Ol Man Blong Ridim Wekap! Oli Talem

Miusik Blong plante yia finis, mi bin wok olsem wan elda long Kristin kongregesen, mo mi stap givhan plante long ol yangfala. Be long ol laswan manis, mi mi harem nogud lelebet, from se oli no wantem harem advaes we mi mi stap traem blong givim long olgeta, blong lukaotgud long sam miusik blong naoia we i save spolem yumi. Taswe, Wekap! ya “Miusik—Hem i Gat Bigfala Paoa” (Eprel-Jun, 2000) hem i stret samting we mi mi nidim. Ol tok blong ol man we oli no Kristin, long saed blong trabol we sam miusik i save mekem long man, oli nambawan. Bambae mi serem ol tingting ya wetem ol yangfala.

D. H., Bolivia

Mi mi wan man blong singsing mo wan tija blong miusik long praemari skul, taswe mi mi glad tumas long Wekap! ya long saed blong miusik. !Tangkiu!

K. F., Yunaeted Stet

Oli Ronem Olgeta, Be Oli Laef i Stap Yet Mi jes ridim stori ya, “Mekem Wok Blong God We Klosap Nomo Mi Ded.” (Eprel-Jun, 2000) Ol Kristin brata blong yumi long Angola oli stanap strong blong bitim 17 yia finis, mo from samting ya, kantri ya we fastaem i luk olsem se i no save karem Kristin frut, i kasem blesing mo i karem fulap frut.

R. Y., Japan

Ol Enjel Tangkiu tumas long ol klia tok long stori ya, “?Wanem Nao Trutok Long Saed Blong Ol Enjel?” (Julae-Septemba, 2000) Mi mi glad blong luk se i gat samfala we oli no fraet blong raetem ol save olsem, blong soemaot olsem wanem ol giaman tingting long saed blong ol enjel oli save spolem yumi. Yufala i raetem ol save ya wetem respek, be yufala i no haedem wan samting. Mi mi laekem tumas pija long pej 9, we i soemaot se ol enjel tu oli no wantem ol swit tok mo fasin blong leftemap olgeta we ol man oli stap mekem tede.

J.L.A.H., Brasil

Ol Stori Blong Ol Yangfala Mi mi gat 12 yia blong mi, mo mi mi laekem tumas blong ridim Wekap! Bifo, taem mi no stap ridim olgeta yet, i had long mi blong joengud wetem ol fren blong mi, from we evriwan long olgeta oli olfala moa long mi. Be, naoia we mi mi stap ridim “Ol Yangfala Oli Askem . . .” oltaem, mi faenem i isi moa blong joengud wetem olgeta. Tangkiu long yufala from ol buk ya. Oli givhan bigwan long mifala.

N. I., Rasia

Ol Bebet Tangkiu long yufala from stori ya, “Narakaen Laef Blong Ol Bebet.” (Julae-Septemba, 2000) I klia se yufala i stadi dip blong faenem ol save ya we i nambawan. Mi mi bin wantem blong lukluk televisin, be mi jusum blong ridim Wekap! ya nomo. Taem mi ridim finis, mi save se mi bin jusum stret samting.

O. K., Franis

Bifo, mi mi no save from wanem i gat ol bebet long wol. Mi bin tingting se Jeova i wokem olgeta blong pulum ol man blong klinimgud haos blong olgeta. Be stori ya i soemaot se ol bebet ya oli sam long ol naesfala samting we Jeova i wokem, mo yumi save lanem plante samting from olgeta, long saed blong nambawan Man ya We i Wokem yumi.

A. A., Yunaeted Stet