Lukluk Moa Long Krokodael
MAN BLONG WEKAP! LONG KENYA I RAETEM STORE YA
WAN turis blong Amerika i stap hareap blong tekem sam foto blong ol hipopotamus kolosap long wan reva we nem blong hem Mara. Nao wantaem nomo, hem i glis long sam ston mo i foldaon i go insaed. Samting ya i pulum ae blong wan krokodael, wan bigfala anamol we skin blong hem i strong, we i stap slip long san long taem ya. Kolosap oltaem, anamol ya i stap kakae fis. Be long ae blong hem, gudfala pis mit ya i olsem wan kakae we hem i no save livim i stap. Kwiktaem nomo, hem i glis i godaon long wora blong faenem samting ya we hem i luk. !Laki nomo, turis ya i luk we krokodael ya i stap kam, ale hem i kamaot long reva ya—kwik tumas, i olsem se hem i wokbaot antap long wora stret!
Ol man we oli go luk ol reva, ol lek, mo ol hol we oli fulap long sofmad mo wora long Afrika, oli save luk ol krokodael. Be long saed blong turis ya we i kasem wan bigfala fraet, ating hem i kam kolosap tumas. Kenya hem i ples we krokodael blong Nael i laef long hem. Long lanwis blong ples ya, Swahili, oli kolem hem mamba. Ol krokodael oli naf blong gru go kasem 7 mita long. Oli blong famle blong ol anamol we oli wokbaot long ol sot leg, olsem ol bigae. Mo oli save muf kwik antap long graon mo long wora tu. Long wora, oli save spid bigwan, from we tel blong olgeta i flat lelebet olsem wan parel. !Oli swim long wan spid we i save kasem 40 kilomita long wan haoa! Mo plante taem oli stap aninit long wora blong tu no tri haoa. Long graon, oli ron kwik tumas blong smoltaem, ale oli stop, afta, oli ron kwik bakegen, mo oli gohed olsem.
Taswe yumi no sapraes se Baebol i tokbaot krokodael olsem wan eksampel blong soemaot wok blong God we i save mekem man i fraet, hemia we oli kolem Levaeatan. Job 41:8, 10 i talem se: “Putum han blong yu antap long [Levaeatan]. Tingbaot faet ya. Yu no mas mekem bakegen. . . . I no gat wan man we i no fraet blong mekem hem i kros.” !Woning ya i rili waes! !Folem tok blong buk ya The Fascination of Reptiles, we man ya Maurice Richardson i raetem, krokodael i bin kakae sam bot we oli gat enjin tu! Job 41:25 i talem stret se: “Taem hem i girap, ol strong man oli fraet; oli sapraes tumas, ale tingting blong olgeta i fasfas.”
?From wanem ol man oli ronwe wetem fraet taem oli luk anamol ya we i gat ol bigfala skel long skin blong hem? Vas 14 i eksplenem wan risen se: “?Hu i bin openem doa blong fes blong hem? Olgeta tut blong hem oli mekem man i fraet.” Long maot blong krokodael, antap mo daon, i save gat 24 tut, sam bigwan mo sam smol. Oltaem long laef blong hem, i gat ol nyufala tut oli kamaot blong tekem ples blong ol olfala wan. Yumi intres blong save, se taem krokodael i satem maot blong hem, namba fo tut daon i go insaed long wan hol we i stap afsaed long maot blong hem antap, mo yumi save luk tut ya klia nomo. Samting ya i halpem yumi blong luksave se hem i defren long kasen blong hem, algita. !Be wan problem nomo! !Yu no mas kam kolosap tumas blong luk tut ya, from we maet bambae yu faenem se yu stap lukluk olgeta tut blong krokodael ya insaed long maot blong hem!
Taswe, maet yu laekem moa blong lukluk krokodael long wan ples we i sef blong lukluk. I gat plante ples long Kenya we yu save lukluk olgeta, olsem Velej blong Mamba. Hem i wan ples long Mombasa we oli stap kipim ol krokodael long ol yad, ale oli fidim mo lukaot long olgeta.
