Yusum Edukesen Blong Presem Jeova
“Man we i stap talem ol tok we i kamaot long hem nomo, hem i stap traem pulum ol man blong oli leftemap nem blong hem. Be man we i wantem pulum ol man blong leftemap nem blong hemia we i sanem hem, hem i man blong tok tru, hem i no man blong gyaman.”—JON 7:18.
1. ?Wetaem mo olsem wanem edukesen i stat?
EDUKESEN i stat bifo we bifo olgeta. Jes afta we Jeova God, Bigfala Tija mo Man blong Givim Save, i wokem fasbon Pikinini blong hem, fasin blong tijim narafala i stat. (Aesea 30:20; Kolosi 1:15) !Pikinini ya i kasem tijing stret long Bigfala Tija hem wan! Long plante taosen yia we Pikinini ya—we biaen i kam Jisas Kraes—i stap kolosap long Papa blong hem, hem i kasem nambawan tijing long saed blong ol fasin, wok, mo stampa tingting blong Jeova God. Biaen, taem Jisas i stap long wol ya olsem wan man, hem i save talem se: “Mi no mekem wan samting nating, mi wan. Mi mi stap talemaot ol samting ya nomo we Papa blong mi i tijim mi finis long hem.”—Jon 8:28.
2-4. (a) ?Folem Jon japta 7, wanem i kamaot long saed blong Jisas long Lafet blong Haos Tapolen long yia 32 K.T.? (b) ?From wanem ol man Jyu oli stap askem kwestin long saed blong save we Jisas i gat blong tij?
2 ?Olsem wanem Jisas i yusum edukesen we hem i kasem? Long tri yia haf, we hem i stap prij long wol ya, hem i no les blong talemaot long ol narafala ol samting we hem i lanem. Be, hem i gat wan impoten risen blong mekem wok ya. ?Wanem risen ya? I gud yumi lukluk long ol tok blong Jisas long Jon japta 7. Long ples ya, hem i eksplenem stampa blong ol tijing blong hem mo bigfala risen blong olgeta.
3 Tingbaot taem ya. Hem i long yia 32 K.T.,a long taem ya we ol lif blong tri oli stap folfoldaon, kolosap tri yia afta we Jisas i baptaes. Ol man Jyu oli hivap long Jerusalem blong mekem Lafet blong Haos Tapolen. Long ol faswan dei blong lafet ya, ol man oli mekem plante toktok long saed blong Jisas. Taem oli kasem medel blong lafet, Jisas i go long haos prea, nao i stat blong tijim ol man. (Jon 7:2, 10-14) Olsem oltaem, hem i pruvum se hem i wan Nambawan Tija.—Matyu 13:54; Luk 4:22.
4 Jon japta 7 vas 15 i talem se: “Nao ol lida blong ol man Isrel oli sapraes tumas, oli talem se ‘?Man ya i save ol samting ya blong Baebol olsem wanem? Hem i no skul long wan tija.’ ” ?Yu yu save from wanem oli askem kwestin olsem? Jisas i no go long skul blong ol tija. !From samting ya, oli ting se hem i no kasem edukesen! Be, i isi nomo long Jisas blong faenem mo ridim ol defren haf blong ol Tabu Hanraet. (Luk 4:16-21) !Yes, kapenta ya blong Galili i tijim olgeta tu long Loa blong Moses! (Jon 7:19-23) ?Olsem wanem hem i save mekem samting ya?
5, 6. (a) ?Olsem wanem Jisas i eksplenem stampa blong ol tijing blong hem? (b) ?Jisas i yusum edukesen blong hem long wanem rod?
5 Long vas 16 mo 17, Jisas i eksplenem se: “Ol tok ya we mi stap tijim ol man long hem, oli no blong mi nomo, oli kamaot long hemia we i sanem mi. Mo sipos wan man i save mekem tingting blong hem i strong blong mekem ol samting we God i wantem, hem bambae i faenemaot we tok ya blong mi i kamaot long God, no i kamaot long mi nomo.” !Oli wantem save se hu i tijim Jisas, mo hem i talem klia long olgeta se God nao i tijim hem!—Jon 12:49; 14:10.
