Skul Momon—?Hem i Stanemap Trufala Bilif Bakegen?

TEMPEL blong ol Momon long Sol Lek Siti, Uta, i wan saen blong soemaot bilif we ol LDS (Las-dei Sen) oli haremgud tumas long hem. Fasin blong wok strong, tinghae long famle, mo kasem naf mane blong haremgud long laef, hemia ol fasin we ol Momon oli tokbaot plante. Ol man raon long wol oli stap luk ol misinari blong Momon, we oli werem ol baj wetem nem blong olgeta long hem. Be sam tabu bilif blong skul Momon, ol man afsaed oli no save long olgeta. Taswe, ol man oli stap talem ol narakaen tok long saed blong skul ya. Blong skelem skul ya long fasin we i stret, yumi no mas lesin ol tok blong ol man olbaot nomo, be yumi mas lukluk ol trufala samting long saed ya. ?Yumi save lanem wanem long saed blong skul ya we plante man oli stap daonem?

Jyos Blong Joseph Smith Tede

Ol Momon oli bilif se skul blong olgeta i trufala skul we i stanap bakegen wetem ol pris mo ol loa blong hem. Taswe, oli kolem skul ya se, Jyos blong Jisas Kraes mo Ol Las-dei Sen. Long skul Momon, ol lida oli no hae moa long ol narafala man blong skul. Defren olgeta, taem ol boe memba blong skul ya oli kasem 12 yia, oli save mekem sam wok long jyos, mo taem oli gat 16 yia, oli save kam wan pris.

Bighaf blong ol man we oli mekem wok long jyos oli no kasem pei. Mo ol famle long LDS skul, oli joen long plante wok we jyos no kongregesen long ples blong olgeta i mekem. Long saed blong kongregesen ya, ol elda, ol bisop, mo ol presiden blong eria (distrik), oli lukaot long ol wok blong jyos we i folemgud wan plan. Wan kaonsel blong 12 aposol long Sol Lek Siti i lukaot long wok blong jyos long ful wol. Presiden blong jyos​—we ol man oli luk hem olsem profet, man we i save lukluk i go long fyuja, mo mekem ol tok haed oli kam klia​—wetem tu man blong kaonsel, olgeta nao oli mekemap komiti we i rul long jyos, we oli kolem Spesel Grup Blong Rul, no Faswan Grup Blong Rul.

Ol Momon we oli strong long skul blong olgeta oli folem plante loa. Taem oli gat eit yia, oli save tekem baptaes, we i soem se oli tanem tingting blong olgeta from sin mo oli wantem obei. Oli wasem mo putum oel long man we i kasem bilif, blong mekem hem i klin mo givim hem i go long God. Long seremoni blong kam wan memba blong tempel, man i mas agri long plante kontrak mo promes, mo oltaem biaen, hem i mas werem sam spesel klos blong tempel aninit long ol narafala klos blong hem. Samting ya i blong blokem hem long ol nogud samting mo blong mekem hem i tingbaot ol promes we hem i bin mekem, blong holem ol samting olsem sekret. Mo tu, wan man mo woman we tufala i Momon, tufala i save mared long wan tempel, blong mekem se mared blong tufala i strong “blong olwe, foreva.” Olsem nao, biaen, famle i save stap tugeta long heven, mo tufala i save mekem moa pikinini long taem ya.

Plante man oli bin toktokgud long saed blong skul Momon from program blong hem blong givhan long ol man we oli nidim help. Oli statem program ya blong “finisim nogud fasin les.” Mane blong sapotem program ya i kam long ol memba blong jyos we oli livim kakae blong olgeta tu taem long wan manis, nao oli givim mane blong kakae ya i go long jyos. Mo tu, oli mas givim wan haf blong mane blong olgeta i go oltaem long jyos. Famle mo ol fren blong ol misinari blong Momon oli givim mane blong sapotem olgeta. Kolosap oltaem, ol misinari ya oli ol yangfala man mo woman, mo oli mekem wok blong misinari blong tu yia.

Fasin blong lego sam samting we olgeta nomo oli wantem, mekem ol gudfala famle we oli joengud, mo mekem wok blong givhan long ol narafala raonabaot long olgeta, hemia ol samting we ol Momon oli traem mekem long laef blong olgeta. ?Be olsem wanem long ol bilif blong olgeta?

