Krokodael Blong Solwota King Blong Ol Lesed
MAN BLONG WEKAP! LONG PALAU I RAETEM STORI YA
PLANTE kantri oli bin raorao se hu i gat raet blong rul antap long ol smosmol aelan blong Palau, long Solwota blong Pasifik. Faswan gavman we i rul antap long ol aelan ya, we oli stap 890 kilometa long is blong Filipin, hemia gavman blong Spen. Samtaem biaen, gavman blong Jemani i tekem ples blong Spen, mo biaen bakegen, Japan i tekem ples blong Jemani. Afta long Japan, Yunaeted Stet i tekemaot ol aelan ya mo i rul long olgeta kam kasem 1994. Long yia ya, Ripablik blong Palau i stanemap prapa gavman blong hem.
Be, long olgeta taem ya we ol kantri oli stap raorao se hu bambae i rulum ol aelan ya, i gat wan narafala rul i stap gohed we neva i gat raorao long hem. ?Hemia rul blong hu? Hem i rul blong krokodael blong solwota—king blong olgeta famle blong lesed we oli stap long Palau. Be, tede, rul blong krokodael ya i stap kam slak. Yes, sam man we oli stadi long bisnes ya oli talem se, “sipos man i no tekem aksin naoia blong protektem ol [krokodael ya blong solwota], i no longtaem bambae oli ded evriwan mo yumi no moa save faenem olgeta long ol aelan blong Palau.”
?From wanem ol krokodael blong Palau oli stap long denja? ?Mo from wanem yumi save talem se oli king blong olgeta lesed?
!Wan Maot We i Bigwan!
Nem we ol man blong sayens oli givim long krokodael blong solwota hemia Crocodylus porosus, we i minim “wan krokodael we i fulap long strong skin.”a Nem ya i laenap wetem olgeta lam we oli stap antap long fes blong hem. Ol lam ya oli olsem ol smosmol hil we oli laen i stat long ae blong hem i go kasem nus blong hem. Maot blong hem, we i longfala, i mekemap klosap fotin pesen blong bodi blong hem. !Wan krokodael, we oli putum long Musium blong Palau, i gat wan bigfala hed we saes blong hem i kasem 40 sentimita stat wan saed i go kasem narasaed!
Taem maot blong krokodael i open, yu save luk ol tut blong hem we oli sap olsem sisis. Ol tut ya oli fasgud long maot blong krokodael ya we i save sat wantaem nomo wetem bigfala paoa we i naf blong brekem samting. Wan samting nomo se, ol masel we oli blong openem maot blong krokodael oli slak, mekem se hem i no save openem maot blong hem kwiktaem. Wan buk i talem se wan smol lastik nomo i naf blong holem maot blong wan krokodael blong tu mita, i satgud.
Wokem Long Nambawan Fasin
Hed blong krokodael i bigwan, be tu, hem i spesel blong laef aninit long wota. Lukluk gud long wan pija blong krokodael mo bambae yu luk se sora, ae, mo hol blong nus blong hem oli stap long haf blong hed blong hem we i hae. Taem krokodael i stap aninit long wota, sora ya wetem ae mo nus blong hem oli kamaot antap long wota. Narakaen samting se, nomata we krokodael i sarem maot blong hem, wota i save kam insaed from we hem i no gat skin blong kavremap tut blong hem. Be wota ya i no save ron i godaon long trot blong hem from we wan samting olsem wan doa, i blokem rod we i godaon long trot. Taem krokodael i pulum win tru long nus blong hem, win ya i pastru long paep we i stap biaen long doa ya long trot blong hem, mekem se krokodael ya i save pulum win nating se maot blong hem i fulap long wota.
?Olsem wanem krokodael i save luk samting taem hem i stap aninit long wota? Hem i no gat problem long saed ya. Taem krokodael i stap aninit long wota, hem i kavremap ae blong hem wetem wan kaen skin. Skin ya i protektem ae blong hem, be tu, hem i mekem se krokodael i save gohed blong lukluk aninit long wota.
Laef We i Stret Blong Wan King
Krokodael blong solwota hem i bigwan moa i bitim ol narafala lesed long famle blong hem. Ol man krokodael oli gru fulwan taem oli kasem 3.2 mita, be nating se i olsem, oli save gohed yet blong gru long ol yia biaen. !Mark Carwardine, we i raetem The Guinness Book of Animal Records, i talem se long wan ples long India we i lukaot long ol wael anamol, i gat wan krokodael blong solwota we long blong hem i kasem 7 mita!
Ples we krokodael i laef long hem, yumi save talem se i stret long wan king. Semfala buk ya i talem se ples we wan krokodael blong solwota i laef long hem, i bigwan moa i bitim ol narafala kaen krokodael. Ol krokodael blong solwota oli laef long ol hot ples blong Esia mo Pasifik, wan eria we i kavremap olgeta ples stat long India i kasem Ostrelya mo ol aelan blong Palau.
