Baebol i Talem Wanem

?Ol Trufala Kristin Oli Save Sua Se God Bambae i Protektem Olgeta Oltaem?

AFTA long wan prea, ol Kristin brata oli pastru long wan eria we faet i strong tumas, blong givhan long sam narafala brata blong olgeta we oli trabol, nating se maet oli ded from. Be, taem oli pastru long ples ya, oli no kasem kil nating, wan samting we i mekem ol ami we oli stap faet, oli sapraes tumas. ?Olsem wanem? ?Wan enjel blong God i protektem olgeta?

Wan brata mo woman blong hem we oli stap plante yia long wok blong prij, oli ded taem wan plen i foldaon antap long ples we tufala i stap prij long hem. ?From wanem enjel blong God i no bin lidim tufala ya, no plen ya, i go long wan narafala ples long taem ya?​—Skelem wetem Ol Wok 8:​26.

Taem yumi skelem tufala store ya, maet yumi askem se: ?From wanem sam Kristin oli ded taem oli stap mekem wok blong God, be sam narafala we oli stap long ples we i denja tumas, oli laef i stap? ?Ol Kristin oli save sua se bambae God i protektem olgeta, antap moa long ol “lasdei” ya?​—2 Timote 3:1.

Risen From Wanem God i Protektem Samfala

Jeova God i promes se bambae hem i blesem mo i protektem ol man blong hem. (Eksodas 19:​3-6; Aesea 54:17) Hem i mekem samting ya bigwan long faswan handred yia, taem Kristin kongregesena i smol yet. Hem i mekem plante merikel. Jisas i dabolem kakae blong mekem i naf blong plante taosen man. Hem mo ol man blong hem, oli winim olkaen sik mo handikap, oli ronemaot ol rabis speret mo devel long ol man, mo tu, oli mekem dedman i laef bakegen. God i lidim smol kongregesen ya, nao hem i gru mo i kam strong. Be, nating se God i stap wetem olgeta, plante Kristin we oli strong long bilif, oli ded taem oli no olfala yet.​—Skelem wetem Ol Sam 90:10.

Tingbaot store blong Jemes mo Jon, tufala pikinini blong Sebedi. Jisas i jusum tufala ya wetem Pita, olsem aposol blong hem, mo oli kam ol gudfala fren blong Kraes.b Be, ol man oli kilim Jemes i ded long yia 44 K.T.,c mo brata blong hem, Jon, i laef gogo kasem en blong faswan handred yia. Tufala tugeta i mekem wok blong God. ?From wanem God i letem Jemes i ded, be Jon i stap laef?

Hae God we i gat olgeta paoa, hem i naf blong sevem laef blong Jemes. Yes, smoltaem afta we Jemes i ded, enjel blong Jeova i sevem Pita long ded. ?From wanem enjel ya i no bin sevem Jemes tu?​—Ol Wok 12:​1-​11.

Blong Mekem Ol Stampa Tingting Blong God Oli Kamtru

Blong kasem save from wanem God i lukaotgud long samfala, yumi mas kasem save se God i no jes protektem samfala blong bambae laef blong olgeta i longfala moa, no gat. Hem i mekem olsem blong protektem wan samting we i moa impoten, hemia blong mekem stampa tingting blong Hem i kamtru. Wan eksampel, Kristin kongregesen, olsem wan grup, i save sua blong stap laef from we hem i joen wetem stampa tingting blong God. Be, Jisas Kraes i talem klia long ol disaepol blong hem se wanwan blong olgeta oli save ded from bilif blong olgeta. Afta we Jisas i talem samting ya, hem i no talem se bambae God i mekem wan merikel blong sevem olgeta, be hem i se ‘man i mas stanap strong gogo kasem en.’ (Matyu 24:9, 13) From we God i protektem samfala man nomo, i no minim se hem i stap laekem sam man moa bitim sam narafala, no gat. God i yusum eni man we i stap long stret ples, blong mekem stampa tingting blong hem i kamtru we bambae i givim blesing long olgeta man.

