Baebol i Talem Wanem

?Wanem Mining Blong Laef?

“OL MAN WE OLI FOLEM TINGTING BLONG DARWIN, OLI BILIF SE OL SAMTING WE OLI LAEF, OLI STAP FROM WE OLI STRETGUD LONG PLES WE OLI STAP LONG HEM MO LONG OL SAMTING RAONABAOT, BE OL NARAFALA SAMTING WE OLI NO STRETGUD, OLI DED. OLI TALEM SE BILIF YA I NAF BLONG EKSPLENEM LAEF. BE MAN WE I GAT STRET TINGTING I LUKSAVE SE: SIPOS WAN LAEF SAMTING I STAP KAM MOA GUD, WE HEM I STAP TINGTING MOA LONG FASIN MO LAEF BLONG HEM WAN, MO I STAP KASEM MOA WAES, HEM I MEKEM OLSEM FROM WE HEM I WANTEM, I NO FROM LAKI NOMO.” —DYLAN THOMAS (1914-1953, MAN WELS WE I RAETEM OL VAS MO OL BUK).

FASIN ya blong traem faenem mining blong laef i no nyuwan. Blong plante handred yia finis, hem i stap wok long tingting blong ol man we oli wantem save moa. Wan stadi we oli mekem i no longtaem, i soemaot se samting ya i stap moa long tingting blong ol man Nyu Silan tede, i bitim ten yia bifo. Ripot we oli putum long magasin ya Listener, i talem se, fotenaen pesen blong ol man, stat long 15 yia i go antap, “oli tingting plante long mining blong laef.” Taem oli mekem semkaen stadi long 1985, namba ya i 32 pesen nomo.

I luk olsem we ol man Nyu Silan oli soemaot sem filing olsem plante man blong ol narafala nesen tu. Listener i gohed se: “From we namba blong ol man we oli wantem save mining blong laef i kam antap, maet samting ya i soemaot se yumi stap wari moa naoia i bitim ol yia 1980. Yumi no sua wanem rod nao i stret blong folem.”

I klia se, plante man tede oli no glad long ansa we ol man we oli bilif long evolusena oli givim long bigfala kwestin ya se, ?From wanem yumi laef? ?Baebol i save soemaot rod blong faenem mining blong laef?

“Stampa Tingting We i Pusum Man”

Long olgeta laef samting we i stap long wol, man nomo i stap tingbaot mining blong laef. ?Yu save from wanem? Baebol i givim wan risen long Eklesiastis 3:11. Long saed blong Man ya we i Wokem olgeta samting, hem i talem se: “Hem i givim long man wan tingting long saed blong taem we i pas finis mo taem we bambae i kam yet.” (The New English Bible) Nating se olgeta laef samting oli traehad blong holemtaet laef we oli gat, i luk olsem se ol man nomo oli gat wan tingting long saed blong taem—taem we i pas finis, taem naoia, mo taem we bambae i kam. Man i save tingbaot ol samting we oli pas mo i save lukluk i go long fyuja. Hem i save mekem plan from taem ya we bambae i kam, yes, hem i save gat strong tingting blong wantem stap long taem ya. Mo man i save harem nogud taem hem i no save mekem ol drim blong hem long saed blong fyuja oli kamtru, from we laef blong hem i sot tumas.

Taswe, man nomo i stap askem ol kwestin olsem: ?From wanem mi mi laef? ?Olsem wanem long fyuja blong mi? Wan dokta long saed blong tingting blong man, nem blong hem Viktor Frankl, i raetem se: “Fasin traehad blong faenem mining blong laef blong man, hem i olsem stampa tingting we i pusum man. . . . Mi save talem se, i no gat wan samting long wol we i save givhan long wan man blong laef tru long enikaen trabol we i nogud olgeta, olsem save ya se laef i gat wan mining.”

Jisas i Agri Long Ol Samting We Solomon i Faenemaot

Ol man bifo oli harem se oli nidim blong faenemaot mining blong laef, ale samting ya i pulum intres blong olgeta. I gud yumi tingtingbak long histri, tri taosen yia bifo, long kantri blong Isrel aninit long rul blong Solomon. Kwin blong Seba i tokbaot Solomon, se: “Tok ya we mi bin harem long kantri blong mi i rili tru. Ol man oli stap talem plante samting long saed blong yu mo long saed blong waes blong yu. Be mi mi no trastem ol tok ya blong olgeta, gogo mi kam long ples ya, ale mi luk ol samting ya long prapa ae blong mi. Naoia mi luksave se ol man ya oli no talemaot stret haf blong ol samting we yu mekem. Waes blong yu mo olgeta samting we yu yu gat oli bitim ol samting we ol man oli stap taltalem, we mi lesin long olgeta.”—1 King 10:6, 7.