Maet yu askem se, ‘Be, ?from wanem ol man ya oli wantem lukaot long ol krokodael?’ Wan risen, hemia blong blokem ol krokodael blong oli no lus olgeta. Ol krokodael we oli ron fri, oli gat 99 pesen jans blong ded long faswan yia nomo blong laef blong olgeta. Ol lesed we oli kolem monita, ol pijin we oli kolem marabu stok, mo sam man tu, oli laekem kakae ol eg blong krokodael mo ol smol bebi blong hem. Be, long spesel ples we oli kipim ol krokodael, 10 pesen jans blong hem blong ded i godaon long 2 pesen nomo. Long wan yia, ol smol krokodael oli save gru kasem wan mita haf—bigwan naf blong ronemaot ol samting we oli denja long olgeta. Ol krokodael we oli ron fri, i tekem tri yia blong oli kasem sem saes olsem olgeta we ol man oli stap lukaot long olgeta.
Long ol spesel ples ya blong lukaot long ol krokodael, oli fidim krokodael blong salem tu. Long plante stoa long olgeta ples long wol, yu save faenem ol sus, strap, basket, mo narafala samting we oli mekem wetem sofsof skin aninit long bel blong krokodael. Evri yia, Velej blong Mamba i stap sanem raonabaot 2,000 skin olsem, i go long ol narafala kantri, olsem Itali mo Franis, blong oli wokem. ?Olsem wanem long ol narafala haf blong bodi blong anamol ya? Long Kenya, oli yusum mit blong krokodael olsem kakae we ol turis oli save testem.
Stat long manis Oktoba go kasem Epril, hem i taem blong ol krokodael blong karem pikinini. Wan woman krokodael we i ron fri, i save putum samwe 20 go kasem 80 eg. Long sem taem, ol woman krokodael we ol man oli stap lukaot long olgeta, bambae oli putum samwe 36 eg long ol defren ples raonabaot long ol smosmol wora. Afta, ol man oli pikimap ol eg ya mo putum i go long sam spesel ples we oli hot, gogo kasem taem we ol bebi oli kamaot. Samting ya i tekem raonabaot tri manis.
Velej blong Mamba i givim wan gudfala jans long ol man blong lukluk ol anamol ya long wan sef ples. Hem i stap long wan pis graon we fastaem i wan bigfala hol blong digim ol ston, we i gat 8 hekta long hem. Oli mekem ples ya i kam wan spesel ples blong lukaot long ol krokodael, wetem wan garen we i gat ol defren kaen flaoa, wan wora we i gat ol defren kaen fis long hem, mo wan ples we ol man oli save kam pleplei long hem tu. I gat bitim 10,000 blong ol anamol ya long ples ya. I tru se bambae yu no save luk olgeta evriwan. Be, long tufala ples we oli kipim ol krokodael we oli karem pikinini, bambae yu save luk bitim wan handred bigfala krokodael. Mo long ol narafala ples, i gat plante handred smol krokodael we oli gat ol defren saes mo yia.
Long taem blong kakae, ol krokodael ya oli mekem wan pleplei stret. Samfala oli jyamaot long wora blong karem mit we i stap hang antap long wora. Long pija ya, yu save luk wan bigfala krokodael we oli kolem ‘Bigfala Papa.’ Hem i bin mekem plante man oli fraet raonabaot long Reva we nem blong hem Tana. Mo hem i kilim i ded faef man, bifo we oli kasem hem mo karem hem i kam long spesel ples ya. Sipos yu fraet tumas blong lukluk ol krokodael stret long fes blong olgeta, yu gat jans blong luk pija blong olgeta long wan ples we oli stap soem video long hem.
Taem yu lukluk moa long krokodael, maet samting ya i save mekem yu yu sapraes, no maet i mekem yu yu fraet. Be, bambae yu kasem save from wanem Baebol i talem long Job 41:34, long saed blong krokodael, se: “Hem i king antap long olgeta bigfala wael anamol.”
[Tok Blong Pija Long Pej 17]
Raetsaed: Velej blong Mamba
[Tok Blong Pija Long Pej 17]
En blong Raetsaed: Long taem blong kakae, wan krokodael i jyamaot long wora blong karem mit