Narakaen Anamol Ya Platypus

MAN BLONG WEKAP! LONG OSTRELYA I RAETEM STORE YA

FASTAEM we ol sayentis oli luk anamol ya platypus, oli no save se bambae oli makemaot hem long wanem kaen grup blong anamol. Anamol ya, we i kasem wan no tu kilo nomo, i wan samting we i narakaen olgeta mo we i daonem stret, olgeta bilif we ol sayentis oli gat. Mifala i singaotem yu blong save moa long saed blong smol anamol ya blong Ostre lya —wan naesfala anamol we i stap sem long man, mo we plante man oli laekem. Be, fastaem bambae yumi gobak long yia 1799 mo luk wanem bigfala toktok we i bin kamaot taem ol man blong sayens long Briten oli jes luk wan anamol olsem.

Wan buk i tokbaot Dokta Shaw, we hem i man blong wok wetem ol narafala dokta long Musium blong Briten, blong stadi long olgeta anamol mo bus, i se: “Hem i no save bilivim samting we hem i luk [long ae blong hem].” Dokta ya i gat tingting se “wan man i fasem maot blong wan dakdak i go [long bodi blong wan anamol we i gat fo lek]. Hem i traehad blong [karemaot] maot blong dakdak ya, mo kam kasem tede ol mak blong sisis we hem i yusum oli stap yet long skin blong anamol ya we i ded finis.”

Nating se ol sayentis ya oli faenemaot se skin blong anamol ya i prapa wan, be tingting blong olgeta i sapraes yet from samting we oli luk. Anamol ya platypus—we nem blong hem i minim “lek we i flat”—i gat fasin blong bonem pikinini we i sem mak olsem pijin, be tu, hem i gat titi blong givim melek long ol pikinini blong hem. Samting ya we i narakaen, i stanemap wan kwestin se: ?Anamol ya we i narakaen olgeta, hem i stap mekem eg, no nogat?

Afta long plante yia blong bigfala toktok mo rao, ol man oli faenemaot se platypus i rili stap mekem eg. Be, evritaem we oli faenemaot wan samting long saed blong anamol ya, i gat sam narafala kwestin oli kamaot. ?Wanem kaen anamol ya we (1) i stap mekem eg be i gat titi blong givim melek tu; (2) i gat hea be i gat maot blong dakdak tu; mo (3) bun blong hem i olsem ol anamol we oli famle blong lised, be long semtaem blad blong hem i sem mak long ol narafala anamol we blad blong olgeta i hot?

Sam taem biaen, ol sayentis oli agri se platypus hem i wan haf blong ol anamol we blad blong olgeta i hot, be hem i stap long kaen ya we oli kolem olgeta monotrem. Wan monotrem i sem mak lelebet long ol anamol we oli famle blong lised. Hem i gat wan hol nomo long bodi blong hem, blong mekem mo bonem eg blong hem, mo blong pispis mo sitsit long hem. I gat wan kaen narafala anamol nomo we i blong grup ya monotrem, hem i anamol ya we oli kolem echidna. Nem blong platypus long lanwis blong sayens hemia, Ornithorhynchus anatinus, we i minim “wan anamol we i olsem dakdak from maot blong hem i sem mak long famle blong ol pijin.”

Yumi Visitim Wan Platypus

Blong luk wan platypus, yumi save go long ples we oli kipim ol anamol, be i moa gud taem yumi faenem wan olsem long ples we hem i stap haed long bus—wan samting we i no gat plante man Ostrelya oli mekem yet. Blong faenem ol platypus ya mifala i go long is Ostre lya, long ol Blu Maonten blong Sidni. Olbaot long is saed blong Ostrelya i gat ol platypus long hem, be mifala i stat long ples ya fastaem.

Bifo we san i kam antap, mifala i kamtru long wan olfala brij we oli wokem long wud antap long wan naesfala reva we kolosap long hem i gat plante tri oli laen i stap. Wetem longfala tingting mifala i stap kwaet, mo lukluk olbaot raonabaot long reva ya blong traem faenem wan smol saen blong anamol ya long wora. I no longtaem mifala i kasem samting we mifala i wantem luk. Kolosap 50 mita antap long reva ya, wan narakaen samting i kamaot long wora, i stap swim i kam long mifala. Mifala i stanap we mifala i no muf wan pis.