Taem King Solomon i raetem buk blong Eklesiastis long Baebol, hem i talemaot long ol man we oli ridim, frut blong ol samting we hem i bin mekem blong traem faenemaot moa long saed blong mining blong laef. Hem i traem ol defren rod we eni king blong Is bifo i save traem, blong haremgud long laef. Long japta 2, vas 1 kasem 10, hem i eksplenem wan laef we i fulap long ol pleplei. Tede, i hadwok blong kasem save long kaen laef olsem. Hem i traem evri samting we hem i save traem long laef, olsem ol sas samting mo ol pleplei we oli mekem man i haremgud long saed blong bodi. ?Hem i ting se ol samting ya oli givim mining long laef? Ansa blong hem i save mekem wan man we i trastem hem wan i sapraes.

Taem hem i luklukbak long olgeta samting ya, plante taem tingting blong hem i no glad. Ol samting ya oli blong nating nomo, oli westem taem. Hem i raetem se: “Mo mi, mi lukluk i go long olgeta wok we mi mekem wetem han blong mi mo long ol hadwok we mi wokhad blong mekem olgeta, mo, !luk! evri samting oli nating nomo mo i olsem man i ronem win, i no gat wan gudfala samting aninit long san.”—Eklesiastis 2:11.

Hem i luksave se, beswan samting we i save kamaot from ol pleplei blong wol, se oli save mekem man i glad blong smoltaem. Waes blong man tu i no naf blong mekem man i fri long soa mo trabol blong laef.

Jisas Kraes i talem sem samting taem hem i ansa long wan man we hem i tingting tumas long ol samting we bambae hem i kasem long olfala blong hem taem i ded. Hem i talem long ol man we oli stap lesin, i se: “Yufala i lukaot gud. Yufala i mas blokem olgeta fasin ya we yufala i wantem samting blong narafala man. Maet man i gat plante samting blong hem, be stampa blong prapa laef blong man i no stap long ol samting ya.”—Luk 12:15.

Jeova God nomo i save mekem yumi naf blong winim fulwan ol trabol long evridei laef blong yumi, mo givim wan mining we i waes long olgeta samting we man i mekem. Taswe, laef we i seraot long God i blong nating nomo. Long Eklesiastis 12:13, Solomon i eksplenem se: “Oraet, taem mi harem finis olgeta toktok, mi mi tok olsem, se: Yu mas fraetgud long trufala God mo yu mas folem ol loa blong hem. From we hemia nao olgeta wok we man i mas mekem.”

Faenemaot Mining Blong Laef

Plante taem, Jisas Kraes i agri long ol tok blong Solomon se i mas gat fasin blong fraetgud long God, blong givim mining long laef. Jisas i talem bakegen ol Tok blong God, i se: “Baebol i talem se, ‘Kakae nomo i no save mekem man i laef. Evri tok we God i talem, hemia nao samting blong mekem man i laef.’ ” (Matyu 4:4; Dutronome 8:3) Yes, blong wan man i gat mining long laef blong hem, hem i no mas fogetem ol samting long saed blong speret. Jisas i tokbaot hem wan se: “Kakae ya blong mi hemia, we bambae mi mekem ol samting we hemia we i sanem mi i wantem, mo mi finisim ol wok we hem i givim.” (Jon 4:34) Fasin blong obei long Papa blong hem long heven, hemia nao stampa blong fasin glad mo fasin blong haremgud we hem i kasem. Samting ya i olsem kakae blong hem. I givim mining long laef blong hem.

Taswe, ?yumi save kasem ful mining blong laef sipos yumi seraot long God? !No gat! Yumi intres long toktok blong man blong stadi long histri, Arnold Toynbee, we hem i raetem se: “Trufala risen blong wan skul we i hae moa, i blong seremaot ol advaes mo trutok long saed blong speret we oli ol stampa samting blong skul ya, i go long olgeta laef samting we hem i save kasem, blong bambae olgeta laef samting ya oli save fulumap trufala mining blong laef blong Man. Trufala mining blong laef blong Man, i blong givim ona long God mo blong haremgud long Hem blong olwe.” Profet Malakae i talemaot tingting blong God se: “Bambae yufala i save luk bakegen wanem nao i stap mekem stret man i defren long rabis man, mo wanem nao i stap mekem man we i mekem wok blong God i defren long man we i no bin mekem.”—Malakae 3:18.

[Futnot]

[Tok/Image Blong Pija Long Pej 22]

“The Thinker,” blong Rodin

[Credit Line]

Scala/Art Resource, N.Y.