Wan Taem We i Jenis
Ol natongtong raonabaot long ol aelan blong Palau oli givim sado long ol krokodael, oli olsem ples blong haed blong olgeta mo oli fulap long kakae blong olgeta. Taswe, yumi no sapraes se ol krokodael ya oli jusum ol aelan blong Palau olsem wan ples blong olgeta blong mekem pikinini mo blong laef long hem. Tru ya, namba blong ol krokodael we oli laef long ol aelan ya stat long ol 1960, i kasem samwe long 1,500 kasem 5,000 krokodael.
Be, Desemba 1965, i wan manis we i karem bigfala jenis long laef blong ol krokodael long Palau. Long manis ya, wan krokodael blong solwota i kakae mo kilim i ded wan man Palau we i stap sakem net blong kasem fis. Sam wik biaen, ol man oli kasem krokodael ya mo putum long pablik ples blong ol man oli luk. Ol man we oli luk krokodael ya oli kros tumas ale oli kilim anamol ya i ded.
“Wan Faet Agensem Anamol Ya”
Ol man we oli stadi long laef blong ol krokodael, Harry Messel mo F. Wayne King, oli talem se smoltaem afta long samting ya, gavman i statem “wan kampen blong finisim olgeta krokodael long Palau, nomata wanem samting i kamaot. Hem i olsem wan faet agensem anamol ya.” I gat praes blong winim, sipos man i kilim wan krokodael. Ol man oli putum trap olbaot, mo oli yusum bot blong olgeta blong go faenem ol krokodael ya. Stat long 1979 i go kasem 1981, ol man oli sutum samwe long 500 go kasem 1,000 krokodael i ded. Oli karemaot skin blong ol anamol ya mo salem ol skin ya blong wokem samting long hem.
Skin blong ol krokodael we oli bigman finis i bigwan moa, taswe ol man oli traehad blong traem kasem ol bigfala krokodael. Be, evritaem we ol man oli kilim i ded ol woman krokodael, oli blokem krokodael ya blong bonem olgeta 1,000 no moa bebi, we maet hem i bin bonem long laeftaem blong hem. From samting ya, namba blong ol krokodael i stat godaon. Long stat blong ol yia 1990, Messel mo King tufala i faenemaot se namba blong “ol krokodael we oli laef long Palau i no kasem 150.”
I tru se man i mas lukaot long krokodael blong solwota from we oli save kilim man i ded. Nating se i olsem, man ya Carwardine, we i raetem ol buk, i talem se “trabol we [ol krokodael ya] oli mekem long yumi i smol nomo taem yumi skelem wetem bigfala trabol we man i karem i kam long ol krokodael ya.”
Long 1997 wan ples blong lukaot long anamol i open long Ngardok. Man i no wokem ples ya blong protektem ol krokodael blong solwota, be hem i wan ples we i lukaot smol long ol krokodael tu. Graon we i fulap long wota raonabaot long Lek Ngardok i stap olsem wan gudfala ples blong ol krokodael oli save haed long hem mo karem pikinini blong olgeta.
Maet krokodael blong solwota i no kam wan gudfala fren blong yu, ?be yu no agri se hem i wan king we i rili mekem tingting blong yumi i sapraes?
[Futnot]
a Porosus i kamaot long Grik wod ya porosis, we i minim “strong skin,” mo lashaf blong tok ya -osus, long lanwis Latin, i minim “fulap long.”
[Bokis blong pija long pej 15]
?KROKODAEL NO ALGITA?
?Olsem wanem blong luksave weswan i wan krokodael mo weswan i wan algita? Samting we i klia nomo hemia tut blong olgeta. Taem maot blong krokodael i sat, yu save luk tu bigfala tut blong hem we i stap long tufala saed blong maot blong hem, oli kam antap. Be, long saed blong algita, taem maot blong hem i sat yu no save luk ol tut blong hem.
[Bokis blong pija long pej 15]
WOTA BLONG AE BLONG KROKODAEL
Taem man i talem se wota blong ae blong krokodael i ron long fes blong wan man, hemia i min se man ya i krae no i sore be blong giaman nomo. ?From wanem ol man oli talem toktok ya olsem se ol krokodael oli gat tu fes? Buk ya The International Wildlife Encyclopedia, i talem se wan risen blong samting ya, maet hem i from we ol krokodael oli mekem ae blong olgeta i wetwet oltaem. Taswe, “wota ya we oli holem i stap long ae blong olgeta, i ronaot smol long ae blong olgeta. Samting ya, wetem maot blong olgeta we i luk olsem se hem i stap smael smol, maet i mekem ol man oli stap talem se ol krokodael oli gat tu fes.”
[Foto]
Krokodael
Algita
[Credit Line]
F. W. King photo
[Tok blong pija long pej 14]
!Yu luk ol tut ya!
[Credit Lines]
By courtesy of Koorana Crocodile Farm, Rockhampton, Queensland, Australia
© Adam Britton, http://crocodilian.com
[Foto Credit Line blong pija long pej 13]
By courtesy of Australian International Public Relations