Trutok Long Saed Blong Ol Enjel
OLSEM we yumi luk finis, ol tingting we plante man oli gat mo ol stori long saed blong ol enjel i no agri oltaem wetem wanem we Baebol i tijim. ?Olsem wanem? ?Bisnes ya i rili impoten? ?I gat denja sipos wan man i akseptem bilif ya we plante man oli gat long saed blong ol enjel? Yes, i gat denja.
Wan eksampel, tingbaot ol fasin we ol skul blong “new spirituality” oli leftemap. Olgeta buk blong ol enjel tede oli leftemap tingting blong man blong mekem olsem pikinini we i mekem enikaen samting we narafala i talem long hem. Be i no leftemap tingting blong man blong yusum tingting blong hem wan. Ol buk ya oli neva leftemap tingting blong man blong faenemaot mo winim ol problem blong hem. Oli neva leftemap tingting blong man blong kasemsave Baebol mo blong save God. Ol buk blong enjel oli jes mekem ol man oli bilif se oli gat ol enjel we oli kaen mo gud we oli stap wokbaot long saed blong olgeta. Ale ol man ya oli no moa fraet, from we oli ting se oli stap long wan wol we i gud mo stret nomo. Taem wan problem i kamaot, oli wet nomo long ol enjel blong oli mekem wan samting. Be sipos toktok ya i tru, ?from wanem nao Baebol i talem long yumi blong “faet strong blong holem trutok ya”?—Jud 3.
Plante buk blong ol enjel oli tok swit long ol man, mekem se tingting blong olgeta i go antap tumas. Ol buk ya oli pulum man blong tingbaot hem wan nomo. Ol buk ya oli giaman se ol enjel blong tede oli talem long yumi se yumi naes, we laet i kamaot long yumi. I tru, i gud blong gat wan tingting we i stret long saed blong yumi. Be ol skul blong “new spirituality” oli pulum strong yumi blong lavem yumi wan oltaem, nomata wanem i save hapen. Wan man blong raetem buk blong ol enjel i talem se faswan loa we i bigwan olgeta, hemia blong “lavem yu wan, we yu wan yu Masta blong yu.” !Hemia i no agri nating wetem ol tok blong Jisas! Hem i talem se: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu. Hemia nao loa ya we i hae moa long ol narafala loa, mo i nambawan blong folem.” (Matiu 22:36-39) Bambae yumi save glad sipos yumi putum ol samting we God i wantem long fas ples long laef blong yumi i bitim ol prapa samting blong yumi wan.
Taem man i mekem ol enjel i kam impoten bitim mak, samting ya i defren olgeta long trufala Kristin skul. Aposol Pol i blokem fasin blong wosip long ol enjel. (Kolosi 2:18) “Wosip” i min se man i “ona no i tinghae long wan samting olsem god, no wan bigfala paoa.” Plante buk oli traem leftemap tingting blong olgeta we oli ridim blong givim ona mo tinghae long ol enjel. Be, rimemba taem ya we Setan i askem Jisas blong mekem wosip long hem. Jisas i ansa long hem se: “Yu mas mekem wosip long Hae God, we i God blong yu, mo bambae yu mas mekem wok blong hem nomo.” (Luk 4:8) Biaen, taem aposol Jon i bodaon long fes blong wan enjel, enjel ya i talem long hem se: “No, yu no mekem olsem. Yumitufala i man blong wok nomo, wetem ol brata blong yu, olgeta ya we oli stap holem tok we Jisas i talemaot se i tru. Yu mas bodaon long God nomo blong mekem wosip long hem.”—Revelesen 19:10.
Rod We Ol Enjel Oli Save Halpem Yu
God nao i man we yumi save kam klosap long hem blong i lidim yumi mo i givhan long yumi, i no ol enjel. Hem i rere oltaem blong soemaot lav long olgeta we oli stap mekem ol stret fasin we hem i wantem. Aposol Jon i raet i go long ol Kristin fren blong hem se: “Taem yumi kam long fes blong God long prea, yumi bilif strong se sipos yumi askem samting long hem we i stret long tingting blong hem, hem bambae i harem prea blong yumi. Mo sipos yumi save se oltaem hem i stap harem prea blong yumi, oraet, yumi save se evri samting we yumi askem long hem, oli blong yumi finis.”—1 Jon 5:14, 15.
I gat plante samting we yumi no save long saed blong ol enjel blong God we oli stap holem strong long hem. Be yumi save finis se oli stap mekem wok blong God, folem plan blong hem, mo folem rod we hem i lidim olgeta long hem. Oli rili wantem leftemap trutok long saed blong God. (Revelesen 14:6, 7) Oli no wantem we yumi wosip long olgeta. Mo from we yumi no save luk olgeta, yumi no save stret se God i stap yusum olgeta long wanem wok, blong givhan long ol man blong hem long ol samting we oli stap mekem evri dei. Be yumi save se Jeova i stap protektem mo lidim ol man blong hem olsem wan grup.
!Ol enjel oli stap soem wan nambawan eksampel long yumi tede! Oli stap leftemap mo presem God. (Ol Sam 148:2) Nating se oli gat bigfala paoa long saed blong tingting mo spirit, oli soem bigfala respek long hae rul blong Jeova. (Jud 9) Oli intres bigwan long olgeta plan blong God we bambae hem i mekem i kamtru. (1 Pita 1:11, 12) Yumi lanem olgeta samting ya nao insaed long Tok blong God. Yes, Baebol nao i buk we i talemaot trutok long saed blong ol enjel.
[Tok blong makem poen pija long pej 10]
Ol enjel oli rili wantem leftemap trutok long saed blong God
[Tok blong pija long pej 9]
Taem aposol Jon i traem blong wosip long wan enjel, enjel ya i talem long hem se: “No, yu no mekem olsem”