Wota Mo Helt Blong Yu

MAGASIN ya Health i talem se: “Taem yumi tosta, hemia nomo i no naf blong mekem yumi save hamas wota bodi blong yumi i rili nidim.” I tru se, yumi mas dring plante wota blong haremgud long saed blong bodi, long saed blong ol filing, mo tu blong mekem se fes blong yumi i luk naes. Bodi blong yumi i stap lusum wota oltaem tru long swet, long wora blong ae we i ron, long pispis, mo tu taem yumi pulum win. Taswe yumi mas dring wota bakegen blong tekem ples blong wota ya we yumi lusum. ?Yumi mas dring hamas wota? Plante man we oli gat hae save long bisnes ya oli talem se yumi mas dring moa long eit kap, no tu lita, evri dei.

?From wanem yumi mas dring plante wota olsem? Wota i impoten tumas from we hem i karem ol gudfala samting we bodi i nidim blong stap strong, oli go olbaot long bodi, mo tu, wota i karemaot ol doti. Yumi nidim wota blong mekem se bodi i stap long stret tempraja oltaem, mo blong mekem se ol joen blong bodi oli wokgud. Magasin Health i talem se: “Sipos bodi blong yu i sot long wota, nating se i sot lelebet nomo, be yu save filim taed, . . . no kam sik. Plante taem yumi no tingbaot se yumi taed from we bodi i sot long wota.” Magasin ya i givim advaes ya se: “!Lukaot! Yu save ting se kofe, ti, lemonad, mo alkol tu, oli olsem wota, be samting we i tru se, oli mekem se bodi i sot moa long wota.” Kofe, ti mo alkol oli mekem se man i pispis moa, ale bodi i lusum moa wota.

Mo tu, “skin blong yu i nidim wota blong stap sofsof mo blong no kam drae tumas.” Blong givhan long samting ya, yu save putum sam pomad long skin blong yu. Be ol pomad oli no rili karem wota i go long skin, no gat. Oli protektem skin, from we oli holemtaet wota we i stap finis long skin. I impoten moa blong protektem skin olsem ya taem yumi kam olfala, from we taem ol yia oli pas, skin i stap kam drae.

Sore tumas, long plante ples long wol, i hadwok tumas blong kasem wota we i klingud. Be hadwok ya bambae i karem gudfala frut. !Yes, yumi mas dring plante wota, mo yusum isi rod ya blong haremgud mo luk naes!