!Naoia Mi Mi Glad Blong Stap Laef!

Dokta i talem long mi se: “?Yu save se bambae yu ded, no?” Samting we i narakaen se, tu taem finis bifo, sipos mi gat jans blong ded, mi mi glad nomo, from we hemia rod blong mi spel long ol trabol blong mi. Be, naoia i defren. Bambae mi eksplenem from wanem.

MI GRUAP long wan aelan we nem blong hem Long Aelan, wan smol ples jes afsaed long Nyu Yok. Long ples ya, papa blong mi i wan man blong draevem trak long ol resis, mo plante man oli save hem. Hem i wan man we i traehad blong mekem olgeta samting long fasin we i stretgud olgeta, mo hem i haremgud tumas blong winim ol narafala. Mo tu, hem i wan man we fasin blong hem i stap jenis oltaem, mo i hadwok blong mekem hem i glad. Mama, hem i defren olgeta. Hem i laekem pis mo i gat kwaet fasin. Hem i fraet tumas long ol resis long trak we Papa i stap mekem taswe, hem i no save go lukluk olgeta.

Taem mi mo brata blong mi i smol nomo, mitufala i lan blong no mekem tumas noes long haos mo no mekem Papa i kros, hemia wan samting we Mama i lan long hem finis. Be i no isi blong mekem olsem. Mifala evriwan i fraet bigwan long Papa. Samting ya i gat paoa long laef blong mi from we biaen, oltaem mi harem se mi no naf blong mekem wan gudfala samting. Fasin ya blong no tinghae long mi wan, i kam antap moa taem mi kam yangfala, nao wan “fren” blong famle i mekem nogud long mi long saed blong seks. From we mi no save winim ol nogud filing blong mi, mi traem blong kilim mi wan i ded. Hemia nao faswan taem we mi wantem ded, from we hem i rod blong kam fri long ol trabol ya.

Mi harem se mi nating nomo mo se i no gat man i laekem mi, nao mi no moa wantem kakae. Hemia wan sik we i kasem plante yangfala woman we oli no tinghae long olgeta. Mi stat mekem eni samting long laef blong mi we mi save haremgud long hem, mi tekem drag, drong, slip olbaot, mo mi kilim i ded ol bebi we mi gat bel long olgeta tu—olsem toktok blong wan singsing i talem se mi “traem faenem lav long olgeta rod we oli nogud.” Mi joen long spot blong draevem moto, resis long trak, mo daeva long solwora, mo sam samtaem mi mekem trep i go long Las Vegas blong plei laki. Mo tu, mi stap go luk wan kleva blong talemaot fyuja blong mi, mo mi yusum Ouija board blong pleplei wetem ol rabis speret. Mi no luksave se fasin ya blong pleplei wetem ol devel i wan denja.—Dutronome 18:10-12.

Mo tu, fasin ya blong wantem mekem ol samting we mi nomo mi haremgud long hem, i pulum mi blong brekem loa, olsem salem drag mo stil long stoa. Mo tu, from we mi wantem se narafala i laekem mi mo i agri long mi, ale, mi gat plante boefren, mo mi promes blong mared wetem sam long olgeta. Olgeta samting ya oli joen wanples blong mekem se laef blong mi i stap long wan denja we mi mi no luksave.

Wan naet, afta we mi dring alkol mo tekem drag long wan stad we ol trak oli mekem resis long hem, mi letem boefren blong mi i karem mi long trak i gobak long haos. Fasin ya i no waes from we taem alkol mo drag ya i kilim mi, mi mi slip ded, mo sem samting i hapen long hem. Nao wan bigfala noes i wekemap mi, hemia noes blong akseden. Mi slip long hospital from plante kil we mi kasem, be biaen mi kamgud bakegen. Ni blong mi nomo i no kamgud fulwan.

