Aids Sik Ya i Gohed

KAREN i gruap long wes saed blong Yunaeted Stet.a Hem i wan Witnes blong Jeova, mo long yangtaem blong hem, hem i holemtaet ol stret fasin. Long 1984, taem hem i gat 23 yia, hem i mared long Bill, we i jes kam wan Witnes tu yia bifo. Tufala i glad tumas blong gat tu pikinini, wan boe mo wan gel.

Lav blong tufala i kam strong moa, mo kam kasem 1991 tufala i bin harem gud mo stap glad long laef blong tufala. Klosap long en blong yia ya, Bill i luk se hem i gat wan waet mak long tang blong hem, mo mak ya i no gowe. Ale, hem i go luk wan dokta.

I no longtaem biaen, Karen i stap klinim garen afsaed, wetem tufala pikinini. Nao, Bill i kam sidaon long fored blong haos mo i singaot Karen i kam sidaon wetem hem. Hem i putum han blong hem i goraon long Karen. Wota blong ae blong hem i ron taem hem i talem se hem i laekem Karen tumas mo se hem i wantem tumas blong laef wetem hem gogo i no save finis. Be, ?from wanem Bill i krae? From we dokta i ting se Bill i gat jem blong HIV, hemia jem we i givim AIDS long man.

Ful famle i mas pas blong mekem tes long dokta. Risal blong Bill mo Karen i soem se tufala i kasem jem blong HIV. Bill i bin kasem jem ya bifo we hem i kam wan Witnes blong Jeova, nao hem i pasem sik ya i go long Karen. Tufala pikinini oli no gat sik ya. Tri yia nomo biaen, Bill i ded. Karen i talem se: “Mi no save olsem wanem blong talem filing blong mi. Mi laekem hasban blong mi tumas, mo mi wantem laef wetem hem blong olwe. Mi harem nogud tumas taem mi stap luk we sloslou bodi blong hem i lusum paoa blong hem, mo hem i kam bunbun. Plante naet mi wokem krae nomo. Sipos hem i bin laef tri manis moa, bambae i mekem ten yia we mitufala i mared. Taem hem i laef yet hem i wan nambawan papa, mo wan nambawan hasban.”

Nating se dokta i talem se Karen tu bambae i ded smoltaem afta long hasban blong hem, be hem i laef yet tede. Jem ya blong HIV i stat blong kasem mak ya we bambae hem i kam AIDS.

Karen i wan long samwe 30 milyan man we tede oli laef wetem HIV/AIDS. Namba ya i bigwan moa i bitim namba blong olgeta man Ostrelya, Aerlan mo Paragwae tugeta. Long Afrika, oli ting se maet i gat 21 milyan man we oli gat sik ya. Yunaeted Nesen i ripotem se long stat blong ol yia 2000, maet namba ya bambae i kasem 40 milyan man. Wan narafala ripot blong Yunaeted Nesen i soemaot se sik ya i bitim olgeta bigfala sik long histri blong man. Jem blong HIV i kasem 1 long evri 100 man long wol, we oli gat bitwin 15 mo 49 yia mo we oli stap slip olbaot. Be, 1 long evri 10 man nomo long namba ya, oli save se oli gat sik ya. Long sam haf long Afrika, 25 pesen blong olgeta bigman oli kasem sik ya.

Stat long taem we sik ya AIDS i kamaot long 1981, i kam kasem naoia, hem i kilim i ded samwe long 11.7 milyan man finis. Mo long 1997 nomo, 2.3 milyan man oli ded from sik ya. Nating se i olsem, i gat sam niufala risen blong ting se ol man bambae oli winim faet ya agensem AIDS. Long ol yia we oli jes pas, namba blong ol man we oli stap kasem AIDS long ol kantri we oli rij, i no moa kam antap tumas. Mo tu, ol niufala meresin oli mekem man i bilif se bambae oli save gat wan helt we i moa gud, mo wan laef we i longfala moa.

?Yu save mekem wanem blong no kasem sik ya AIDS? ?Wanem ol niufala tritmen mo meresin we ol man oli faenem blong faetem sik ya? ?Wan dei sik ya i save finis olgeta? Bambae yumi tokbaot ol kwestin ya long ol haf we oli kam biaen.

[Futnot]