6 ?Jisas i yusum edukesen blong hem olsem wanem? Long Jon 7:18, Jisas i talem se: “Man we i stap talem ol tok we i kamaot long hem nomo, hem i stap traem pulum ol man blong oli leftemap nem blong hem. Be man we i wantem pulum ol man blong oli leftemap nem blong hemia we i sanem hem, hem i man blong tok tru, hem i no man blong gyaman.” !I stret nomo we Jisas i yusum edukesen blong hem blong presem Jeova, “Hemia we i gat olgeta save”!—Job 37:16.
7, 8. (a) ?Yumi mas yusum edukesen long wanem rod? (b) ?Wanem fo frut we oli mas kamaot long wan edukesen we yumi skelemgud?
7 Olsem nao, yumi lanem wan nambawan samting long eksampel blong Jisas: Yumi mas yusum edukesen, i no blong leftemap nem blong yumi wan, be blong presem Jeova. I no gat wan narafala rod we i moa gud blong yusum edukesen blong yumi. ?Ale, olsem wanem yu save yusum edukesen blong presem Jeova?
8 Givim edukesen i minim se “givim trening long wan man tru long ol tok, mo lanem hem blong mekem wan samting, olsem, blong gat gudhan long wan samting, lanem wan spesel wok, no wan wok we i hae.” Naoia, bambae yumi luk fo impoten frut blong edukesen we yumi skelemgud, mo olsem wanem blong yusum wanwan long ol frut ya blong presem Jeova. Edukesen we yumi skelemgud i givhan long yumi (1) blong ridgud, (2) blong raetgud, (3) blong kasem moa save mo wokem ol gudfala fasin, mo (4) blong kasem gudfala trening we yumi nidim blong mekem wok evri dei long laef blong yumi.
Lanem Blong Ridgud
9. ?From wanem i impoten blong ridgud?
9 Faswan samting se: Lanem blong ridgud. ?From wanem i impoten blong ridgud? The World Book Encyclopedia i eksplenem se: “Fasin blong rid . . . i impoten tumas blong givhan long wan man blong lanem samting, mo i wan samting we hem i nidim tumas long evri dei laef. . . . Fasin blong ridgud i givhan long ol man, olsem wan grup, blong oli save wokem mo kasem plante gudfala samting. Long semtaem, laef blong olgeta wanwan i gat moa mining, mo oli haremgud moa.”
10. ?Olsem wanem fasin blong ridim Tok blong God i givhan blong mekem laef blong yumi i gat moa mining mo blong yumi haremgud moa?
10 !Sipos fasin blong ridim ol buk i save givhan long yumi blong mekem laef blong yumi i ‘gat moa mining, mo yumi haremgud moa,’ ale samting ya i tru moa taem yumi ridim Tok blong God! Fasin blong ridim Tok blong God i openem maen mo hat blong yumi blong kasem save long ol tingting blong Jeova mo long ol bigfala samting we Jeova i wantem mekem. Nao, klia save long ol samting ya i mekem se laef blong yumi i gat mining. Antap long hemia, Hibrus 4:12 i talem se: “Tok blong God i wan samting we i laef, mo we i stap wok.” Taem yumi ridim Tok blong God mo tingting dip long hem, yumi kam kolosap moa long Hemia we i Stampa blong Tok ya, nao bambae yumi wantem blong jenisim laef blong yumi blong mekem Hem i glad moa long yumi. (Galesia 5:22, 23; Efesas 4:22-24) Mo tu, ol nambawan trutok ya we yumi ridim, bambae yumi wantem serem olgeta wetem ol narafala. Ol wok ya bambae oli presem Bigfala Tija, Jeova God. !I tru, i no gat wan rod we i moagud blong yusum fasin ya blong ridgud!
11. ?Wanem i joen wetem wan gudfala program blong mekem stadi wanwan?