Ol Momon Mo Baebol

Namba eit haf blong Ol Atikol Blong Bilif Blong Momon, i talem se: “Mifala i bilif se Baebol i tok blong God sipos ol man oli tanem long fasin we i stret.” Be hem i gohed olsem se: “Mifala i bilif se Buk blong Momon tu i tok blong God.” Plante man oli wantem save se, ?from wanem oli nidim sam narafala buk?

Elda Bruce R. McConkie i talem se: “I no gat wan narafala grup long wol we oli tinghae long Baebol olsem [ol Momon] . . . Be mifala i no bilif se . . . Baebol i holem evri samting we man i nidim blong kasem laef.” Presiden Gordon B. Hinckley i raetem wan pepa we nem blong hem What of the Mormons? nao hem i talem se, from we i gat ol defren fasin blong wosip mo ol defren skul, samting ya i “soemaot klia se Baebol i no naf.”

Ol man blong LDS we oli raet, oli talem se i gat sam bigfala problem we oli mekem se yumi no save trastem Baebol, from we ol man we oli tanem i go long narafala lanwis oli tekemaot sam haf mo oli mekem sam mastik. Momon aposol James E. Talmage, long buk blong hem A Study of the Articles of Faith, i talem se: “Ale, yumi mas ridim Baebol wetem bigfala ona mo prea. Oltaem yumi mas lukaot laet blong Speret, blong yumi luksave trutok mo ol mastik blong ol man.” Wan long ol faswan Momon aposol, Orson Pratt, i go moa i talem se: “?Hu i save talem se i gat wan vas long ful Baebol we man i no spolem?”

Be, i luk olsem we ol Momon oli no save sam samting long saed ya. I tru se long ol yia we oli pas, ol man oli bin mekem plante kopi blong Baebol mo tanem i go long plante lanwis. Be, i gat plante samting blong pruvum se trutok blong hem i stapgud yet. Oli bin jekem sam Baebol blong naoia wetem plante taosen olfala hanraet long Hibru mo Grik lanwis. Eksampel, Buk blong Aesea we oli faenem hanraet blong hem long Ded Si. Oli raetem hem samwe afta 100 B.K.T., nao oli skelem hem wetem wan hanraet blong bitim wan taosen yia biaen. ?I gat ol bigfala mastik long hem? No gat. Wan man blong hae save we i jekem, i talem se oli faenem sam smosmol mastik nomo, “bighaf blong olgeta oli kamaot from we oli mestem wetem pen blong olgeta no oli yusum defren fasin blong raetem wod.”a

Bos blong Britis Musium bifo, Sir Frederic Kenyon, i talem afta we hem i stadi dip blong ful laef blong hem, se: “Kristin i save tekem Baebol long han blong hem mo no fraet blong talem se hem i holem trufala Tok blong God, we i kam kasem yumi afta plante handred yia, be i no lusum wan bigfala samting nating.” Taswe, tok blong wan man we i raetem Ol Sam i tru yet tede, se: “Ol tok blong Masta oli klin tok: oli olsem selva we oli bonem long faea, oli klinim seven taem.” (Ol Sam 12:​6, King James Version) ?Yumi nidim moa?

The Book of Mormon long 2 Nefi 29:​6 i tok strong se: “Wan man i krangke sipos hem i talem se: Wan Baebol, mifala i gat wan Baebol, mo mifala i no nidim wan narafala Baebol.” Be plante Momon oli bin tingtinggud long strong tok blong aposol Pol long Galesia 1:8 (KJ) se: “Nating se wan long yumi, no wan enjel long heven, be sipos hem i talemaot wan narafala gud nyus long yufala we i defren long hemia we mifala i talemaot long yufala, hem i mas kasem panis.”

Ol man blong stadi long LDS oli talem se ol nyufala save i no ademap samting long Baebol, be hem i mekem ol tok blong Baebol i kam moa klia, mo hem i joengud wetem Baebol. Rex E. Lee, presiden blong Brigham Young Yunivesiti, i raetem se: “Tufala i no agensem tufala. Baebol mo Buk blong Momon, tufala evriwan oli talemaot sem rod blong kasem laef.” ?I tru se tufala buk ya oli agri? Tingbaot bilif blong ol Momon long saed blong rod blong kasem laef.

