Ol Yangfala Oli Askem . . .

?Mi Save Mekem Wanem Blong Oli No Putum Fol Long Mi Oltaem?

“Oltaem nomo oli talem se i fol blong mi. Sipos wan man i fogetem blong lokem doa, hemia fol blong mi. !Sipos oli no kilim faea, no sam samting oli stap olbaot, no wan wok i stap yet blong mekem, be oltaem hemia fol blong Ramon!”—Ramon.

TAEM yu yu yangfala, samtaem i luk olsem se evri trabol we i kamaot, be papa mama oli putum long yu. I tru se, samtaem ol papa mama oli kwik tumas blong putum fol long pikinini blong olgeta.a I save gat plante risen blong samting ya, maet tufala i wari lelebet olsem olgeta papa mama, no maet tufala i trabol bigwan long filing blong tufala. Be nomata wanem risen blong samting ya, yu save harem nogud tumas mo yu save sem tu, taem papa mama i putum fol long yu oltaem from sam samting we yu no bin mekem.

Yes, from we yumi sinman, sam samtaem yumi mekem mastik. (Rom 3:23) Mo tu, from we yu yu yangfala, i gat plante samting we yu no gat save long olgeta yet. (Proveb 1:4) Taswe, samtaem maet yu no skelemgud wan samting, ale bambae yu mekem mastik. Taem yu mekem mastik, i stret nomo we yu mas luksave rong blong yu.—Eklesiastis 11:9.

?Yu mas mekem wanem taem papa mama i tok long yu from wan samting we i fol blong yu? Sam yangfala oli mekem olsem we papa mama i no gat raet blong tok long olgeta. Maet oli kros mo oli tokbak long papa mama blong olgeta se tufala i stap putum fol long olgeta oltaem. ?Wanem i save kamaot from? Ol papa mama oli no moa save se bambae oli mekem wanem ale, oli save kam strong moa long yangfala ya blong traem mekem hem i luksave. Baebol i givim advaes ya se: “Man we i krangke, hem i ting nating long fasin waes mo fasin stretem. Pikinini boe blong mi, lesin long papa blong yu we i stretem yu, mo yu no mas sakemaot loa blong mama blong yu.” (Proveb 1:7, 8) Taem yu luksave rong blong yu mo yu stretem, yu save lanem samting from mastik ya.—Hibrus 12:11.

“Storeyangud” Wetem Papa Mama

Be, i defren olgeta taem papa mama i tok long yu from ol samting we oli no fol blong yu, antap moa, sipos tufala i mekem olsem ya bakegen mo bakegen. I klia se, bambae yu harem we samting ya i no stret nating, mo bambae yu kros from. Maet yu wantem mekem stronghed, from we nating se yu traehad blong mekem i gud, tufala i gohed nomo blong putum fol long yu. (Eklesiastis 7:7) Be, sipos yu mekem sam fasin blong givimbak, bambae yu spolem tufala mo yu spolem yu wan bakegen. (Skelem wetem Job 36:18.) Proveb 15:22 i soemaot wan narafala rod we i moagud, i se: “Ol plan bambae oli folfoldaon sipos ol man oli no storeyan gud fastaem.” Yes, wan rod blong jenisim fasin ya we papa mama i stap mekem long yu, hemia blong talemaot filing blong yu long tufala.

Fastaem, traem faenem samting we Baebol i kolem se “stret taem.” (Proveb 15:23) Clayton Barbeau, wan man blong raetem buk, i givim advaes ya se: “Jusum wan taem mo ples we yufala evriwan i kwaet, i no kros, mo yufala i haremgud.” Baebol i givim woning ya tu, se: “Wan tok we i stikim man i mekem kros i kamaot.” (Proveb 15:1) Taswe, traem soem kaen fasin mo respek taem yu toktok wetem tufala, i nogud yu rao. Traehad blong holemtaet kros blong yu. (Proveb 29:11) I nogud we yu jajem papa mama blong yu (olsem tok ya se, ‘!Yutufala i stap putum fol long mi oltaem from evri samting!’). I moagud we yu traem eksplenem se yu yu harem olsem wanem taem tufala i tok long yu from wan samting we i no fol blong yu. (‘Mi harem nogud tumas long filing blong mi, taem yutufala i tok long mi from wan rong we mi no mekem.’)—Skelem wetem Jenesis 30:1, 2.

