Blong Stap Laef, Yumi Nidim Tumas Wota

WAN dei, Jisas i storian wetem wan woman Samaria we i stap pulum wota long wan wel. Jisas i tokbaot wan springwota we i save ron oltaem insaed long man, blong givim laef long hem we i no save finis. (Jon 4⁠:14) Long taem ya, hem i yusum wota olsem wan pijatok. Be yumi nidim prapa wota tu blong stap laef. I gat wan samting nomo we yumi nidim moa, hemia win we yumi pulum. Man we i no moa kakae, i save stap laef blong plante wik. !Be man we i no moa dring wota, hem i save laef faef dei nomo!

Bighaf blong kilo blong yumi (75 pesen), hem i wota long bodi blong yumi. Olsem nao, bighaf blong bren blong yumi (75 kasem 85 pesen) hem i wota, mo bighaf blong ol mit long bodi blong yumi (70 pesen) hem tu i wota. Wota i stap mekem plante wok long bodi blong yumi. Hem i givhan long bel blong tantanem kakae mo blong kasem ol gudfala samting from, mo hem i karem ol gudfala samting ya i go long ol sel long bodi. Mo tu, wota i karemaot ol doti long bodi, mo i mekem se ol joen oli muv isi, mo i klinim gat, mo i mekem se bodi i no kam hot tumas. ?Be yu yu save se wota i save givhan long yu blong lusum kilo tu?

Dring Wota Blong Lusum Kilo

Faswan samting blong tingbaot se, i no gat samting insaed long wota we i save mekem bodi i fatfat, i no gat gris long hem, mo i gat smol sol nomo long hem. Seken samting se, wota i save blokem hanggri. Namba tri samting se, wota i stap givhan long bodi blong i yusum ol gris we i stap. ?Hem i mekem wok ya olsem wanem? Tingbaot se, taem i no gat naf wota long bodi, tufala kidni i no save wokgud. Ale, leva nao i mas mekem sam wok blong kidni, mo hem i no moa mekemgud wok blong hem blong tanem ol gris i kam paoa we bodi i save yusum. Ale gris i stap kam antap, nao yu yu tekem moa kilo. Taswe, Dokta Donald Robertson we i wok long Saot-wes Senta blong Stadi long Ol Kakae we Oli Mekem Man i Fatfat, long Scottsdale, Arizona, Yunaeted Stet, hem i talem se: “Sipos yu wantem lusum kilo, i impoten we yu dring plante wota. Sipos yu no dring naf wota, bodi i no save yusum gris we i stap.”

I tru se, plante man oli tekem moa kilo from we bodi blong olgeta i holemtaet wota. Maet oli ting se i moa gud we oli no dring plante wota. Be, tingting ya i no stret nating. Taem bodi i no gat naf wota, hem i traem blong holemtaet evri drop wota, long ol ples olsem leg mo han. Taswe, ol man we oli savegud long saed blong kakae we i gud long bodi, oli talem se yumi mas dring plante wota​—⁠bodi i nidim samting ya. Mo tu, sipos yu kakae plante sol, bambae bodi blong yu i holemtaet moa wota, blong traem wasemaot sol ya.

Putum Wota Long Bodi Blong Yu

Evri dei, bodi blong yumi i lusum samwe long tu lita wota. Hem i kamaot tru long skin, waet leva, bel, mo kidni. Taem yumi pulum win, yumi lusum samwe long haf lita wota evri dei. Sipos yumi no putumbak wota ya, bambae bodi i kam drae, nao yumi save harem se hed i soa, yumi taed, bodi i soa olbaot, pispis i braon, yumi hot bitim mak, mo maot mo ae blong yumi oli kam drae.

?Yumi mas dring hamas wota? Dokta Howard Flaks, we hem i spesel dokta blong ol man we oli fatfat tumas, i talem se: “Wan man we bodi blong hem i strong, i mas dring eit no ten kap wota evri dei. Sipos ples i hot no yu wok strong, yu nidim moa. Olgeta we oli fatfat tumas, oli mas dring moa wota. Olsem nao, sipos oli 10 kilo antap long wet we i stret long bodi blong olgeta, oli mas dring wan moa glas wota evri dei.” Sam man oli talem se yumi mas dring wota taem yumi tosta nomo, be sipos yumi tosta bigwan, maet bodi blong yumi i lusum tumas wota finis.

?I gud blong dring ol narafala samting long ples blong wota? Jus blong frut mo ligim we yumi meksem wetem wota, hem i gud. Be insaed long jus ya i gat sam samting we i save mekem man i fatfat. Mo ol dring we oli fulap long suga mo melek oli mekem se bodi i nidim moa wota, from we bel i mas tantanem ol dring ya. Ol strong dring olsem bia mo waen, wetem kofe mo ti we oli gat kafein long olgeta, oli mekem se bodi i lusum wota, taswe yumi mas putumbak wota ya. I no gat wan narafala samting we i save tekem ples blong wota. Yumi nidim wota tumas blong stap laef. Ale, i gud we naoia nomo yu dring wan glas wota.

[Bokis/Tok blong pija long pej 31]

Advaes Blong Givhan Long Yu Blong Dring Moa Wota

● Karem wan botel wota wetem yu.

● Dring wan glas wota wetem evri kakae.

● Dring bifo we yu wok, taem yu stap wok, mo afta we yu wok.

● Spel smol blong dring wota, i no blong dring kofe.

● Blong mekem se wota blong paep i tesgud, putum smol jus blong laman long hem, no kafsaedem wota ya i gotru long wan klin kaliko.

[Foto Credit Line blong pija long pej 30]

Photo: www.comstock.com