Paradaes We i No Moa Gat Trabol Long Hem Kolosap Nao Bambae i Kamtru

“BAMBAE yu yu stap wetem mi long paradaes.” !Ol tok ya oli bin mekem wan man blong brekem loa i haremgud! Hem i no ting se bambae hem i go antap long heven afta we hem i ded, blong ronwe long panis blong helfaea. No gat. Stilman ya we i hang long wan pos kolosap long Jisas, i haremgud long hop blong laef bakegen long ded, taem bambae wol ya i kam Paradaes bakegen. Plis, makemgud hu nao i bin talem nambawan tok ya long saed blong Paradaes—hemia Jisas Kraes, stret Pikinini blong God.—Luk 23:43.

?Wanem i pulum Jisas blong mekem promes ya blong Paradaes? Stilman ya i bin askem long hem se: ‘Taem we bambae yu kasem kingdom blong yu, . . . plis yu tingbaot mi bakegen.’ (Luk 23:42) ?Wanem ya Kingdom ya, mo olsem wanem i joen wetem paradaes long wol ya? ?Olsem wanem promes ya i soem se bambae Paradaes ya i no moa gat trabol long hem?

Paoa Biaen Long Paradaes Ya

Ating bambae yu agri se ol trabol blong naoia oli mas finis bifo we wan trufala paradaes i save kamtru long wol. Kam kasem naoia, ol traehad blong man blong stretem ol trabol ya oli no karem frut, olsem ol yia we oli pas finis oli soemaot klia. Hibru profet Jeremaea i luksave samting ya, i se: “O Jeova, mi mi savegud we . . . man i no naf blong jusum rod we hem i mas wokbaot long hem.” (Jeremaea 10:23) Ale, ?hu nao i save finisim ol trabol long wol ya?

Weta i Olbaot Mo Doti Long Win Mo Wora. Wan bigfala win i girap long Lugun blong Galili, mekem se kolosap nomo ol bigfala wef oli kafsaedem ol bot. Long wan bot, ol man oli wekemap wan narafala man we i stap slip. Man ya i talem smol tok nomo long solwora, i se: “I finis, yu kwaet.” Gospel blong Mak i talem wanem i hapen biaen, i se: “Win ya i finis, olgeta samting i kwaet.” (Mak 4:39) Man we i stap slip long bot ya, hemia Jisas. Hem i gat paoa blong kontrolem weta.

Semfala man ya Jisas i yusum aposol Jon blong talemaot se, long fyuja, God bambae i ‘spolem ol man we oli stap spolem wol.’ (Revelesen 1:1; 11:18) Hemia i no hadwok tumas long Man ya we i bin mekem Bigfala Wora i kavremap wol long taem blong Noa, blong draonem ol man we oli no obei long hem.—2 Pita 3:5, 6.

Raf Fasin Mo Fasin Blong Brekem Loa. Baebol i promes se: “Olgeta we oli trastem Hae God bambae oli tekem graon ya i blong olgeta, be ol man nogud, Hae God bambae i ronemaot olgeta. Ol man we tingting blong olgeta i stap daon, bambae oli tekem graon ya i blong olgeta. Bambae oli harem gud, from we oli stap long pis, mo oli gat plante samting.” (Ol Sam 37:9, 11) Hemia God ya Jeova bakegen, we i promes blong finisim raf fasin mo fasin blong brekem loa, mo letem ol man nomo we oli gat tingting daon oli stap long Paradaes.

Fasin Pua Mo Hanggri. Fasin no stret long wol ya, i mekem se sam gavman blong wol oli hivimap plante kakae i stap, olsem “ol bigfala hil.” Be long semtaem, ol pua kantri oli stap traehad blong kasem naf kakae blong laef. Ol grup we oli wok blong givhan long ol puaman, mo plante man we oli sapotem olgeta raon long wol, oli traehad blong givim ol samting we ol man ya oli nidim. Be plante taem, oli no save seremaot ol samting ya, from we i no gat loa mo oda i stanap. Hemia i defren olgeta long tok we profet Aesea i raetemdaon, i se: “Jeova blong ol ami bambae i wokem wan bigfala kakae blong olgeta man long bigfala hil ya. Bambae i gat ol kakae we i gat oel long hem, wetem ol olfala waen we i gud tumas. Bambae i gat ol gudfala kakae we i gat plante oel mo fulap wora blong bun long hem, wetem ol olfala waen we i gud tumas.” (Aesea 25:6) ?Tok ya i soem se bambae i no moa gat hanggri? Yes, i soem samting ya.