I sem mak taem papa mama i kros long yu, jes from we tufala i no kasem savegud long wan samting. Wan taem, papa mama blong yangfala Jisas oli harem nogud from oli no save faenem hem. Be Jisas i no krae mo tok kros long tufala. No gat. Long kwaet fasin, hem i talemaot klia wanem i bin hapen. (Luk 2:49) Taem i gat wan trabol olsem, i gud we yu traem soem fasin blong bigman mo toktokgud wetem papa mama blong yu. !Yu mas tingbaot se tufala i harem nogud from we tufala i rili kea long yu! Lesingud mo soem respek. (Proveb 4:1) Yu mas wet se kros blong tufala i godaon bifo we yu stat talemaot filing blong yu.

‘Pruvum Se Wok Blong Yu i Olsem Wanem’

Be, ?from wanem sam papa mama oli kwik blong putum fol long pikinini blong olgeta? Blong talem stret, samtaem ol yangfala oli mekem se papa mama i no trastem olgeta. Proveb 20:11 i talem se: “Wan boe i save soemaot long ol fasin blong hem, sipos ol wok blong hem oli klin mo stretgud.” ?Ol “fasin” blong yu oli soem wanem long papa mama blong yu? ?Oli soemaot se wok blong yu i “stretgud” mo yu tinghevi long wanem we yu stap mekem? no ?Oli soemaot se yu olbaot mo yu no stap tingtinggud? Sipos i tru se yu olbaot mo yu no stap tingtinggud, yu no mas sapraes we papa mama blong yu oli kwik blong putum fol long yu. Ramon, we yumi tokbaot fastaem finis, i talem long saed blong papa mama blong hem we oli stap tok long hem oltaem, i se: “Mi mas agri, samtaem tingting blong papa mama blong mi i stret taem tufala i no trastem mi.”

Sipos samting ya i tru long saed blong yu, yu save mekem wan samting nomo. Yu mas soem se yu no moa folem fasin we yu bin mekem bifo. Sipos yu mekem ol fasin we oli pulum papa mama blong yu blong trastem yu, mo yu soem se yu tinghevi long wok we tufala i givim long yu, sloslou bambae tufala i luksave se fasin blong yu i jenis, mo tufala i save trastem yu.

Store blong Ramon i soemaot samting ya. Ol fren mo famle blong hem oli stap singaotem hem se, tija we hed blong hem i lus, from we hem i stap fogetem ol samting. ?Olsem wanem? ?Papa mama blong yu oli putum wan nem long yu tu, olsem “pikinini we i no gat hed,” no “man blong les”? Woman blong raetem ol buk, nem blong hem Kathleen McCoy, i talem se maet ol papa mama oli singaotem pikinini blong olgeta long ol nem olsemia, “from we oli wantem soemaot wan slak fasin blong yangfala, blong hem i save luksave mo jenisim fasin ya.” Be samtaem, olkaen tok olsem oli save spolem ol dip filing blong yangfala. Nating se i olsem, Ramon i luksave se smol nem ya we oli bin putum long hem, i soemaot wan samting we i tru long saed blong hem. Hem i talem se: “Tingting blong mi i fas i stap long wan samting nomo oltaem, mekem se mi stap lusum olting olsem ol ki no homwok blong mi, mo mi stap fogetem blong mekem wok blong mi long haos.”

Taswe, Ramon i jenisim fasin blong hem. Hem i tingtingbak, i se: “Mi stat blong kasem save se mi mas tinghevi long wok blong mi, mo se i gat samfala wok we oli impoten moa long ol narafala samting. Mi mekem wan plan mo mi stat tinghevi long stadi we mi mekem mi wan long Baebol. Mi luksave se Jeova i tingbaot ol smol samting, se oli impoten olsem ol bigfala samting.” (Luk 16:10) Taem Ramon i mekem ol rul blong Baebol oli wok long laef blong hem, sloslou ol man oli no moa jikim fasin blong hem blong fogetem ol samting. ?From wanem yu no traem mekem i sem mak? Mo sipos papa mama blong yu oli singaot yu long wan smol nem we i mekem yu yu harem nogud, i gud yu tokbaot samting ya wetem tufala. Maet bambae tufala i kasem save long filing blong yu.