“Olsem God i Stap Naoia, Man i Save Kam Olsem Tu”

Lee i eksplenem se: “Nating se yumi no rimemba, be bifo we yumi laef long wol ya yumi stap laef olsem ol speret man.” Ol man blong LDS oli bilif se man i save gohed blong olwe blong kam moagud. Ale, oli talem se sipos man i obeigud, hem i save kam wan god​—wan man blong wokem ol samting, olsem God. Joseph Smith i talem se: “Bifo, God i olsem yumi, mo naoia hem i kam wan hae Man, we i stap sidaon long jea blong king long heven. Yufala i mas lanem olsem wanem blong kam olsem God, . . . olsem ol God oli bin mekem bifo long yufala.” Profet blong ol Momon, Lorenzo Snow i talem se: “Olsem man i stap naoia, bifo God i stap olsem. Olsem God i stap naoia, man i save kam olsem.”

?Baebol i tokbaot fyuja blong man olsemia? No gat. Baebol i tokbaot wan promes nomo se man i save kam olsem God, hemia gyaman promes blong Setan long garen blong Iden. (Jenesis 3:5) Baebol i soem se God i wokem Adam mo Iv blong laef long wol ya, mo hem i talem long tufala blong karem ol stret pikinini we oli save stap laef blong olwe wetem glad. (Jenesis 1:28; 3:22; Ol Sam 37:29; Aesea 65:​21-25) Fasin blong Adam blong no wantem obei long God i mekem sin mo ded i kamaot long wol.​—Rom 5:12.

The Book of Mormon i talem se sipos faswan speret blong Adam mo Iv i bin stapgud we i no gat sin, tufala i no save gat pikinini, mo bambae tufala i stap tufala nomo long Paradaes, we tufala i no glad nating. Taswe, hem i talem se sin blong faswan man mo woman ya i joen wetem fasin blong slip tugeta mo karem pikinini. “Adam i sin blong mekem se i save gat ol man long wol. Mo ol man oli stap blong oli save gat glad.” (2 Nefi 2:​22, 23, 25) Olsem nao, oli talem se ol speret man long heven oli stap wet long jans blong kam laef long wol ya we i gat sin​—hemia wan samting we oli mas mekem sipos oli wantem kam stret olgeta mo kam olsem God. Buk ya blong LDS nem blong hem, Ensign i talem se: “Mifala i gat bigfala tangkyu long Adam mo Iv from fasin we tufala i mekem, mifala i no agensem tufala from.”

Wan nefiu blong Joseph Smith, nem blong hem Joseph Fielding Smith, i talem se: “Tijing ya [se man i olsem speret man fastaem], i no kliagud long Baebol . . . from we plante samting we oli klia mo oli gudfala tumas, ol man oli tekemaot long Baebol.” Hem i gohed se: “Bilif ya i stanap long wan revelesen we Jyos i kasem long Mei 6, 1833.” From samting ya, ol LDS oli talem se oli agri long Baebol long saed blong ol tijing, be sipos Baebol i defren long tok blong ol profet blong olgeta, bambae oli agri long ol profet ya fastaem.

The Book of Mormon ​—Faondesen Blong Skul Ya

Joseph Smith i leftemap The Book of Mormon olsem “buk we i moa tru bitim ol narafala buk long wol, mo buk we i faondesen blong skul blong mifala.” Oli talem se stampa blong buk blong hem, hemia sam gol plet. Leven Mormon oli talem se oli bin luk ol plet ya. Be, taem Smith i finisim buk blong hem, oli talem se ol plet ya oli go antap long heven. Taswe, naoia oli no stap, blong yumi save skelem buk ya wetem olgeta.