Mi Wantem Wan Wol We i Moagud

Nating se mi no laekem laef blong mi nating, mi rili wari long laef blong ol pikinini mo ol anamol, se oli mas stap sef mo oli gat raet blong kasem sam samting long laef blong olgeta. Mi wari tu long wol ya se, man i mas lukaotgud long hem. Mi mi wantem tumas blong luk wan wol we i moagud. Taswe, blong halpem ol man blong mekem wol i kamgud, mi mi joen long plante defren grup. Samting ya nao, we mi wantem tumas se wol i kam moagud, i pulum mi blong lesin long ol tok we wan fren blong mi long wok i stap talem. Hem i wan Wetnes blong Jeova. Oltaem nomo, taem i gat wan trabol long wok, hem i stap tokbaot “rabis wol blong naoia” olsem we hem i kros long hem. Taem mi askem hem wanem mining blong tok ya, hem i eksplenem se, i no longtaem, bambae yumi no moa gat ol wari long laef blong yumi. From we mi gat bigfala respek long hem, mi lesingud mo mi intres long ol tok blong hem.

Sore tumas, biaen mi no moa luk hem bakegen, be mi neva fogetem ol samting we hem i bin talem. Mi luksave se mi mas mekem sam bigfala jenis long laef blong mi blong mekem se God i glad long mi. Be mi no rere yet. Nating se i olsem, oltaem mi stap talemaot long ol boefren blong mi se wan dei bambae mi mi kam wan Wetnes mo sipos oli no laekem samting ya, i moagud blong no moa fren mo tingting blong mared wetem mi.

From samting ya, laswan boefren blong mi i wantem save moa. Hem i talem se sipos mi mi intres long saed ya, maet hem tu i save intres. Taswe, mitufala i traem faenem ol Wetnes. Be, olgeta nao oli faenem mitufala taem oli kam kilkilim doa long haos blong mi. Mitufala i stat blong stadi Baebol, be biaen, boefren blong mi i stop mo i jusum blong gobak long waef blong hem.

Mi mestem Baebol stadi blong mi plante taem. I tekem longtaem blong mi agri long tingting blong Jeova se laef i wan tabu samting. Be, taem mi stretem tingting blong mi, mi luksave se mi mas stop blong joen long spot ya skaedaevinga mo fasin blong smok tu. Taem mi stat blong tinghevi long laef, mi rere nao blong stap kwaet mo no folem ol spot mo fasin we oli denja. Long Oktoba 18, 1985, mi tekem baptaes long wora blong soemaot se mi givim laef blong mi long Jeova. Long taem ya, mi no save nating se smoltaem biaen bambae laef blong mi i stap long bigfala denja.

Bakegen Mi Wantem Ded Nomo

Sam manis biaen—long naet blong Maj 22, 1986—mi stap long fored blong haos blong mi, mi stap tekemaot klos we i stap insaed long trak blong mi, nao wan trak we i spid tumas i bangem mi. !Hem i pulum mi i go bitim 30 mita longwe long trak blong mi! Trak ya we i kilim mi i no stop, hem i spid i go, we i livim mi mi stap long rod. Nating se mi kasem bigfala kil long hed blong mi, ae blong mi i no dak nating long fultaem ya we trak ya i stap pulum mi i go.

Mi stap slip long rod we fes blong mi i stap long graon mo ples i tudak. Wan tingting nomo i stap long hed blong mi, hemia se mi no wantem nating we wan narafala trak i kam bangem mi bakegen. Soa we mi kasem i bigwan tumas, i bitim wanem we mi naf blong sapotem. Taswe, mi prea bakegen mo bakegen long Jeova blong hem i letem mi mi ded nomo. (Job 14:13) Wan woman i kamtru, hem i wan nes. Mi askem long hem blong stretem ol leg blong mi, from we mi filim se oli brobrok olbaot. Afta we hem i mekem olsem, hem i terem dres blong hem mo i putum i goraon long leg blong mi we i gat plante kil, blong blokem blad we i ron. !Sam man oli faenem sus blong mi longwe moa, mo oli fulap long blad!

