Ol Man Blong Ridim Wekap! Oli Talem

Fasin Blong Tokbaot Narafala Bigfala tangkiu from haf ya “Ol Yangfala Oli Askem . . . ?Wanem i Rong Wetem Fasin Blong Tokbaot Narafala?” (Julae-Septemba, 1999) Samtaem bifo finis, wan man i bin mekem giaman toktok i goraon se mi mi nekis wan we bambae oli putumaot mi long kongregesen. Mi luksave mi wan, olsem wanem we fasin ya blong tokbaot narafala i save mekem man i harem nogud tumas. !Giaman toktok ya i mekem mi harem i soa tumas! Hemia we i bin mekem toktok ya i talem sore long mi, be tras blong mi long hem i finis olgeta.

R. M., Swiselan

Fasin blong tokbaot narafala i kam antap bigwan long skul blong mi, taswe haf ya i leftemap tingting blong mi mo i mekem mi mi strong. Mi sem blong talem se mi tu mi stap tokbaot narafala blong spolem gudnem blong olgeta. Mo taem ol fren oli toktok agensem narafala, mi lesin mo joen tu insaed long stori blong olgeta. Taswe taem mi ridim haf ya mi sek mo mi harem se evri toktok insaed oli olsem advaes we i go stret long mi from evri samting we mi stap mekem. Mi mi sem tumas from olgeta toktok we mi bin mekem agensem narafala. Mi save se fasin blong tokbaot narafala bambae i gohed long skul blong mi. Be mi gat strong tingting blong no joen long olgeta toktok ya.

M. W., Japan

Kalabus Long Saebiria Stori ya blong Lembit Toom, “Fifti Yia Aninit Long Wan Rul We i Strong Tumas,” (Julae-Septemba, 1999), i rili tajem hat blong mi, mo mi no save wet blong raetem leta long yufala blong talem tangkiu. Brata ya i rili nidim strongfala bilif long Jeova God blong bambae hem i naf blong laef tru long ol hadtaem ya. I stret nomo we ol brata blong yumi oli kasem fasin fri long kantri ya we bifo hem i Soviet Yunion.

J. D., Yunaeted Stet

Ol Pikinini Oli Trabol Mi wantem talem tangkiu long yufala from ol defren haf ya long Wekap! blong Epril-Jun, 1999, “Ol Pikinini We Oli Trabolgud—?Hu Bambae i Protektem Olgeta?” Mi ting se stori ya long saed blong ol trabol we ol pikinini oli stap kasem, i wan samting we man i mas stap talemaot bakegen blong wekemap tingting blong ol man long pablik. Hem i wok blong yumi blong protektem laef blong ol pikinini blong yumi. Mi wantem leftemap tingting blong yufala blong gohed wetem gudfala wok ya blong yufala.

P. P., Councillor’s Office for Children, Siti blong Rome, Itali

I wan samting blong sapraes taem yumi tingbaot se klosap nao yumi go long ol yia 2000, be plante pikinini oli stap wok yet olsem slef mo man i stap yusum olgeta blong kilim i ded ol narafala man. Samting we i hadwok moa blong bilivim, hemia se, bighaf blong olgeta ya oli no gat jans blong kasem wan laef we i moagud. Wan taem bakegen, Wekap! i rili soemaot klia ol hadtaem we ol pikinini long wol ya oli stap fesem.

S. R. B., Brasil

Naoia mi mi divos finis, afta long 36 yia we mi mared. Mi lanem se hasban blong mi i bin mekem nogud long saed blong seks wetem tufala smol gel blong mi blong plante yia finis. (Hem i no wan Kristin.) Taem mi harem se hem i bin mekem olsem, tingting blong mi i trabol tumas. I luk olsem se i no gat man i kasem save se nogud fasin ya long saed blong seks i no wan samting nating. Mo tu, i luk olsem se i no gat man i kasem save long soa we i kasem filing blong wan we trabol ya i kamaot long hem. Taswe, mi tangkiu long Jeova se yufala i raetem wan haf long saed ya.

N. M., Yunaeted Stet

Yu Sas Long Ae Blong God Plante taem mi harem se tingting blong mi i foldaon mo mi no naf blong mekem wan gudfala samting. Samtaem mi tingting se i no stret we mi stap long wok blong fultaem paenia from we ol traehad blong mi oli no gud inaf. Haf ya “Baebol i Talem Wanem: !Yu Yu Sas Long Ae Blong God!” (Janewari-Maj, 2000) i mekem mi mi harem moa gud. Hem i givhan long mi blong luk se Setan i traehad blong mekem yumi gat filing ya, from we hem i wantem blokem yumi, blong yumi no gohed long wok blong Jeova.

L. W., Kanada

Haf ya i rili leftemap tingting. Bifo finis i kam, mi mi harem olsem se Jeova i no stap lesin long ol prea blong mi. Be stat long taem we mi ridim haf ya, mi sua moa long Jeova mo long mi wan. Plis yufala i mas gohed blong prentem ol nambawan stori olsem hemia.

R. V. T., Beljiom