The Pearl of Great Price (lukluk bokis, pej 20) i tokbaot Tija Charles Anthon, we hem i luk wan kopi blong toktok we oli bin katem long ol plet, nao hem i talem se ol tok ya i tru mo fasin blong olgeta blong tanem tok ya i stret nomo. Be taem oli talem long hem weples ol plet ya oli kamaot long hem, hem i jenisim tingting blong hem. I luk olsem se store ya i no laenap wetem samting we Smith i talem se, hem nomo i kasem spesel save blong tanem tok long ol plet ya i go long narafala lanwis. Hem i talem se hemia “ol save we ol narafala man long wol oli no gat.” ?Be Tija Anthon i save talem se wan hanraet i tru sipos hem i no save ridim, mo sipos i no save tanem i go long narafala lanwis?

The Book of Mormon i talem plante tok blong King James Baebol, we i yusum ol Engglis blong Shakespeare. Long taem blong Joseph Smith, ol man oli tingting finis se Engglis olsem i blong bifo nomo. Plante man we oli ridim The Book of Mormon, oli no kasem save from wanem buk ya we i “moa tru” bitim ol narafala buk, i yusum bitim 27,000 tok blong Baebol ya we plante man oli talem se i fulap long ol mastik, mo we biaen Smith i jenisim.​—Lukluk bokis, pej 24.

Taem ol Momon oli skelem faswan kopi blong The Book of Mormon wetem ol kopi blong hem naoia, oli sapraes long wan samting​—se buk ya we oli talem se “oli tanem . . . tru long presen we oli kasem, hemia paoa blong God,” i bin jenis plante taem long saed blong fasin blong joenem mo raetem ol wod, mo long ol save insaed long hem. Eksampel, tingting blong plante blong olgeta i fasfas long saed blong hu nao i “Papa blong Olwe.” Ol faswan buk oli talem long 1 Nefi 13:​40 se, “Pikinini Sipsip blong God nao hem i Papa blong Olwe.” Be ol kopi we oli mekem biaen, oli talem se “Pikinini Sipsip blong God, hemia Pikinini blong Papa blong Olwe.” (Mifala nomo i putum italik.) Tufala faswan kopi blong The Book of Mormon long 1830, oli stap yet. Long wan long tufala ya we Jyos blong Jisas Kraes mo ol Las Dei Sen we i Stanap Bakegen i holem, oli ademap tok ya “Pikinini” bitwin long ol laen.

Long saed blong Doctrine and Covenants blong ol Momon, buk ya The Revelations of the Prophet Joseph Smith, we wan man blong stadi long LDS, Lyndon W. Cook i raetem, i eksplenem long fastok blong hem se: “From we ol komiti we oli mekemrere buk ya blong prentem oli jenisim sam long ol revelesen, naoia i gat plante samting we oli ademap no tekemaot long hem.” Wan samting we oli bin jenisim i stap long Book of Commandments 4:​2, we i tokbaot Smith olsem se: “Hem i kasem spesel save blong tanem buk ya i go long narafala lanwis . . . Bambae mi no moa givim sam moa spesel save long hem.” Be long 1835, taem oli prentem revelesen ya bakegen long buk ya Doctrine and Covenants, vas ya i talem se: “Bambae mi no moa givim wan spesel save long yu gogo hemia i finis.”​—5:4.

Sam Poen Blong Histri We i Had Blong Kasem Save Long Olgeta

Samfala oli faenem i had blong kasem save long samting ya: !Samwe long 20 man Jyu oli aot long Jerusalem blong go long Amerika long 600 B.K.T., be bifo we 30 yia i pas, oli kam plante tumas ale oli seraot long tu nesen! (2 Nefi 5:28) Oli talem se, smol grup ya i no stap 19 yia longwe yet, be oli bildim wan haos prea finis “we i kolosap sem mak long haos prea we Solomon i bildim . . . mo fasin blong wokem haos ya i nambawan tumas.” !Tru ya, hemia wan bigbigfala wok ya! Solomon i tekem seven yia blong bildim haos prea long Jerusalem, mo i nidim kolosap 200,000 wokman, wetem ol man we oli gat gudhan blong mekem ol spesel wok, mo ol man blong lukaot long wok ya.​—2 Nefi 5:16; skelem wetem 1 King 5, 6.