11 Nating se yumi yangfala no yumi olfala, yumi mas lanem blong ridgud. Fasin blong rid i mekem wan impoten wok long Kristin laef blong yumi. Antap long fasin blong ridim Tok blong God oltaem, yumi mas gat wan gudfala program blong stadi wanwan. Samting ya i minim se yumi mas ridim vas blong Baebol long smol buk ya Ridimgud Ol Tok Blong Baebol Evri Dei, stadi long Wajtaoa mo Wekap! we oli stap kamaot, mo rerem ol Kristin miting. ?Olsem wanem long Kristin wok blong talemaot gud nyus? I klia se, blong talemaot gud nyus long olgeta man, blong visitim bakegen olgeta we oli intres, mo blong mekem ol Baebol stadi, yumi mas ridgud.
Lanem Blong Raetgud
12. (a) ?From wanem i impoten blong lanem blong raetgud? (b) ?Wanem wok blong raetem buk we i bigwan moa long histri blong man?
12 Namba tu frut blong edukesen we i skelgud se: Hem i mas givhan long yumi blong lanem blong raetgud. Fasin blong raet i no soem nomo ol tok mo ol tingting blong yumi. Be hem i blong mekem tu se ol tok mo tingting blong yumi oli save stap longtaem. Plante handred yia bifo, 40 man Jyu oli yusum papirasb mo skin blong sipsip mo nani blong raet long hem. Biaen, ol tok ya we oli raetemdaon oli kam haf blong Baebol we i kamaot long God. (2 Timote 3:16) !I tru, wok blong raetem Baebol i bigwan moa bitim ol narafala wok blong raetem buk! I klia se long ol handred yia we oli pas, Jeova i lidim wok ya blong mekem kopi mo blong mekem moa kopi bakegen blong ol tabu tok ya. Taswe, ol tabu tok ya i kasem yumi tede mo yumi save trastem ol tok ya. ?Yumi glad se Jeova i no dipen long ol man blong talemaot ol tok blong hem nomo, be i mekem se oli raetemdaon ol tok ya tu?—Skelem wetem Eksodas 34:27, 28.
13. ?Wanem i soem se ol man Isrel oli save raet?
13 Bifo, sam spesel grup blong man nomo, olsem ol tija blong loa blong Mesopotamia mo Ijip, oli save rid mo raet. Nesen blong Isrel i defren olgeta long ol narafala nesen, from we long Isrel, evriwan oli mas rid mo raet. Long Dutronome 6:8, 9, ol man Isrel oli kasem wan loa se oli mas raet long pos blong doa blong haos blong olgeta. Nating se hemia i wan pijatok, hem i soem se ol man Isrel oli save raet. Taem ol pikinini oli smol nomo, papa mama i tijim olgeta blong raet. Sam man blong stadi oli talem se Gesa Kalenda, hemia wan long ol Hibru hanraet we i olfala moa, maet hem i wok blong wan skul boe we i raetemdaon ol samting we hem i save tingbaot.
14, 15. ?Yumi save yusum fasin blong raet long wanem rod we i gud mo waes?
14 ?Be olsem wanem blong yusum fasin blong raet long rod we i gud mo i waes? Hemia taem yumi stap raetemdaon ol bigfala poen long ol Kristin miting, mo long ol asembli. Wan leta we yumi raetem, nating se i “smol,” i save leftemap tingting blong wan man we i sik, mo i save talem tangkyu long wan Kristin brata no sista we i kaen long yumi no i tekem yumi i go long haos blong hem. (1 Pita 5:12) Sipos wan brata no sista long kongregesenc i lusum wan we hem i laekem tumas long ded, wan sotfala leta no kad i save talemaot toktok blong yumi blong ‘mekem tingting blong hem i strong bakegen.’ (1 Tesalonaeka 5:14) Wan Kristin sista we mama blong hem i ded from kansa, i eksplenem se: “Wan fren i raetem wan naesfala leta long mi. Samting ya i givhan long mi bigwan, from we mi save ridim leta ya bakegen mo bakegen.”
15 Wan nambawan rod blong yusum fasin ya blong raet, hemia blong presem Jeova tru long ol leta we yumi raetem blong givim wetnes long saed blong Kingdom. Samtaem maet yumi nidim blong raet i go long ol man we oli intres long trutok, we oli stap farawe long bus. Mo tu, maet sik i mekem se i hadwok long yu blong go prij long ol haos wanwan. Ale, maet wan leta i save talemaot ol samting we bambae yu talem sipos yu stanap fored long doa blong wan man.
