ol tija oli talem se oltaem hem i pulum ol narafala long ol gudfala rod. Hem i lidim ol storeyan long klasrum mo hem i save mekem ol gudfala toktok. . . .

“Matthew i wan long ol nambawan yangfala we mi haremgud tumas blong givim advaes long hem. Ol fren mo ol tija blong hem tu oli laekem hem mo oli respektem hem. Stretfasin blong hem i nambawan tumas.”

[Futnot]

[Tok pija long pej 9]

Bigfala risen from wanem ol Wetnes blong Jeova oli intres long edukesen, i blong kam moa gud long wok blong God