Ol man we oli ridimgud Book of Mormon oli luk se sam samting we buk ya i tokbaot, oli no stap long stret ples blong olgeta long saed blong taem we oli hapen. Eksampel, Ol Wok 11:26 i talem se: “Long Antiok fastaem, oli singaot ol disaepol se ol Kristin.” (KJ) Be long Alma 46:​15, we oli talem se i stap tokbaot ol samting we oli kamaot long 73 B.K.T., i talem se ol Kristin oli stap long Amerika taem Kraes i no kam long wol yet.

The Book of Mormon i olsem wan store blong histri bitim ol tijing. Tok ya “mo i hapen olsem” i kamaot samwe long 1,200 taem long laswan kopi blong hem. Be sem tok ya i kamaot kolosap 2,000 taem long kopi blong 1830. Plante ples we Baebol i tokbaot oli stap yet tede, be kolosap olgeta ples we The Book of Mormon i tokbaot, olsem Gimgimno mo Sisrom, ol man oli no save long olgeta.

Store ya blong ol Momon i tokbaot ol velej we oli stap olbaot long Not Amerika. Be Helaman 3:8 i talem se: “Mo i hapen olsem we ol man oli karem plante pikinini mo oli go olbaot . . . gogo oli kavremap ful wol.” Folem tok long Mormon 1:​7, kantri i “fulap long ol haos.” Plante man oli wantem save, ?wehem ol ston blong ol haos ya mo velej ya naoia? ?Wehem ol samting blong ol Nefaet bifo, olsem ol gol mane, naef blong faet, ol sil mo ol samting blong blokem bodi blong olgeta long faet?​—Alma 11:4; 43:​18-20.

Wetem ol kwestin ya long tingting blong olgeta, i gud we ol memba blong skul Momon oli tingtinggud long tok blong man ya Rex E. Lee we hem i wan Momon tu. Hem i se: “Yumi save pruvum sipos skul Momon i tru no i gyaman from buk we Jyos ya i tekem nem blong hem long hem.” I hadwok long ol Momon we oli wantem folem stret fasin blong wosip​—mo long olgeta man we oli stap talem se oli Kristin​—blong kasem bilif we i stanap long trufala save blong Baebol, bitim we i stanap long wan ekspiryens long saed blong filing, we i joen wetem prea.

Faondesen Blong Stanemap Trufala Bilif Bakegen

From we ol samting long saed blong speret oli fasfas long taem blong Joseph Smith, hem i tanem baksaed blong hem long ol grup blong wosip we oli stap raorao. Bifo long taem blong hem, long taem blong hem, mo afta long taem blong hem, sam man we oli wantem onagud long God oli bin traehad blong gobak long trufala bilif bakegen.

?Wanem fasin blong trufala Kristin bilif? ?I no Kraes nao we i givim “wan eksampel, blong yumi folemgud hem”? (1 Pita 2:​21, KJ) Laef blong Jisas Kraes i defren olgeta long ol tijing blong skul LDS. Jisas i no stap laef long fasin we i blokem olgeta samting we i save haremgud long hem. Be hem i no gat plante samting tu, mo hem i no ronem mane, paoa, no haeples long politik. Ol man oli mekem nogud long hem from we hem i “no joen long ol fasin blong wol ya.” (Jon 17:​16, KJ) Bigfala tingting blong Kraes taem hem i stap mekem wok blong hem long wol, i blong givim ona mo leftemap nem blong Papa blong hem, Jeova. Samting ya i tru long saed blong ol trufala disaepol blong Jisas tu. Laef blong olgeta i no samting we i impoten moa, be hem i namba tu samting nomo.

Jisas i tijim ol man long Tok blong God, i talem ol tok ya bakegen mo bakegen, mo i folem long laef blong hem. Brigham Young i tokbaot Baebol se: “Mifala i yusum buk ya blong lidim mifala, mo mifala i folem ol tok blong hem. Mifala i tingbaot buk ya olsem faondesen blong bilif blong mifala. Hem nao i soemaot rod blong kasem laef.” (Journal of Discourses, Buk 13, pej 236) Taswe hem i talem se: “Karem Baebol, skelem skul blong ol Las Dei Sen wetem, mo luk sipos bilif ya i stanap strong taem yu skelem.” (Discourses of Brigham Young) I no skul Momon nomo we oli mas pasem tes ya, be olgeta skul we oli stap talem se oli Kristin, from we Jisas i talem se: “Ol man blong wosip long Papa long trufala fasin, oli mas wosip wetem speret mo trutok.”​—Jon 4:​23, KJ.