Oli Laekem Brata No Sista Blong Yu Moa

Samtaem, maet yu ting se papa mama blong yu i laekem brata no sista blong yu moa, taswe oltaem tufala i stap putum fol long yu. Ramon i tingtingbak, i se: “Ol bigfala brata mo sista blong mi oli save kamhom let, mo papa mama i no tok long olgeta. Be, sipos mi mi kamhom let, oli tok bigwan long mi.” Wan man blong Gyana, nem blong hem Albert, i tingbaot se hem i bin gat ol semfala filing taem hem i yangfala. Hem i bin ting se mama blong hem i stretem hem long fasin we i strong moa, i bitim brata blong hem.

Be, maet tingting we yumi gat long wan samting i no rili stret oltaem. Plante taem, ol papa mama oli letem ol pikinini we oli bigwan finis oli mekem moa samting. Be hemia i no from we oli laekem olgeta moa i bitim yu. No gat. Tufala i save se ol pikinini we oli bigwan moa, oli naf blong tinghevi long fasin we oli mekem. Mo tu, maet i gat sam narafala samting we oli mekem se papa mama i gat fasin olsem. Albert i talem se papa mama blong hem oli neva kilim brata blong hem blong stretem hem, from we hem i “smol mo i stap siksik oltaem.” Sipos papa mama i luksave se wan pikinini i gat sam spesel nid no hem i no naf blong mekem sam samting, ?yu ting se i stret blong talem se tufala i laekem pikinini ya moa i bitim ol narafala pikinini blong tufala?

I tru se sam papa mama oli laekem moa wan pikinini i bitim ol narafala. (Skelem wetem Jenesis 37:3.) Albert i tokbaot brata blong hem we i sik, i se: “Mama i gat spesel filing long hem.” I gud se lav we ol Kristin oli gat i bigwan, mekem se oli save laekem plante man wantaem. (2 Korin 6:11-13) Taswe, nating se papa mama blong yu i gat “spesel filing” long brata no sista blong yu, samting ya i no minim se tufala i no moa gat lav blong givim long yu. Bigfala samting we yu mas tingbaot se, ?Tufala i stap mekem nogud long yu, we oli putum fol long yu oltaem, jes blong mekem i gud moa long brata no sista blong yu? Sipos i tru olsem, yu mas talemaot filing blong yu long tufala. Long kwaet mo stret fasin, talem sam eksampel blong soem se tufala i bin mekem i moagud long brata no sista blong yu i bitim yu. Maet tufala i lesin.

Ol Famle We Oli Gat Problem

Yumi mas luksave se, i no oltaem we yumi naf blong jenisim fasin blong famle blong yumi. Samfala papa mama oli mekem pikinini blong olgeta i sem no oli daonem olgeta, from we hemia fasin blong olgeta longtaem finis i kam. Ating hemia i tru moa long ol papa mama we oli gat bigfala problem long filing blong olgeta, no we oli stap traehad blong winim wan nogud fasin we i holem olgeta. Long ol taem olsem, maet yu no winim wan samting sipos yu traem tokbaot problem ya wetem olgeta. Sipos famle blong yu i olsem, yu mas luksave se yu yu no save stretem ol problem blong papa mama blong yu. Maet tufala i nidim blong askem help long wan we i gat save long problem blong tufala. Beswan samting we yu save mekem, hemia blong soem ona mo respek long tufala, mo traehad blong no rao wetem tufala blong nating nomo. (Efesas 6:1, 2) Proveb 22:3 i talem se: “Man we i waes, i haed taem hem i luksave se trabol bambae i kamaot.”b

Long semtaem, traem faenem wan we i no famle blong yu, blong givhan long yu. Toktok wetem wan bigman we i gat waes tingting, maet wan Kristin elda. Taem yu harem se narafala i laekem mo i kea long yu, samting ya i save daonem filing ya se evri mastik i fol blong yu. Mo tu, ‘kam kolosap long God.’ (Jemes 4:8) Nating se samfala oli tok long yu from wan samting we i no fol blong yu, tingbaot se “[God] i no save gogohed blong tok strong long man, mo kros blong hem i no save stap olwe. . . . Hem i savegud we hem i mekem yumi long graon. Oltaem hem i stap tingbaot we yumi kamaot long ases nomo.” (Ol Sam 103:9, 14) Taem yu save se yu sas long ae blong God, yu yu naf blong blokem nogud filing we i save kamaot taem papa mama i tok long yu from ol samting we oli no fol blong yu.

[Futnot]

[Tok blong pija long pej 21]

Yumi save lanem plante samting sipos yumi luksave ol mastik blong yumi