Ol man we oli pas long rod, oli no luksave se akseden ya i hapen taem mi stap long saed blong rod, ale, oli askem mi se trak blong mi i stap wea. !Mi no save se trak ya i pulum mi mi kam longwe olsemia, tingting blong mi se mi stap kolosap nomo long hem! Taem trak blong hospital i kam, oli ting se bambae mi mi ded. Ale, oli singaotem polis i kam, from we sipos wan man i ded long akseden blong trak, loa i save panisim hemia we i mekem akseden ya. Biaen, polis i holem man ya we i bangem mi long trak blong hem. Oli blokem eria ya we akseden i hapen long hem, olsem oli mekem taem wan man i kilim narafala man i ded, mo oli karem trak blong mi olsem pruf blong samting ya. Trak blong man ya i bin pulumaot tufala doa we oli stap long wan saed blong trak blong mi.

Fesem Wan Bigfala Trabol

Nating se mi gat wan samting long maot blong mi blong givim win long mi, taem oli karem mi mi go long hospital, mi stap talem bakegen mo bakegen, se: “Mi no wantem blad, mi no wantem blad. !Mi mi wan Wetnes blong Jeova!” Laswan samting we mi mi rimemba, hemia taem oli stap katemaot ol klos long bak blong mi, mo mi harem voes blong olgeta we oli wok, oli stap singaot bigwan mo givim oda.

Taem mi wekap, mi sapraes se mi laef i stap yet. Mi stap slip mo wekap plante taem olsem. Evri taem we mi wekap, mi askem famle blong mi blong givim nyus blong mi long man mo woman we tufala i stap mekem Baebol stadi long mi. Famle blong mi oli no glad nating se mi mi kam wan Wetnes, taswe oltaem oli gyaman se oli “fogetem” blong pasem mesej i go long tufala ya. Be mi gohed blong askem sem samting—hemia i faswan samting we mi askem evri taem we mi openem ae blong mi. Fasin blong mi blong askem bakegen mo bakegen i wok, from we wan dei mi wekap, mo tufala ya i stap kolosap long mi. !Mi haremgud tumas! Naoia ol man blong Jeova oli save ples we mi stap long hem.

Be glad blong mi i blong smoltaem nomo, from we bodi blong mi i stap lusum tumas blad mo mi kasem wan fiva we i strong tumas. Ol dokta oli karemaot sam bun long leg blong mi from we oli ting se maet wan soa i stat insaed, ale, oli putum fo pis aean we oli olsem bun, oli go insaed long leg blong mi. Be i no longtaem, strong fiva i kasem mi bakegen, mo leg blong mi i kam blak. Hem i stat blong kam rotin, mo sipos mi wantem laef, oli mas katemaot leg ya.

Traem Fosem Mi Blong Tekem Blad

From we mi stap lusum tumas blad, ol dokta oli tingting se bambae oli mas givim blad long mi taem oli katem mi. Ol dokta, ol nes, ol famle blong mi, mo sam gudfala fren blong bifo, oli kam blong traem fosem mi blong tekem blad. Ale, sam dokta oli stat toktok smol long doa blong mi. Mi harem olgeta oli stap mekem wan plan, be mi no kasem save long plan ya. Laki nomo, wan Wetnes we i visitim mi long taem ya, i harem tok blong olgeta se bambae oli traem fosem mi blong tekem blad. Kwiktaem nomo, hem i go talemaot samting ya long ol Kristin elda, mo olgeta ya oli kam blong sapotem mi.

Oli singaot wan dokta we i stretem ol trabol long tingting, i kam blong luk sipos mi lusum tingting blong mi. I klia se oli wantem we dokta ya i talem se mi no naf blong mekem prapa disisen blong mi, nao olgeta oli save agensem samting we mi mi wantem. Plan ya i no wok. Ale, wan lida blong jyos we hem i bin tekem blad, i kam luk mi blong mekem mi mi bilif se sipos mi tekem blad i oraet nomo. Oli mekem gogo, famle blong mi i askem kot blong givim oda blong fosem mi blong tekem blad.