Ol smosmol wef we oli kamaot long tufala saed blong maot blong hem we i olsem dakdak, i pruvum se hemia wan platypus ya. Ol smosmol wef oli kamaot from we platypus ya i stap graenem ol kakae we hem i bin pikimap mo holem i stap long maot blong hem taem hem i daeva i godaon long sanbij blong reva ya. Stampa kakae blong wan platypus hemia ol wom, ol smosmol bebet, mo ol naura blong reva, be sam samtaem hem i save kakae ol narafala samting bakegen, i dipen long weta.

?Yu yu sapraes from we saes blong platypus hem i smol nomo? Plante man oli sapraes olsem tu. Oli ting se platypus hem i raonabaot sem saes olsem wan biva no wan ota.a Be, olsem yu save luk, hem i smol moa i bitim ol puskat we plante man oli gat long haos blong olgeta. Ol man platypus oli save kasem 45 no 60 sentimita, mo kilo blong hem i save kasem 1 no 2.5 nomo. Ol woman platypus oli smol moa.

Wetem tufala lek blong hem long fored, hem i pusum hem mo i daeva blong wan no tu menet long wora blong swim i go aninit long brij. Tufala lek blong hem blong biaen, oli no bigwan olsem tufala long fored, taswe hem i no yusum olgeta blong swim, be tufala lek ya oli olsem stia blong hem mo oli folfolem tel blong hem nomo taem hem i stap swim. Tufala lek ya oli givhan tu long hem olsem angka we i holemtaet bodi blong hem i no muf taem hem i wantem haed.

!Sipos wan samting i mekem platypus i fraet, hem i save daeva wantaem nomo, mo yu save sua se bambae yu no luk hem bakegen! Taswe, mifala i save toktok nomo taem hem i stap aninit long wora. Wan long mifala i askem wetem smol voes se: “?Olsem wanem smol anamol ya i save stap hot gud, antap moa long koltaem, taem wora blong reva i kam kolkol olsem aes?” Platypus i no gat problem long saed ya, hemia from tu samting: bodi blong hem i wok long wan fasin we i spid, taswe samting ya i mekem hem i hot gud insaed, mo tu, hem i gat wan skin we i tik lelebet mekem se i holemtaet hot blong bodi i stap insaed.

Nambawan Maot Ya We i Olsem Dakdak

Maot blong platypus we i olsem dakdak, i sofsof smol olsem raba, mo hem i impoten tumas long hem. Hem i givhan long platypus blong filim mo harem save samting. Taem platypus i stap daon olgeta long reva, hem i tanem hed blong hem sloslou long wan saed i go long narasaed blong hem i harem save enikaen smosmol paoa blong lektrik we i stap raonabaot long hem. Ol paoa blong lektrik ya oli kamaot from bodi blong ol smosmol bebet we hem i wantem faenem blong kakae. Taem platypus i kamaot long wora, maot blong hem nao i lidim hem long ol ples raonabaot, from we ae, sora, mo nus blong hem oli fas.

!Lukaot Long Ol Nil Ya!

Sipos smol fren blong yumi ya hem i wan man platypus, tufala lek blong hem blong biaen oli gat nil we i joen wetem tu samting olsem paket long saed blong tufala lek blong hem, mo i gat posen i stap long tufala paket ya. Smol anamol ya i save sakem tufala lek blong hem wantaem nomo, mo stikim mit blong eni man no anamol we i mekem trabol long hem. Samting ya i sem mak olsem wan man we i sidaon long hos i stikim tufala saed blong hos blong mekem hem i ron. Smoltaem afta we platypus i stikim man no anamol olsemia, soa we man ya no anamol ya i harem i bigwan tumas mo ples ya we soa i stap long hem i save solap.

Be, sipos man i kasem wan platypus hem i save mekem platypus ya i kam kwaet olsem wan smol dog. Blong plante yia finis nao, Healesville Sanctuary, long Viktoria, i bin lukaot long ol smosmol anamol ya. Hem i ripotem se wan long ol faswan platypus we oli bin gat, hem i stap “soem hem blong plante haoa long fored blong ol visita, we i stap rolem hem i go raonraon olbaot blong ol man oli skrasem smol bel blong hem . . . Plante taosen man oli hivap i kam blong lukluk narakaen smol anamol ya.”