16, 17. (a) ?Wanem store i soem nambawan frut we i kamaot from fasin blong raetem leta blong givim wetnes long saed blong Kingdom? (b) ?Yu yu save talem wan store olsemia?
16 Tingbaot wan store. Plante yia bifo, wan Wetnes i raetem wan leta we i givim wetnes long saed blong Kingdom, nao i sanem i go long wan wido we oli talemaot long nyuspepa se hasban blong hem i ded. Wetnes ya i no kasem wan ansa. Ale, long Novemba 1994, bitim 21 yia biaen, Wetnes ya i kasem wan leta long gel blong woman ya. Gel ya i raetem se:
17 “Long Epril 1973, yu bin raetem wan leta long mama blong mi blong leftemap tingting blong hem afta we papa blong mi i ded. Long taem ya, mi mi gat naen yia. Mama blong mi i stadi long Baebol, be kam kasem naoia, hem i no kam wan man blong Jeova. Be biaen, stadi ya i mekem se mi kasem save long trutok. Long 1988, mi stat blong stadi long Baebol—15 yia afta we Mama i kasem leta blong yu. Long Maj 9, 1990, mi mi baptaes. Tangkyu tumas long leta ya we yu sanem long mama blong mi plante yia bifo. Mo mi glad tumas blong talemaot long yu se, wetem help blong Jeova, ol sid we yu planem oli gru. Mama blong mi i givim leta blong yu long mi blong holem i stap, mo mi bin wantem save se yu yu hu. Mi hop se yu kasem leta ya.” Leta blong gel ya, we insaed i gat adres mo telefon namba blong hem, i kasem Wetnes ya we i bin raet long mama blong hem plante yia bifo. !Tingbaot bigfala sapraes blong yangfala woman ya taem Wetnes ya—we i stap raetem ol leta yet blong serem hop blong Kingdom wetem ol narafala—i telefon long hem!
Gru Long Saed Blong Save, Ol Gudfala Fasin, Mo Speret
18. Long taem blong Baebol, ?olsem wanem ol papa mo mama oli tijim ol pikinini blong olgeta blong gat save mo gudfala fasin?
18 Namba tri frut blong edukesen we yumi skelemgud se: Hem i mas givhan long yumi blong gat moa save mo wokem ol gudfala fasin. Long tingting blong ol man long taem blong Baebol, papa mo mama nao i mas trenem ol pikinini blong gat save mo ol gudfala fasin. Oli tijim ol pikinini blong rid mo raet, be i no hemia nomo. Samting we i moa impoten se, oli tijim olgeta long Loa blong God, we oli mas folem long olgeta wok we oli mekem long laef. Taswe, edukesen i minim tu se, tijim pikinini long ol wok we oli mas mekem long saed blong wosip, ol rul blong mekem wan gudfala mared, fasin joen insaed long famle, ol rul long saed blong seks, mo fasin we oli mas soemaot long ol man raonabaot long olgeta. Edukesen ya i givhan long olgeta blong gat moa save mo blong gat gudfala fasin. Be tu, i givhan long olgeta blong gru long saed blong speret.—Dutronome 6:4-9, 20, 21; 11:18-21.
19. ?Weples yumi save faenem edukesen we i tijim yumi long ol nambawan fasin blong laef mo i givhan long yumi blong gru long saed blong speret?
19 ?Olsem wanem tede? I impoten blong skulgud. Edukesen i givhan long yumi blong gat moa save. ?Be weples yumi save kasem edukesen we bambae i soem long yumi ol nambawan fasin blong folem long laef, mo ol fasin we bambae oli givhan long yumi blong gru long saed blong speret? Long Kristin kongregesen, yumi save joen long wan program blong tiokratik edukesen. Yu no save faenem program ya long wan narafala ples long wol. !Taem yumi mekem stadi wanwan long Baebol mo long ol buk we oli stanap long Baebol, mo yumi kasem ol tijing long ol miting blong kongregesen mo ol asembli, yumi stap kasem nambawan edukesen ya—edukesen we God i givim—mo yumi no pem! ?Samting ya i tijim yumi long wanem samting?