[Futnot]

[Bokis blong pija long pej 18]

Ol Tabu Buk Blong Momon

ANTAP long Baebol mo The Book of Mormon, ol Las-dei Sen oli bilif long sam narafala buk tu.

Doctrine and Covenants: Hemia i fulap long ol tok we Joseph Smith i talem se oli olsem revelesen we God i givim. Oli bin jenisim sam tok folem ol jenis we oli kamaot long ol tijing mo long histri.

The Pearl of Great Price: Insaed long buk ya i gat Jenesis, mo Matyu japta 24 blong Baebol, olsem Joseph Smith i jenisim, mo store blong laef blong Smith. Mo tu, i gat tok ya we Smith i tanem from wan hanraet we hem i pem long 1835. Hem i talem se hemia i prapa hanraet blong Ebraham, we i tokbaot olsem wanem wan enjel i sevem hem taem wan pris i traem blong kilim hem i ded olsem wan sakrifaes long olta. Oli faenem hanraet ya bakegen long 1967, mo ol man we oli stadi long ol samting blong Ijip bifo, oli skelem hanraet ya. Wan ripot i talem se: “Long olgeta tok we oli talem se Joseph Smith i bin tanem, i no gat wan tok nating we i sem mak long ol tok insaed long hanraet ya.” Oli faenemaot se hanraet ya i Book of Breathings, hemia wan pepa we ol man Ijip oli putum wetem dedbodi taem oli berem. Faswan buk blong Smith i soem se hem i yusum 136 Engglis wod blong tanem tok blong ol man Ijip we i minim “lek.”

Baebol Blong Joseph Smith: Long 1830, Smith i stat bakegen blong raetem King James Baebol, be neva hem i finisim. Hem i jenisim kolosap 3,400 vas mo i ademap plante save, wetem wan profet tok long en blong Jenesis long saed blong hem wan we i kamtru olsem “wan nambawan man blong talemaot fyuja.” Buk ya i stap wetem woman blong Smith taem Smith i ded, mo woman blong hem i no folem Brigham Young, taswe jyos blong Sol Lek Siti i no yusum buk ya plante taem. Be oli talem se tok blong hem i tru.

Sam moa tijing “we oli kamaot long God”: Eni profet blong jyos i save stanemap sam tijing taem hem i laef, mo ol Momon oli bilivim se ol tijing ya oli tru olsem we Tabu Baebol i tru. Wan eksampel, hemia toktok blong King Follett long 1844. Smith i talem tok ya taem oli berem Elda King Follett. Hem i eksplenem tijing ya we man i save kam olsem God mo God i save kam olsem man. Ol toktok blong hem i stap long Journal of Discourses, we i fulap long ol tok blong Smith, Young, mo sam narafala haeman blong Momon long ol yia 1800.

[Bokis blong pija long pej 19]

Famle Blong Ol God Blong Ol Momon

God: Papa blong olgeta God, we hem i gat bodi blong mit mo bun.​—Doctrine and Covenants 130:22.

Elohim: Samtaem oli tokbaot hem olsem wan nomo. Be oli talem tu se hem i wan grup blong ol God we oli mekemrere evri samting long wol ya.​—Doctrine and Covenants 121:32; The Pearl of Great Price, Abraham 4:1; Journal of Discourses, Buk 1, pej 51.

Jisas: Hem i God, mo hem i Man we i Wokem ful wol, Sevya.​—3 Nefi 9:15; 11:14.

Jeova: Nem we Oltestemen i yusum blong talem Jisas.​—Skelem wetem Mormon 3:22; Moroni 10:​34; mo indeks blong Book of Mormon.

Triniti: God we i gat tri defren speret man insaed long hem, Papa mo Pikinini, we tufala i gat bodi blong mit mo bun, mo Tabu Speret.​—Alma 11:44; 3 Nefi 11:27.

