Taem Ded i Minim Ded

“Dog we i laef, hem i gud moa i winim laeon we i ded finis. Yes, i tru, ol man we oli laef yet oli save se bambae oli ded, be ol man we oli ded finis oli no moa save wan samting. Oli no moa save kasem pei blong ol samting we oli stap mekem, mo ol man oli fogetem olgeta finis.”—Prija 9:4, 5.

PLANTE man, bilif blong olgeta long saed blong sol i no klia. Oli no sua long bilif ya se sol i gohed blong laef afta we man i ded, mo se sol blong man we i ded, i gohed blong laef long wan tri no anamol. Samfala, oli bilif se, samtaem, man i save kambak long laef kwiktaem nomo afta we hem i ded. I no longtaem i pas, Thomas Lynch, wan man blong mekem sevis blong berem dedman, i talem tingting blong hem, blong ansa long wan kwestin long saed blong laef afta ded. Hem i talem se: “Ol man ya we oli luk sam narakaen samting bifo we oli ded, oli no kambak long laef afta we oli ded—oli jes tingting bitim mak long ol samting we i stap wok long bodi blong olgeta. From we sipos yu ‘ded,’ yu no save kambak.”—The New York Times Magazine.

Plante taosen yia finis, Baebol i talem trutok long saed ya, i se: “Dog we i laef, hem i gud moa i winim laeon we i ded finis. Yes, i tru, ol man we oli laef yet oli save se bambae oli ded, be ol man we oli ded finis oli no moa save wan samting. Oli no moa save kasem pei blong ol samting we oli stap mekem, mo ol man oli fogetem olgeta finis.” (Prija 9:4, 5) Sipos yumi wokbaot blong visitim ol olfala gref blong bifo, bambae yumi luk se tok ya i tru tumas.

?Hemia i minim se ol dedman oli no gat hop nating? Long Baebol, i no gat wan tok we i sapotem bilif ya se sol i gohed blong laef afta we man i ded. (Jenesis 2:7; Esikel 18:4, 20) Be, taem Jisas Kraes i stap prij, hem i talem se bambae ol dedman oli laef bakegen long paradaes long wol ya. Taem Lasros i ded, sista blong hem, Mata, wan woman Jyu we i biaen long Jisas, i soem se hem i bilif long laef bakegen. Mata i talem long saed blong Lasros se: “Mi mi save we bambae long Lasdei, hem i save laef bakegen.” (Jon 11:24) Nao, Jisas i ansa i se: “Mi nao, mi stamba blong laef bakegen long ded. Mi nao mi stamba blong laef. Man we i bilif long mi, nating we bambae i ded, hem bambae i mas laef. Mo man we i laef, i bilif long mi, hem bambae i no save ded samtaem. ?Yu bilif long tok ya blong mi?” (Jon 11:25, 26) Fastaem finis, Jisas i talem se: “Yufala i no sapraes long samting ya, from we haoa i stap kam we ol dedman we oli stap long beregraon, bambae oli harem voes blong hem, nao bambae oli kamaot. Olgeta we oli mekem ol gudfala samting, oli girap bakegen blong kasem laef. Mo olgeta we oli mekem ol rabis samting, oli girap bakegen blong bigfala kot bambae i jajem olgeta.” !Makemgud se long ples ya, Jisas i no tokbaot wan sol we i no save ded!—Jon 5:28, 29; Luk 23:43.

[Tok blong makem poen pija long pej 31]

“Sipos yu ‘ded,’ yu no save kambak.”—Thomas Lynch, wan man blong mekem sevis blong berem dedman