Faet. Ol traehad blong rul long wol ya tru long wan gavman we i blong olgeta man evriwan, oli no karem frut. Ligofnesen, we i stanap long 1920, i foldaon biaen, mo i no blokem Namba Tu Bigfala Faet Blong Wol tu. Yunaeted Nesen, we plante man oli talem se hem i beswan hop blong kasem pis, i stap traehad blong mekem pis bitwin ol grup blong man we oli stap faet long ol defren ples. Nating se hem i toktok plante long saed blong pis, be i gat fulap faet oli stap gohed yet, bitwin ol man long ol wanwan kantri, bitwin ol man blong ol defren laen, mo bitwin ol velej tu. Kingdom blong God i promes blong spolem ol man we oli stap faet, mo tijim ol man we oli laef aninit long Kingdom gavman ya blong stap tugeta long pis.—Aesea 2:2-4; Daniel 2:44.

Famle i Seraot, Mo Ol Gudfala Fasin Oli Lus. Fulap famle oli stap seraot. Fulap yangfala oli mekem stronghed fasin. Ol haeman mo ol man nating, olgeta evriwan oli mekem rabis fasin long saed blong seks. Be, ol rul blong God oli stap sem mak nomo. Jisas i talem se, “bambae man i aot long papa mo mama blong hem, i go joen wetem woman blong hem. Nao tufala bambae i kam olsem wan bodi nomo. . . . from we God i joenem tufala olsem, man i mas no brekemaot tufala bakegen.” (Matyu 19:5, 6) Mo tu, Jeova God i givim loa ya se: “Ona long papa mo mama blong yufala . . . blong bambae laef blong yufala long graon ya, i longfala.” (Efesas 6:2, 3) Aninit long Kingdom blong God, ol rul ya bambae oli stap yet.

Sik Mo Ded. Profet Aesea i promes se: “Jeova . . . bambae i sevem yumi. Mo bambae i no gat wan man ples we i save talem se: ‘Mi mi sik.’ ” (Aesea 33:22, 24) Kristin aposol Pol i talem se: “Pei we ol man bambae oli kasem, from we oli stap mekem sin, hemia we bambae oli ded from. Be presen we God i stap givim i go nomo long ol man, hemia laef ya we i no save finis, from we oli joen long Jisas Kraes, Masta blong yumi.”—Rom 6:23.

Jeova God bambae i yusum gavman blong hem long heven we i stap long han blong Pikinini blong hem, Jisas Kraes, blong tekemaot olgeta trabol ya. Be, maet yu talem se, ‘Ol tok ya i olsem wan drim blong Utopia. Bambae i gud tumas sipos i kamtru. Be mi no sua sipos samting ya i save hapen.’

I Stat Kamtru Finis

Long tingting blong plante man, hop ya blong laef long paradaes long wol we i no moa gat trabol long hem, i olsem wan drim we i no save kamtru. Sipos yu tingting olsemia, tingbaot pruf ya blong soem se samting ya i save hapen.

Ol Wetnes blong Jeova oli wan grup blong bitim faef milyan man long fulwol. Oli stap laef long fasin we i no gat plante trabol bitwin long olgeta. I gat 82,000 kongregesena blong olgeta long 233 kantri. Yu save go long wan miting blong olgeta, nating se i wan bigfala asembli no wan smol miting. ?Bambae yu luk wanem samting long ples ya?

(1) Ples i Klin Mo Kwaet. Maneja blong wan stad blong futbol long Nowij, Engglan, i tokbaot wan asembli blong ol Wetnes blong Jeova long ples ya, i se: “Pis we i stap blong fo dei ya . . . i kasem mi tu. Yu harem se tingting blong yu i stap kwaet, i narakaen long filing we yu kasem taem yu spenem fo dei blong mekem bisnes, no blong mekem ol samting blong laef evri dei. Ol Wetnes oli defren long ol narafala man, mo i hadwok blong eksplenem wanem samting i mekem olgeta oli defren.”