From we ol Kristin oli save ded enitaem nating se oli stap mekem wok blong God, taswe oli mas gat stret tingting olsem ol trifala Hibru man blong God, we ol man Babilon oli wantem kilim i ded olgeta from we oli wosipim God. Oli talem long king blong Babilon se: “Sipos i olsem, God blong mifala we mifala i wosip long hem bambae i save sevem mifala. Aot long bigfala faea we i stap laet mo aot long han blong yu, O king, hem bambae i sevem mifala. Be sipos no, mifala i talem stret long yu, O king, se ol god blong yufala oli no God ya we mifala i wosip long hem, mo aedol ya we oli wokem long gol we yu putumap finis, bambae mifala i no save bodaon long hem.”​—Daniel 3:​17, 18.

Jeova i sevem Pita mo Jon from we oli mekem wan bigfala wok blong halpem stampa tingting blong God i kamtru. Hem i yusum Pita blong go visitim ol kongregesen blong mekem tingting blong olgeta i “strong moa,” mo blong raetem ol buk long paoa blong tabu speret. (Luk 22:32) Jon i raetem faef buk long Baebol mo hem i olsem wan ‘strongfala ston’ long faswan kongregesen.​—Galesia 2:9; Jon 21:15-​23.

Yumi no save talem stret, wetaem, mo olsem wanem Jeova i mekem disisen blong sevem ol man blong hem. Samting we yumi save sua long hem, hemia promes we Kraes i talem long ol man blong hem se bambae hem i stap wetem olgeta ‘oltaem, gogo wol ya i finis.’ (Matyu 28:20) Antap moa, bambae hem i stap ‘wetem yumi’ long wok blong prij we yumi mekem taem ol enjel blong hem oli lidim yumi. (Matyu 13:36-​43; Revelesen 14:6) Hemia sam samting we Baebol i talemaot klia long yumi, be long saed blong ol narafala samting, yumi no save stret olsem wanem God bambae i halpem wan man, mo hu man we bambae God i sevem hem. ?Olsem wanem sipos wan Kristin i harem olsem se God i bin protektem no i bin lidim hem long wan taem long laef blong hem? From we i no gat wan samting we i save pruvum samting ya mo i no gat wan samting we i soemaot se hem i gyaman tu, taswe i no gat wan man we i save jajem ol tok blong wan man olsem.

?God i No Gat Sore?

From we God i stap letem sam Kristin oli ded, ?samting ya i minim se hem i no gat sore? No gat. (Eklesiastis 9:​11) Jeova i stap mekem rod blong yumi save laef blong olwe, i no jes blong smoltaem nomo. Long ples blong hem antap we hem i save luk evri samting, hem i stap lidim ol samting blong mekem se ol wanwan man we oli laekem hem mo we oli kam long hem, oli save kasem wan gudfala laef blong olwe. (Skelem wetem Matyu 18:14.) Taem hem i mekem stampa tingting blong hem i kamtru, bambae hem i karemaot olgeta samting we oli mekem yumi safa long laef tede​—mo bambae i karemaot ded tu. Ol wok blong God oli bigwan tumas mo oli nambawan tumas, taswe samting ya i pusum Pol blong talem se: “!Tru! !Ol gudgudfala fasin blong God, waes mo save blong hem, oli dip tumas, oli bitim mak! !Man i no naf blong skelem ol jajmen blong hem, mo i no naf blong faenemaot ol rod blong hem!”​—Rom 11:​33, NW.

From we i no gat wan samting we i save seraotem yumi long lav blong God, ol wanwan Kristin oli no mas askem se ‘?Bambae God i protektem mi?’ be oli mas askem se ‘?Mi stap kasem blesing blong Jeova?’ Sipos yes, bambae hem i givim laef we i no save finis long yumi​—nomata wanem samting i hapen long yumi long laef blong yumi tede. Taem yumi skelem nambawan laef we i no save finis wetem ol trabol​—olsem ded​—long laef blong tede, yumi luk se ol trabol ya oli “no save stap longtaem” long wol ya.​—2 Korin 4:​17.

[Ol Futnot]