20. ?Edukesen we God i givim i tijim yumi long wanem samting, mo wanem frut i kamaot from?
20 Taem yumi stat blong stadi Baebol, yumi lanem ol impoten tijing blong hem, ‘ol stampa tijing.’ (Hibrus 6:1) Taem yumi gohed blong stadi, yumi stap tekem “strong kakae”—hemia, ol dip trutok. (Hibrus 5:14) Be antap long hemia, yumi stap lanem ol rul blong God. Ol rul ya, oli tijim yumi olsem wanem blong mekem laef blong yumi i laenap wetem samting we God i wantem. Eksampel, yumi lanem blong blokem ol fasin mo ol wok blong bodi we oli ‘mekem yumi doti long fes blong God.’ Yumi lanem tu blong gat respek long ol haeman, long ol narafala man mo long olting blong olgeta. (2 Korin 7:1; Taetas 3:1, 2; Hibrus 13:4) Antap long samting ya, yumi luksave from wanem i impoten blong tok tru oltaem, mekem i stret mo wok strong long wok blong yumi, mo from wanem i impoten blong folem ol rul blong Baebol long saed blong seks. (1 Korin 6:9, 10; Efesas 4:28) Taem yumi stap gohed moa blong mekem ol rul ya oli wok long laef blong yumi, yumi gru long saed blong speret. Nao fasin fren blong yumi wetem Jeova i kam strong moa. Mo tu, ol gudfala fasin blong yumi oli mekem yumi kam ol gudfala manples, nomata weples yumi stap long hem. Mo samting ya i save pulum ol narafala blong leftemap nem blong Hemia we i Stampa blong edukesen long saed blong ol gudfala fasin—Jeova God.—1 Pita 2:12.
Trening We i Wokgud Long Evri Dei Laef
21. ?Long taem blong Baebol, ol pikinini oli kasem wanem trening blong evri dei laef?
21 Namba fo frut blong edukesen we yumi skelemgud se: Man i mas kasem trening we i save wokgud long evri dei laef blong hem. Long taem blong Baebol, wok blong papa mo mama blong tijim pikinini, i minim tu se tufala i mas trenem olgeta blong mekem sam wok. Oli tijim ol gel blong gat gudhan blong mekem ol wok long haos. Laswan japta blong Proveb i soem se ol gel oli mas mekem plante defren kaen wok. Taswe, oli mas lanem blong somap, wivim ol samting olsem mat mo basket, kukum kakae, lukaot long famle, mekem bisnes, pem mo salem ol samting olsem graon no haos. Ol papa oli tijim ol boe blong mekem sem wok olsem olgeta. Maet wok ya i blong wokem garen no wan spesel wok no blong gat gudhan long wan spesel samting. Jisas i lanem blong wokem haos from Josef, papa blong hem long wol ya. Taswe ol man oli no kolem hem nomo se “pikinini blong man ya blong wokem haos,” be oli kolem hem tu se “man blong wokem haos.”—Matyu 13:55; Mak 6:3.
22, 23. (a) ?Edukesen i mas rerem ol pikinini blong mekem wanem? (b) ?Wanem i mas pusum yumi blong jusum moa edukesen sipos i luk olsem we i nidim?
22 Tede tu, wan edukesen we yumi skelemgud, i mekem man i rere blong lukaot long ol samting we maet famle i nidim biaen. Ol tok blong aposol Pol long 1 Timote 5:8, oli soem se wok ya blong lukaot long famle i wan tabu wok. Hem i raetem se: “Man we i no wantem lukaot long olgeta famle blong hem, mo antap long hem, we i no save lukaot long olgeta we oli stap long haos blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.” Taswe, edukesen i mas rerem ol pikinini from ol wok we bambae oli mekem long laef blong olgeta, mo mekem oli kam naf blong wok strong long ples blong olgeta.
