Tufala i No Moa Fraet Se En Blong Wol i Klosap
LONG ol yia 1970, Gary mo Karen tufala i stat tingting se en blong wol i klosap nomo. Ale, tufala i aot long taon mo tufala i go stap long wan ples afsaed long taon. Tufala i wantem stap tufala nomo. Tufala i no wantem dipen long ol narafala. Tufala i wantem stap laef taem en i kam.
Blong lanem olsem wanem blong mekem ol samting, tufala i pem ol buk, tufala i go long sam kos mo sam miting, mo tufala i askem advaes long plante man. Tufala i mekem wan garen blong legim mo tufala i planem 50 sotfala tri we oli save karem frut. Tufala i hivimap ol sid mo ol tul. Tufala i lanem olsem wanem blong planem garen mo kukum ol kakae blong oli stap longtaem. Wan fren i tijim tufala blong kilim anamol, katkatem mit blong hem, mo putum sol long mit blong i save stap longtaem. Karen i lanem olsem wanem blong luksave ol lif mo ol rus blong ol tri we tufala i save kakae sipos tufala i no moa gat kakae. Gary i lanem blong mekem bensin long kon, mo blong wokem wan oven long aean we faea i hotem, mo blong bildim wan haos wetem ol samting blong bus.
Karen i talem se: “Long taem ya, ol trabol long wol oli kam nogud tumas, ale mi harem olsem se i no longtaem laef blong ol man bambae i finis.” Gary i talem se: “Mi mekem sem mak olsem ol narafala yangfala. Mi traem blong mekem se ol man oli no moa seraot from kala blong skin, mi traem blong stopem Faet long Vietnam, mo ol kruked fasin. Be kwiktaem nomo, mi harem nogud from se samting we mi mi wantem, i no kamtru. Long tingting blong mi, i olsem we ol man bambae oli spolem olgeta nomo, sipos oli no jenisim fasin blong laef blong olgeta.”
Gary i talem se: “Wan naet, mi no gat samting blong mekem, ale mi karem wan Baebol, mo mi ridim buk blong Matiu kasem Revelesen. Long ol fo naet we oli kam biaen, sloslo mi ridim ol buk ya bakegen. Long moning blong namba faef dei, mi talem long Karen se: ‘Yumi stap long ol las dei ya. I no longtaem God bambae i klinim wol ya. Yumitu mas faenem olgeta we bambae oli laef i stap long taem ya.’” Gary mo Karen tufala i stat blong go long ol defren jos, blong traem faenem ol man we oli stap mekem rere from en blong wol.
Smoltaem biaen, wan Witnes blong Jeova i kilim doa blong tufala, mo hem i statem Baebol stadi wetem tufala. Karen i tingbaot taem ya, i se: “Mi harem gud tumas, from we brata ya i eksplenem gud ol vas. Mi stap lukaotem trutok long saed blong taem blong en, mo naoia mi faenem. I gat wan promes long saed blong fiuja, mo bambae i mas kamtru. Be samting we i gud moa se, mi stat blong fren wetem Papa blong mi long heven, we i Wokem olgeta samting, mo we i God blong olgeta samting long heven mo long wol.”
Gary i talem se: “Mi stap luk se laef blong mi i gat moa mining. Taem mi stat stadi Baebol, mi no moa save stop. Mi ridim ol profet tok, mi skelem ol pruf we i soemaot se ol profet tok ya oli stap kamtru, mo mi bilif strong se God bambae i tekem aksen i no longtaem. Mi stap tingting se, ‘Ol man oli mas rere, i no from wan disasta, be from laef ya we God i wantem se yumi ol man yumi kasem.’” Gary mo Karen tufala i kasem stret tingting long saed blong fiuja. Bitim we tufala i wari long saed blong en blong wol, tufala i bilif strong se God bambae i finisim ol trabol we oli stap kasem ol man tede, mo bambae hem i mekem wol ya i kam wan Paradaes.
Samting ya i hapen bitim 25 yia finis. ?Tede, Gary mo Karen tufala i mekem wanem? Karen i talem se: “Mi mi stap traehad blong kam strong moa blong lavem God mo blong bilif long hem. Mo mi traem blong halpem ol narafala blong mekem sem mak. Mi mo Gary, mitufala i givgivhan long mitufala blong mekem famle blong mitufala i strong mo i joen gud long wosip blong Jeova. Mitufala i traehad blong gat wan gudfala program, mo blong mekem se laef blong mitufala i no fasfas. Olsem nao, mitufala i save putum tingting blong mitufala i stap long wan samting nomo, hemia blong givhan long ol narafala mo givim ol save we oli nidim.”
Gary i talem se: “Oltaem mi prea se Kingdom blong God bambae i kam blong mekem se plante milian man we oli safa oli harem gud. Taem mi talemaot gud nius blong Kingdom blong God long wan man, mi prea blong mi mi naf blong givhan long hem, mo blong hem i putum tingting blong hem i stap strong long ol promes blong Baebol. Blong bitim 25 yia nao, Jeova i stap ansa long prea ya blong mi. Mi mo Karen, mitufala i bilif se klosap nao Jeova bambae i mekem wan bigfala jenis long wol, be mitufala i no moa fraet long en blong wol.”—Matiu 6:9, 10; 2 Pita 3:11, 12.
[Tok blong pija long pej 9]
Naoia Gary mo Karen tufala i glad blong halpem ol narafala blong oli bilif long promes we Baebol i tokbaot