Adam: Man we i halpem Jisas blong wokem evri samting. Brigham Young i talem se: “Papa blong yumi Adam, i kam insaed long garen blong Iden . . . mo i karem wan long ol waef blong hem, Iv, tu i kam. . . . Hem i Papa mo God blong yumi.” (Journal of Discourses, Buk 1 we oli raetem long 1854, pej 50) Afta we Adam i sin, hem i kam faswan Kristin man long wol. (The Pearl of Great Price, Moses 6:​64-66; Ensign, Janewari 1994, pej 11) Hem i “Olfala blong ol dei” (Doctrine and Covenants 116) mo hem i stret Papa blong Jisas, olsem we Jisas i kamaot long prapa bodi blong hem.​—Journal of Discourses, Buk 1, pej 51.

Maekel: Narafala nem blong Adam, jif blong ol enjel.​—Doctrine and Covenants 107:54.

[Bokis blong pija long pej 21]

Ol Momon, Fasin Blong Tinghae Long Wan Kantri Bitim Ol Narawan, Mo Politik

JOSEPH SMITH​—skul Momon i talem se hem i wan profet, wan man blong talemaot fyuja, mo wan man blong mekem ol tok haed oli kam long klia ples​—be antap long hemia, hem i mea, man we i lukaot long mane blong wan kampani, haeman blong ami, mo man we i traem kasem ples blong presiden long politik long Amerika. Plante Momon oli folem hem, ale oli joen fulwan long ol wok blong politik. Jyos i tinghae long kantri blong Amerika, mo i talem se God i lidim ol haeman blong raetem Konstitusen blong Amerika. Brigham Young i talem se: “Taem Kingdom blong God i rul, flag blong Yunaeted Stet bambae i flae hae blong soemaot fasin Fri, mo fasin we olgeta man oli sem mak nomo, mo bambae i no gat samting blong sakem doti long flag ya.”

Haf 12 blong Ol Atikol Blong Bilif i talem se: “Mifala i bilif se mifala i mas obei long ol king, presiden, lida, mo jaj, mo mifala i mas leftemap, obei, mo ona long loa.” ?Oli obei kasem wanem mak? Taem Yunaeted Stet i joen long Faswan Bigfala Faet Blong Wol, Elda Stephen L. Richards i talem se: “I no gat wan man we i moa strong blong sapotem gavman blong Yunaeted Stet i bitim Jyos blong Jisas Kraes mo ol Las-Dei Sen.” Wan narafala elda i talem se: “Taem mifala i faet, bambae mifala i win long paoa blong God.”

Haf 12 ya i stret long ol enemi we oli faet agensem Yunaeted Stet tu. Tija Christine E. King blong Yunivesiti blong Stafodsir i raetem se: “Oli talem long ol Momon long Jemani blong go faet from kantri blong olgeta, mo blong prea se kantri blong olgeta bambae i win.” Jyos i talem long olgeta se oli no stap faetem ol Momon brata blong olgeta long Briten mo Amerika, be oli stap faetem ol haeman blong gavman. “Nating se risen ya i slak nomo, hem i mekem se ol Momon long Jemani oli no moa wari sipos faet we oli mekem i stret mo i laenap wetem trufala fasin blong wosip, no no gat.”

Taem Hitler i kam lida, tingting blong ol Momon blong sapotem gavman fulwan i gohed. Dokta King i raetem se: “Skul Momon i no tok agensem no mekem samting blong blokem ol Nasi.” Bigfala tingting blong ol Momon blong gat wan klin laen blong man, mo blong leftemap kantri blong olgeta bitim ol narafala kantri, i givhan long jyos. Long tingting blong plante Momon, “i klia nomo olsem wanem bilif blong olgeta i joen wetem politik blong ol Nasi.” Taem sam Momon oli traem blong agensem Hitler, ol haeman blong Momon oli no sapotem olgeta. “Jyos i sapotem mo stap tru long gavman, mo i tok strong agensem ol man we oli agensem Nasi gavman.” Wan man we hem i no agri long ol Nasi, jyos i sakemaot hem afta we hem i ded long han blong ol Nasi.b

Hemia i defren long olgeta we The Book of Mormon i toktokgud long saed blong olgeta long Alma 26:32 se: “Oli rere blong ded bitim we oli kilim enemi blong olgeta i ded. Mo oli berem finis ol tul blong faet blong olgeta dip long graon, from we oli laekem tumas ol brata blong olgeta.”