Raonabaot long tu klok long moning, wan grup blong dokta, wan sekretari blong kot, wan polis, sam loea we oli sapotem disisen blong hospital, mo wan jaj, oli kam long rum blong mi long hospital. Ale, kot i stat. I no gat wan man i talemaot samting ya long mi fastaem, mi no gat wan Baebol, i no gat wan loea blong sapotem mi, mo tingting blong mi i no klia from mi tekem tumas meresin blong mekem soa blong mi i godaon lelebet. ?Wanem i kamaot biaen? Jaj i talem se ol toktok long kot ya oli no tru, mo se naoia hem i laekem moa strong bilif blong ol Wetnes blong Jeova i bitim bifo.

Wan hospital long Kamden, Nyu Jesi, i agri blong lukaot long mi. Ol dokta long hospital ya long Nyu Yok oli kros tumas, nao oli blokem ol nes blong no moa lukaot long mi, mo oli no moa givim meresin long mi blong daonem soa. Mo tu, oli no agri blong letem helikopta i kamdaon long graon blong hospital blong tekem mi mi go long narafala hospital ya long Nyu Jesi. Mi tangkyu se mi no ded from trep long trak blong hospital we i tekem mi i go long narafala hospital ya. Taem mi kasem hospital ya, oli talem long mi ol tok we i stap long fashaf blong store ya: “?Yu save se bambae yu ded, no?”

Ol Samting Oli Rongud Taem Oli Katem Mi

Mi slak tumas mekem se wan nes i mas halpem mi blong putum wan mak long pepa blong hospital blong agri se ol dokta oli save katem mi. Oli mas katemaot raetsaed leg blong mi jes antap long ni. Afta long samting ya, mi lusum moa blad gogo i godaon aninit long namba 2, mo ol dokta oli ting se samting ya i spolem bren blong mi. Oli talem olsem from we taem oli singaotem mi se, “Virginia, Virginia”—hemia nem we i stap long ol pepa blong mi—oli luk se mi mi no ansa. Be, samtaem biaen, taem mi harem wan smol voes i singaot se “Ginger, Ginger,” mi openem ae blong mi. Wan man we mi neva luk hem bifo, i stanap i stap.

Bill Turpin i wan Wetnes blong Jeova long Nyu Jesi. Hem i save smol nem blong mi, Ginger—hemia nem we ol man oli yusum blong singaot mi long ful laef blong mi. Sam Wetnes blong Nyu Yok oli bin talem nem ya long hem. Hem i askem ol kwestin mo mi jes satem ae blong mi nomo blong ansa long olgeta. Mi no save toktok from we samting blong givim win long mi i stap blokem maot blong mi. Hem i askem se: “?Yu yu wantem se mi kam luk yu bakegen, mo mi talem long ol narafala Wetnes long Nyu Yok se yu yu stap long ples ya?” !Mi glad tumas, mekem se mi satem ae blong mi plante taem blong talem yes! Brata Turpin i kam long rum blong mi long fasin haed, from we famle blong mi i bin givim oda se ol Wetnes oli no mas kam visitim mi.

Afta long sikis manis long hospital, mi naf blong mekem sam samting nomo we yumi nidim blong mekem evri dei, olsem kakae mo brasem tut blong mi. Samtaem biaen, oli givim wan gyaman leg long mi, mo mi naf blong wokbaot smol wetem wan wud blong sapotem mi. Taem mi aot long hospital long Septemba 1986 mo mi gobak long rum blong mi, wan nes i kam stap wetem mi blong kolosap sikis manis blong givhan long mi.