23 ?Yumi mas skul go kasem wanem mak? Samting ya i dipen long ol kantri wanwan. Be blong kasem wan wok, sipos i nidim moa edukesen bitim we loa i talem, ol papa mo mama nao oli mas lidim pikinini blong olgeta blong mekem disisen se bambae i kasem moa edukesen mo trening, no no gat. Oli mas skelem gudfala frut mo nogud frut we i save kamaot sipos pikinini i jusum blong kasem moa edukesen. ?Be wanem i mas pusum wan man blong kasem moa edukesen sipos i luk olsem se i nidim? I no blong hem i kasem ol rij samting, haenem, mo ona, no gat. (Proveb 15:25; 1 Timote 6:17) Tingbaot samting we yumi lanem long eksampel blong Jisas: Yumi mas yusum edukesen blong presem Jeova. Sipos yumi jusum blong kasem moa edukesen, samting we i mas pusum yumi se, yumi wantem gat naf samting blong sapotem laef blong yumi, nao yumi save mekem wok blong Jeova fulwan long Kristin wok blong prij.—Kolosi 3:23, 24.
24. ?Yumi lanem wanem long eksampel blong Jisas we yumi no mas fogetem?
24 From samting ya, i gud we yumi traehad oltaem blong kasem edukesen we yumi skelemgud. Yumi mas yusumgud program blong edukesen we i stap gohed oltaem, we God i givim blong tijim ol man. Ogenaesesen blong Jeova nao i stap givimaot program ya. Mo yumi no mas fogetem nambawan samting we yumi lanem long eksampel blong Jisas Kraes, man we i skulgud bitim ol narafala man long wol. !Yumi mas yusum edukesen, i no blong leftemap yumi wan, be blong presem bigfala Tija ya we i hae olgeta, Jeova God!
[Ol futnot]
a K.T. i minim Kristin Taem
b Wan kaen gras we oli yusum blong mekem pepa long taem bifo.
c Wan grup blong man we oli joen wanples blong wosip.
?Wanem Ansa Blong Yu?
◻ ?Olsem wanem Jisas i yusum edukesen blong hem?
◻ ?From wanem i impoten blong lanem blong ridgud?
◻ ?Olsem wanem blong yusum fasin blong raetgud blong presem Jeova?
◻ ?Olsem wanem edukesen we God i givim i save givhan long yumi blong wokem ol gudfala fasin mo blong gru long saed blong speret?
◻ ?Wanem trening blong evri dei laef i mas joen wetem edukesen we i skelgud?
[Bokis blong pija long pej 13]
Wan Samting We i Save Givhan Long Ol Tija
Long ol Distrik Asembli “Ol Hapi Man Blong Presem God” long yia 1995 go kasem 1996, Watch Tower Sosaeti i soemaot wan nyufala buklet we nem blong hem Jehovah’s Witnesses and Education. Buklet ya we i gat 32 pej long hem, mo i stap long kala, oli wokem blong ol tija. Naoia oli tanem i go long 58 lanwis finis.
?From wanem oli wokem wan buklet blong ol tija? Blong halpem olgeta blong kasem save moa long bilif blong ol pikinini blong ol Wetnes blong Jeova, we oli stap tijim olgeta. ?Wanem i stap insaed long buklet ya? Long wan fasin we i klia blong kasem save long hem mo we i leftemap tingting, buklet ya i eksplenem tingting blong yumi long saed blong hae edukesen, betde mo Krismas, mo fasin blong salut long flag blong kantri. Buklet ya i soemaot long ol tija se yumi wantem ol pikinini blong yumi blong yusumgud olgeta jans we oli gat blong skulgud, mo se yumi rili wantem joengud wetem ol tija, mo soem intres long edukesen blong ol pikinini blong yumi.
?Olsem wanem yumi save yusum buklet ya Education? From we oli wokem buklet ya blong ol tija, yumi save givim long ol tija, ol hedmasta, mo ol narafala man we oli wok long saed blong edukesen. I gud sipos buklet ya i save givhan long olgeta tija blong kasem save long tingting mo bilif blong yumi, mo from wanem samtaem yumi wantem mekem i defren long ol narafala. Ol papa mama oli save yusum ol poen long buklet ya taem oli storeyan wetem ol tija blong ol pikinini blong olgeta.
[Tok Blong Pija Long Pej 10]
Long Isrel bifo, oli tinghevi tumas long edukesen