Jisas i talem long Paelet se: “Sipos kingdom blong mi i blong wol ya, ol man blong mi bambae oli faet, blong mekem se mi no go long han blong ol man Jyu.” (Jon 18:​36, King James Version) Ol disaepol blong hem oli no gat raet blong yusum ol tul blong faet blong givhan long prapa Pikinini blong God. Taswe, i sua se oli no mas yusum ol tul ya tede tu long ol faet bitwin long ol gavman. Oli mas laekem ol man we oli enemi blong olgeta tu.​—Matyu 5:44; 2 Korin 10:​3, 4.

I gat plante trufala Kristin tede we wanwan, mo olsem wan grup, oli stap longwe long ol fasin blong politik. Buk ya Mothers in the Fatherland i talem se: “Taem ol Wetnes blong Jeova oli jes stanap, kam kasem naoia, oli strong blong stap longwe long politik.” From samting ya, taem Hitler i rul long fasin we ol man oli fraet tumas long hem, ol Wetnes blong Jeova “evriwan, oli no givim ona nating long gavman blong ol Nasi.”

Nating se oli kilim i ded plante taosen Wetnes blong Jeova from strong bilif blong olgeta, be ol Wetnes ya oli obei long tok ya blong Jisas se: “Ol man bambae oli save se yufala i disaepol blong mi, sipos yufala i laeklaekem yufala.”​—Jon 13:​35, KJ.

[Futnot]

[Bokis blong pija long pej 22]

Baebol i Defren Long Ol Buk Blong Momon

Baebol: Yumi no save stret ples we garen blong Iden i bin stap long hem, be maet long Mesopotamia kolosap long Reva Yufretes.​—Jenesis 2:​11-14.

Doctrine and Covenants: Garen blong Iden i bin stap long Jakson Kaonti, Misuri, Yunaeted Stet.​—Doctrine and Covenants 57, olsem Presiden J. F. Smith i eksplenem.

Baebol: Sol blong man bambae i ded.​—Esikel 18:4; Ol Wok 3:23.

The Book of Mormon: “Sol i no save ded samtaem.”​—Alma 42:9.

Baebol: Jisas i bon long Betlehem.​—Matyu 2:​1-6.

The Book of Mormon: Jisas i bon long Jerusalem.​—Alma 7:10.

Baebol: Jisas i bon from paoa blong tabu speret.​—Matyu 1:20.

Journal of Discourses: Jisas i no bon from paoa blong tabu speret. Hem i bon olsem ol narafala man afta we Adam i slip wetem Meri.​—Journal of Discourses, Buk 1, pej 50-51.

Baebol: Nyufala Jerusalem i stap long heven.​—Revelesen 21:2.

The Book of Mormon: Nyufala Jerusalem i stap long wol, mo ol man blong Misuri, Yunaeted Stet, oli bildim.​—3 Nefi 21:​23, 24; Doctrine and Covenants 84:​3, 4.

Baebol: Tabu speret i lidim ol man blong raetemdaon ol tingting blong God long Baebol.​—2 Pita 1:​20, 21.

The Book of Mormon: Oli talem se ol profet blong hem oli raetemdaon ol prapa save blong olgeta nomo.​—1 Nefi 1:​2, 3; Jekob 7:26.

Baebol: Loa blong Moses, wetem fasin blong givim haf mane i go olsem presen long God, i finis taem Jisas i ded. Ol man oli mas givim presen mane from we oli wantem givim, i no from we narafala i fosem olgeta.​—2 Korin 9:7; Galesia 3:​10-13, 24, 25; Efesas 2:15.

Doctrine and Covenants: “Yes, hem i . . . wan dei we ol man blong mi oli mas givim haf blong olgeta samting we oli gat. Hemia we i givim haf olsem, bambae i no bon long faea (taem [Masta] i kambak).”​—Doctrine and Covenants 64:23.

[Tok Blong Pija Long Pej 23]

Pija blong Moroni antap long tempel blong ol Momon long Sol Lek Siti