Oli Kakae Samting We Bambae Oli Harem Nogud From

MAN BLONG WEKAP! LONG INDIA I RAETEM STORE YA

OL GUDFALA singsing long radyo oli pulum ol man blong yusum samting ya. Ol man blong sinema oli leftemap samting ya long televisin, ol buk, mo ol nyuspepa, se hem i save givim wan laef we i moa glad mo wan fasin blong laef we i hae moa. Be ol smol raeting long ol pablisiti olsem, i givim woning se samting ya i save spolem helt. ?Wanem samting ya? Hem i wan samting we man i save kam slef blong hem mo i save spolem bodi, nem blong hem pan.

Sam man long Esia oli yusum pan, be long India, plante moa man oli yusum. Blong mekem pan long taem bifo, oli tekem betel nat we oli smasem, ale, oli meksemap wetem tabak mo sam narafala samting blong mekem i tesgud. Tabak mo betel nat, tufala samting ya i mekem se pan i pulum man blong dipen long hem. Nao oli putum ol samting ya long wan lif we oli kolem betel pepa. Fastaem, oli rabem lif ya wetem wan kaen bata we oli wokem long laem wetem wora we i kamaot long smol tri ya, kateju. Nao oli benem lif ya blong kavremap samting ya, mo oli putum fulwan samting ya i go long maot blong olgeta. Plante man oli yusum pan masala, hemia sem samting we oli meksemap olsem paoda. Oli putum samting ya long ol smosmol paket we ol man oli save karem isi nomo, mo we oli save yusum enitaem.

I tekem longtaem lelebet blong kakae samting ya, mo i mekem se man i gat plante spet. Taswe, hem i mas spet oltaem. Bighaf blong ol man we oli kakae pan, oli gat wan spesel ples blong spet long haos blong olgeta. Be afsaed long haos, ol man oli spet long rod no long wol blong ol haos nomo. Taswe, i gat ol braon mak olbaot long ol lada mo ples blong wokbaot, long ol bigfala haos long India.

Folem wan stadi blong Tata Institut blong Fandamental Risej, 10 pesen blong ol man we oli kasem kansa evri yia long India, oli kasem kansa blong maot—namba ya i tu taem antap long namba long ol narafala ples blong wol. Dokta R. Gunaseelan, we hem i katem maot mo fes blong ol man, i agri wetem ol narafala dokta blong katem man long India, se fasin blong kakae pan nao i mekem sik ya i kamaot olsem. Buk ya Indian Express i talemaot tok blong hem se: “Olgeta kaen pan oli save spolem maot.” Hem i talem se “i sua se pan i save givim kansa blong maot,” mo se “fasin blong kakae pan i openem rod blong kasem sik we i spolem fes blong man.” Taswe, taem man i kakae pan, i olsem we hem i kakae wan samting we bambae i harem nogud from.

[Tok blong pija 25]

Ten pesen blong ol man we oli kasem kansa long India, oli kasem kansa blong maot

[Credit Line]

WHO photo by Eric Schwab