Baebol i Talem Wanem

?Yu Mas Fraet Long Ol Man We Oli Ded?

Long kantri ya Nigeria i gat wan laen blong man we oli kolem Annang, ol memba blong laen ya oli bilif se sipos oli no berem dedman long wan fasin we i stret, spirit blong dedman ya bambae i mekem se trabol i kasem olgeta mo bambae i mekem se wan memba blong famle i ded. Sam Jaenis tu oli bilif se sipos oli no folem kastom blong berem ol dedman, spirit blong olgeta we i ded bambae i spolem mo kilim ol narafala.

BILIF blong plante man long plante kalja raon long wol, hemia se taem wan man i ded, i gat wan haf blong man ya we i laef yet, hemia spirit blong hem, mo samtaem oli talem se hemia devel blong hem no ‘sol’ blong hem we i lego bodi blong hem. Plante man oli bilif se spirit ya, i save kam insaed long bisnes blong ol memba blong famle no ol fren tu.

Nating se plante man oli bilif olsem, ?i rili tru se i gat wan samting we i gohed blong laef afta we man i ded? ?Mo “samting” ya i save spolem ol man we oli laef? ?Baebol i talem wanem?

?Olgeta We Oli Ded Oli Save Samting?

Baebol i talem se “ol man we oli ded finis oli no moa save wan samting.” (Prija 9:5) Taem Baebol i tokbaot man we i ded se i olsem wanem, hem i no yusum ol toktok we i haed, be hem i yusum ol toktok we yumi save kasem save long olgeta, olsem tok ya se man we i ded hem i “slip long ded.” (Ol Sam 13:3, NW) Long saed blong wan gel blong 12 yia, Jisas i talem se: “Gel ya i no ded ya. Hem i stap slip nomo.” Ol man ‘oli laf long hem, from we oli savegud se gel ya i ded finis.’ Be Baebol i eksplenem se Jisas i wekemap gel ya we i slip ded.—Luk 8:51-54.

Semfala samting i hapen taem Lasaros i ded. Jisas i talem long ol disaepol blong hem se bambae hem i go luk Lasaros we i stap slip “blong wekemap hem.” Ol disaepol oli no kasem save samting we Jisas i talem, nao “Jisas i talemaotgud se: ‘Lasaros i ded finis.’” Aposol Pol i tokbaot olgeta ‘we oli slip long ded’ mo i talem se long stret taem we God i jusumaot bambae hem i mekem olgeta oli laef bakegen.—Jon 11:11-14; 1 Tesalonaeka 4:13-15, NW.

Makem gud samting ya, i no gat wan ples nating long Baebol we i tijim se wan spirit i gohed blong laef afta we bodi blong man i ded. From samting ya, yumi no mas fraet long dedman. ?Be wanem nao i stamba blong bilif ya we plante man i gat se, wan samting i gohed blong laef samples afta we man i ded? ?Mo wanem i stap biaen long fraet ya se man we i ded i save spolem man we i laef?

Toktok Ya We i No Tru

Ol giaman skul oli givim tingting ya se ol man we oli ded oli no rili ded. Stat long histri blong man, ol man raon long wol oli akseptem tijing ya se man i gat wan spirit we i no save ded samtaem. From samting ya, taem ol rula oli ded, olsem Fero ya blong Ijip bifo, oli mas kilim i ded ol wokman blong olgeta blong oli save gohed blong wok blong rula ya afta we oli ded.

Plante man oli kasem trabol we oli ting se i kamaot long ol spirit no devel blong ol dedman. Oli sua se ded famle ya mo ol narafala dedman oli stap mekem trabol long olgeta from we oli no mekem samting we oli wantem. Be Baebol i soem klia se samting ya i no tru. Ol rabis spirit no devel, we hemia ol rabis enjel nomo, olgeta nao oli stap biaen long ol trabol olsem, mo oli glad blong spolem man mo mekem olgeta i fraet.—Luk 9:37-43; Efesas 6:11, 12.

Baebol i tokbaot Setan se hem i “papa blong ol giaman toktok,” we “i save tanem fasin blong hem, blong mekem ol man oli luk hem olsem we hem i wan enjel blong laet.” Setan mo ol rabis enjel blong hem, oli “stap giaman long olgeta man long wol, i lidim olgeta oli go krangke.” (Jon 8:44, NW; 2 Korin 11:14; Revelesen 12:9) Setan nao, i stap biaen long giaman toktok ya se spirit i no save ded nating, i save gohed blong laef afta we man i ded mo i save spolem ol man we oli laef i stap.

Ol man we oli bilif long Baebol oli no foldaon long ol giaman trik ya. Oli save trutok long saed blong ol traehad we Setan i mekem blong giaman long ol man se ol dedman oli save toktok wetem ol man we oli laef. Baebol i talem se: “Ol man we oli laef yet oli save se bambae oli ded, be ol man we oli ded finis oli no moa save wan samting.” (Prija 9:5) !Tru ya, i gat ol trutok insaed long Tok blong God we i save mekem yumi fri long ol giaman toktok ya long saed blong man we i ded!—Jon 8:32.

?YU YU BIN TINGBAOT?

◼ ?Olgeta we oli ded oli save wan samting?—Prija 9:5.

◼ ?Hu i stamba blong bilif ya blong plante man se man i laef yet afta we hem i ded?—Jon 8:44, NW.

◼ ?Yu save go wea blong faenem trutok long saed blong man we i ded?—Jon 8:32; 17:17.

[Tok blong makem poen long pej 23]

Ol rabis enjel nao oli glad blong mekem trabol long ol man, i no ol dedman