Platypus we mifala i bin stap wajem, i mekem laswan daeva blong hem blong dei ya jes bifo we san blong moning ya i kam antap long olgeta hil long is saed blong mifala. Long naet we i jes pas, hem i bin kakae bitim ten pesen moa long prapa wet blong hem blong kakae. Taem hem i klaemaot long wora, ol lek blong hem we oli flat, oli sat mo ol strong nel oli kamaot. Nao hem i go kasem wan long olgeta hol blong hem. Hem i waes blong digim hol ya i stap gud long rus blong ol tri blong mekem se haos blong hem i no save roten mo brokbrok. Ol hol we platypus i digim blong bonem ol eg blong hem long hem, i save kasem 8 mita, be ol narafala hol we hem i digim oli samwe long 1 mita kasem 30 mita. Long ol wanwan hol ya maet hem i digim plante narafala smosmol hol insaed long hem bakegen olsem ol branj blong tri. Ol hol ya oli gud tu from we oli givim proteksen agensem weta we maet i kolkol tumas no i hot bitim mak. Hemia ol gudfala ples blong woman platypus i bonem mo lukaot long ol bebi blong hem.

Taem Blong Bonem Eg

Long taem we ol tri oli putum flaoa, ol woman platypus oli go long wan long ol hol ya we i stap dip insaed long graon, we i gat smol gras i stap long hem. Nao hem i bonem wan no tri eg blong hem (plante taem oli mekem tu nomo) we saes blong olgeta oli bigwan olsem nel blong bigfala fingga nomo. Blong kipim ol eg blong hem oli hot gud, hem i rolem olgeta i stap long bel blong hem mo i holem oli stap gud wetem bigfala tel blong hem. Raonabaot ten dei nomo biaen, ol bebi oli brekem sel blong eg blong olgeta we i olsem skin nomo, nao oli tekem kakae blong olgeta long melek we i stap long titi blong mama blong olgeta. Woman platypus i lukaot long ol bebi blong hem, hem wan nomo, i no gat samting we i soemaot se man mo woman platypus oli stap tugeta oltaem.

Raonabaot long Febuwari, tri manis haf afta we ol smol bebi ya oli gru bigwan finis, oli rere nao blong swim. From we ol platypus oli no save laef plante tumas tugeta long wan ples, mekem se, samtaem biaen maet ol smol bebi ya oli go faenem wan narafala reva no ples blong wora blong stap long hem. Blong mekem olsem, samtaem oli mas pastru long ol ples we oli denja tumas long hem.

Ol platypus we man i kipim oli save laef bitim 20 yia, be olgeta we oli laef long bus, plante taem, oli no laef longtaem. Taem ples i drae no taem wora i kam antap bigwan, samting ya i kilim i ded ol platypus, no samtaem i gat ol anamol oli kakae olgeta, olsem ol goanna (hemia ol bigbigfala lised), ol wael dog, ol bigbigfala pijin, mo long not blong Kwinslan, ol krokodael tu. Be, samting we i mekem moa denja long ol platypus, hemia ol man. I no se, man i stap go long bus mo sutum no kilim i ded ol platypus (naoia loa i putum tabu finis long fasin blong kilim ol platypus), be, from wok blong man blong spolem bus we i hom blong ol platypus ya, mekem se plante oli stap ded.

Sipos wan taem yu go long Ostrelya, bambae yu save luk wetem prapa ae blong yu, narakaen smol anamol ya we i gat maot olsem dakdak long bus we i ples blong hem. I no gat wan narafala ples long wol we bambae yu save faenem anamol ya long hem. Tru long smol anamol ya platypus, bambae yu luksave bakegen wan narafala haf blong nambawan wok mo waes blong Man ya we i Wokem Olgeta samting—mo bambae yu luksave tu se hem i wan God we i laekem mekem man i glad from ol samting raonabaot.

[Futnot]

[Tok Blong Pija Long Pej 27]

Platypus i stap yusum lek blong hem we i flat, olsem wan stia

[Credit Line]

Courtesy of Taronga Zoo

[Tok Blong Pija Long Pej 27]

Platypus i smol moa i bitim wan puskat, hem i save kasem 1 no 2.5 kilo nomo

[Credit Line]

Courtesy of Dr. Tom Grant

[Tok Blong Pija Long Pej 27]

Maot blong hem we i olsem dakdak i halpem hem blong faenem kakae blong hem aninit long wora. (Platypus ya hem i stap long Healesville Sanctuary)

[Credit Line]

Courtesy of Healesville Sanctuary

[Foto Credit Line Blong Pija Long Pej 26]

Photo: Courtesy of Dr. Tom Grant