Ol Man Blong Ridim Wekap! Oli Talem

Mekem i Krangke Long Hasban No Waef Tangkiu from stori ya long Wekap! blong Oktoba-Desemba, 1999, we nem blong hem “Taem Wan i Mekem i Krangke Long Narafala.” Samting ya i bin kamaot long laef blong mi. Tri yia i pas finis, mitufala i divos, be mi stap harem nogud tumas yet. Stori ya i givhan long mi blong luksave se mi mas lego ol tingting long saed blong trabol ya, gat wan plan blong laef blong mi, mo gohed nomo.

V. B., Trinidad

Mi mi lukaot save finis long saed ya, be mi neva faenem sam save we i gud olsem hemia. Taem mi jes harem tok blong Baebol, mi kasem save se hemia nao trutok. Naoia Jeova i jes givim wan narafala samting blong givhan long bilif blong mi.

G. B., Itali

Divos blong mi i mekem tingting blong mi i foldaon olgeta, mi ting se mi nogud, mo mi kasem fulap sik. Mi harem nogud yet, be bilif blong mi long ol promes blong Jeova, wetem lav mo sapot we kongregesen i givim long saed blong ol filing blong mi, i stap leftemap tingting blong mi bigwan.

A. B., Kanada

Naen manis i pas, mi seraot long man blong mi. Mi harem nogud yet blong stap mi wan. Hem i no moa stap blong holem han blong mi taem mi wokbaot long rod. Hem i no moa stap blong sidaon klosap long mi long miting. Mo hem i no moa stap blong karem mi mi go luk dokta. Tangkiu we yufala i mekem mi mi save se Jeova bambae i no lego olgeta we hasban i ronwe long olgeta.

E. S., Brasil

Bokis ya “?I Fol Blong Hu?” i givhan blong mekem mi mi haremgud bakegen. Taem man blong mi i mekem i krangke long mi, mi jusum blong mekem divos long hem. Sam samtaem, mi mi gat semfala filing olsem Job, we hem i wantem ded nomo. (Job 17:11-13) Be sapot blong ol famle blong mi mo ol Kristin brata mo sista i givhan bigwan long mi.

M. O., Ajentina

!Mi no jes ridim stori ya, be i olsem we mi kakae ol save ya! Mi mi divos finis, mo stori ya i ansarem ol kwestin mo wari we trabol ya i mekem i kamaot long mi. Tangkiu we yufala i kea long mifala olsemia.

E. L., Franis

Mi mi gat seven yia nomo taem papa blong mi i ronwe long mifala. Hemia i wan strong traem. Sam yia biaen, Papa i askem long mifala blong letem hem i kambak bakegen. Mi wetem ol brata blong mi, mifala i no wantem nating, be Mama i talem yes. Naoia we mi ridim ol stori ya finis, mi mi kasem save from wanem hem i talem olsem, nating se i had long hem.

A. A., Brasil

!Tangkiu, tangkiu, mo tangkiu bakegen from ol stori ya! Mi mi haremgud blong save se ol filing mo tingting blong mi oli sem mak long ol narafala we oli fesem trabol ya. Be, yufala i talem se: “Maet yu yu no bin givim naf lav, kea, tok blong leftemap tingting, mo ona long hasban no waef blong yu, olsem we hem i nidim.” Tok ya i stikim mifala we mifala i bin traehad blong mekem mared blong mifala i stanap strong. Taem wan man i stap mekem plan blong slip wetem narafala woman, hem i save rao plante, mo i had blong soem lav long wan man olsem.

L. W., Yunaeted Stet

Mifala i sore sipos sam tok blong mifala i stikim sam man. Mifala i no minim se man we i go slip wetem narafala woman i save putum fol long waef blong hem, no gat. Long bokis ya “?Hu Nao i Gat Fol?” mifala i makemgud se hemia we i mekem rong hem nao i gat fol, nating se “hemia we i no mekem i rong i gat plante slak fasin.” Tok ya we yu talem, hem i kamaot long wan haf we i stap tokbaot se maet tufala i save stretem trabol mo fren bakegen. Mifala i stap traem blong makem nid blong toktokgud tugeta, blong tufala we i traem frengud bakegen oli save luksave ol trabol we tufala i mas stretem long mared blong tufala. Mo tu, maet tufala i stap haedem sam filing blong kros we tufala i mas tokbaot. Toktok olsem i save mekem se tufala tugeta oli talemaot sam rong blong tufala. Yes, “plante taem, yumi evriwan i mekem i no stret.” (Jemes 3:2) I tru se i no isi nating blong toktok tugeta long ol samting ya, be, olsem “Wekap!” i talem, hemia i “wan impoten samting blong givhan long tufala blong trastem tufala bakegen.”—ED.