Wan man blong givim advaes mo trenem ol man blong bildim haos, i visitim ofis blong ol Wetnes blong Jeova long London, nao i talem se: “Mi laekem ol samting we mi luk mo mi harem long ples ya. Mi haremgud tumas long pis mo kwaet we i stap, i no jes long ofis, be bitwin ol [man mo woman] tu. Mi ting se fasin blong laef mo glad blong yufala i save tijim plante samting long ol narafala man long wol ya we i fulap long trabol.”

(2) Sefples Mo Pis. Wan woman Kanada we i raetem ol store long nyuspepa ya, Journal de Montréal, i raetem se: “Mi mi no wan Wetnes. Be mi wetnes long trutok ya se ol Wetnes oli givim wetnes long saed blong fasin blong wok strong mo gudfala fasin. . . . Sipos i gat ol Wetnes nomo long wol ya, bambae yumi no nidim blong lokem doa long naet, mo yumi no nidim ol wesil we oli krae blong talemaot ol stilman.”

(3) Stap Tru Long Kingdom Gavman Blong God, hemia nao fasin blong ol Wetnes. Samfala oli harem nogud long fasin blong olgeta blong no joen long politik, be oli no nidim blong harem olsemia. Fasin blong ol Wetnes blong no joen long ol plan blong politik blong traem fiksimap ol trabol long wol, i no kamaot from we oli no wantem givhan blong mekem laef blong ol man i kamgud moa. No gat. Be, oli stap traehad blong mekem ol fasin we Man ya we i rul long gavman long heven, i glad long olgeta, hemia Man we i Wokem wol ya, Jeova God.

Ol tijing blong ol Wetnes, we oli stanap fulwan long Tok blong God, Baebol, oli mekem se oli no save kam olsem ol narakaen grup we oli folem wan krangke man. Oli soem kaengud fasin mo intres long olgeta man, nomata wanem skul ol man ya oli folem. Oli no fosem ol man blong jenisim tingting blong olgeta. Oli traehad blong folem Lida blong olgeta, Jisas Kraes, mo oli yusum ol tok blong Baebol blong pruvum se Paradaes we i no moa gat trabol long hem, bambae i kamtru long wol ya i no longtaem.—Matyu 28:19, 20; 1 Pita 2:21.

(4) Strong Long Saed Blong Speret Mo Hapi. I tru se, ol Wetnes blong Jeova oli no stap talem se oli no kasem trabol nating long laef blong olgeta. Hemia i no save hapen long medel blong ol man we oli bon wetem sin blong Adam. Be tabu speret blong God i stap givhan long olgeta wanwan blong wokem ol gudfala fasin, olsem ‘lav, glad, pis, longfala tingting, kaen fasin, gud fasin, bilif, kwaet fasin, mo fasin blong bos long tingting.’ (Galesia 5:22, 23) Wosip we oli mekem i go long Jeova tru long Jisas Kraes, hemia nao samting we i joenemgud olgeta mo i mekem hop blong olgeta i stap strong.

Mifala i hop se taem yu visitim haos miting blong ol Wetnes long ples blong yu, bambae samting ya i givhan long yu blong bilif se God bambae i mekem wol ya i kam wan naesfala paradaes.

Bambae i no moa gat ol trabol blong naoia. Sin tu bambae i lus sloslou, taem ol blesing blong ransom sakrifaes blong Jisas oli kamtru long ol man we oli obei long God. Yes, bambae yu save gat wan bodi we i strong gud, mo yu save hapi.

Blong rere from nambawan fyuja ya, yu save mekem sam smol samting. Askem ol Wetnes blong givim buk ya long yu, Save Blong Lidim Yu Long Laef We i No Save Finis.b Buk ya bambae i givhan long yu blong kasem save kwiktaem long ol samting we God i wantem yu blong mekem, nao yu tu yu save laef blong olwe long paradaes we i no moa gat trabol long hem.

[Futnot]

[Tok blong makem poen pija long pej 10]

Ol tijing blong ol Wetnes, we oli stanap fulwan long Tok blong God, Baebol, oli mekem se oli no save kam olsem ol narakaen grup we oli folem wan krangke man

[Tok blong pija long pej 8, 9]

Faondesen blong paradaes we i no moa gat trabol long hem, i stap naoia

I no longtaem, bambae fulwol i wan trufala paradaes