Ol Brata Oli Givhangud

Taem mi stap long hospital yet, mi stat gat trufala tangkyu we mi stap long wan bigfala Kristin famle blong ol brata mo sista. (Mak 10:29, 30) Ol brata mo sista ya oli no jes soemaot lav taem oli givim ol samting we mi nidim long saed blong bodi, be long saed blong speret tu. From we oli givhan long mi wetem lav, mi save go long ol Kristin miting bakegen mo, samtaem biaen, mi joen long wok blong prij we oli kolem haftaem paenia.

Plante taem, i tekem faef yia blong kot i putum wan stret dei blong jajem wan bisnes olsem hemia blong mi, be oli stretem blong mi long sam manis nomo—wan samting we i mekem loea blong mi i sapraes. Wetem mane we mi kasem long man ya we i mekem akseden long mi, mi naf blong muf i go long wan narafala haos we i moa gud. Mo tu, mi pem wan bas we i gat wan smol enjin blong leftemap wiljea blong mi i go insaed long hem, mo mi save draevem we mi no nid blong yusum leg blong mi, mi save wokem ol samting wetem han blong mi nomo. Taswe, long 1988, mi kam wan fultaem paenia, we mi prij blong samwe long 1,000 haoa evri yia. Long ol yia we oli pas, mi glad tumas blong mekem wok ya long ol ples olsem Not Dakota, Alabama, mo Kentaki. Bighaf blong ol 150,000 kilomita we mi bin ron wetem bas blong mi, oli long Kristin wok blong prij.

I gat sam fani samting oli bin hapen long mi taem mi ron long smol moto blong mi we i gat tri wil. Tu taem mi bin kafsaed long moto ya taem mi stap prij wetem waef blong seket elda. Wan taem, long Alabama, mi mekem wan mastik taem mi ting se mi save jyam ova long wan smol krik long moto ya be, mi foldaon long graon mo sofmad i fulap long mi. Nating se i olsem, oltaem mi laf nomo long ol samting ya we oli hapen mo mi traem blong no kam sore tumas from. Long rod ya, mi naf blong holem wan tingting we i stret mo i strong oltaem.

Wan Hop We Yumi Sua Long Hem i Mekem Mi Mi Strong

Samtaem ol problem we mi kasem long bodi blong mi oli kam bigwan tumas long mi. Sam yia i pas finis, mi mas stopem wok blong paenia tu taem, from we ol dokta oli bin ting se maet oli nidim blong katemaot narafala leg blong mi. Oltaem naoia denja i stap se mi save lusum narafala leg ya. Long ol faef yia we oli jes pas, mi save wokbaot nomo long wiljea. Long 1994, mi brekem han blong mi. From samting ya, mi nidim man blong halpem mi blong swim, putum klos, kuk, mo klinim haos, mo blong karem mi i go olbaot. Be, from help we ol brata sista oli givim, mi naf blong gohed long wok blong paenia long hadtaem ya.

Long ful laef blong mi, mi bin mekem ol samting we mi ting se oli save mekem mi mi haremgud, be naoia mi luksave se taem we mi rili save haremgud i stap yet long fyuja. Mi mi bilif strong se bambae God i finisim olgeta sik long nyufala wol ya we bambae i kamtru i no longtaem. Samting ya i mekem se naoia mi mi glad we mi laef i stap. (Aesea 35:4-6) Long nyufala wol ya, mi wantem tumas blong swim wetem ol welfis mo ol dolfin, wokbaot antap long ol bigfala hil wetem wan laeon mo ol pikinini blong hem, mo mekem sam narafala samting we oli isi nomo, olsem wokbaot long sanbij. Mi glad tumas blong tingbaot paradaes long wol ya we bambae mi gat jans blong mekem olgeta samting we God i wantem se yumi haremgud long olgeta.—Ginger Klauss i talem store ya.

[Futnot]

[Tok Blong Pija Long Pej 21]

Taem fasin blong plei laki hem i wan haf blong laef blong mi

[Tok Blong Pija Long Pej 23]

Ol promes blong God oli givim paoa long mi