Edukesen We i Givim Laef
“Baebol [i] beswan samting blong lidim laef blong man.”—Thomas Tiplady, 1924.
I NO wan giaman toktok blong talem se edukesen we i stanap long Baebol i save jenisim laef blong man. Plante man, fastaem oli harem se laef i blong nating nomo mo se i no gat rod blong winim ol trabol, be naoia oli glad long laef blong olgeta mo oli gat strong bilif long wan gudfala fiuja. Baebol nomo i jenisim laef blong olgeta ya. Wan mama long Namibia we i no stap wetem man, i raet i kam long ofis blong ol Witnes blong Jeova long Saot Afrika, i se:
“Mi mi gat 29 yia, mo mi jes ridim buk ya Questions Young People Ask—Answers That Work. Mi flatem long tu dei nomo. Ol save long buk ya i kasem gud hat blong mi, from we mi mi harem nogud tumas blong stap mi wan. Boefren blong mi i ded long wan aksiden long trak, naoia mi mi stap mi wan wetem tufala pikinini blong mitufala. Mifala i harem nogud tumas. Sam samtaem, mi bin ting se i moa gud blong kilim mi wan i ded. Be buk ya i jenisim tingting blong mi. Plis, mi mi wantem wan Baebol stadi we mi no pem.”
Baebol i wan buk we i givim gudfala advaes long evri samting long laef, olsem, fasin joen insaed long famle, wetem ol fren long ples blong wok, mo wetem ol narafala man raonabaot. (Ol Sam 19:7; 2 Timoti 3:16) Hem i givim advaes olsem wanem blong folem ol gudfala fasin mo stap longwe long ol nogud fasin. Hem i wan buk we i tok tru long saed blong laef. Taem yu ridim, bambae yu luk se hem i tokbaot ol trufala man. Bambae yu luksave wanem i mekem samfala oli glad mo oli harem gud long laef, mo wanem i mekem samfala oli harem nogud mo oli kasem trabol. Bambae i kam klia long tingting blong yu wanem fasin i karem gudfala frut mo wanem i karem nogud frut.
Edukesen Naoia We i Givim Laef
Baebol i makem se i impoten tumas blong gat waes fasin, i se: “Waestok ya, hem i nambawan samting blong yu yu kasem.” (Ol Proveb 4:7) Hem i soemaot tu se, plante taem ol sinman oli no waes, taswe hem i givim advaes ya: “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem.”—Jemes 1:5.
?Long wanem rod nao, Man ya we i Wokem yumi, Jeova God, i stap givim waes? Hem i putum long Tok blong Hem, Baebol, mo i talem long yumi blong ridim. Hem i pulum yumi olsem: “Pikinini blong mi. Yu mas lanem ol samting ya we mi stap tijim yu long hem, mo yu no mas fogetem ol fasin ya we mi stap talem long yu se yu mas mekem. Yu mas lesin long ol waestok ya, . . . Sipos yu stap mekem olsem, bambae yu save kasem mining blong tok ya we i talem se, ‘Yu mas tinghevi long Hae God, mo yu mas ona gud long hem.’ Nao bambae yu save fasin blong hem moa, blong yu savegud hem. Hae God nomo i save mekem man i waes.” (Ol Proveb 2:1, 2, 5, 6) Sipos yumi folem advaes long Tok blong God mo yumi luk olsem wanem i givhan, bambae yumi luksave se hemia waes we i kamaot long God tru.
Tingbaot advaes we Baebol i givim long ol puaman. Hem i talem se man i mas wok strong, mo i givim woning se hem i no mas ronem ol samting we i westem mane blong hem. Taswe, i klia se Baebol i agensem ol fasin olsem smok tabak mo dring bitim mak.—Ol Proveb 6:6-11; 10:26; 23:19-21; 2 Korin 7:1.
?Olsem wanem long ol fren? ?Oli save mekem wanem long yumi? Baebol i talem se: “Sipos man i go joen long ol waes man, bambae hem i save kam waes, be sipos hem i go mekem fren wetem ol man we oli no gat hed, bambae hem i spolem hem nomo.” (Ol Proveb 13:20) ?Yu yu luk we ol fren oli save pulum ol yangfala, mo ol olfala tu, blong dring lusum hed, tekem drag, mo slip olbaot? Yes, sipos yumi joen wetem olgeta we oli folem ol fasin ya, bambae yumi kam olsem olgeta ya. Baebol i talem samting ya i se: “Ol stret man nomo, be ol fren blong olgeta we oli no stret, oli save spolem fasin blong olgeta.”—1 Korin 15:33.
Tru ya, yumi evriwan i wantem glad. ?I gat rod blong kasem glad? Yu yu save finis samting we Baebol i talem se, i no olting we oli givim glad, be ol stret tingting, fasin mo ol gudfala fren, antap moa, taem yumi fren wetem God. (1 Timoti 6:6-10) Long bigfala toktok we Jisas Kraes i givim antap long hil, hem i talem se ol man we oli gat trufala glad, hemia, “olgeta we oli stap lukaot God from we oli no gat paoa blong hem long laef blong olgeta,” “olgeta we tingting blong olgeta i stap daon,” “olgeta we oli wantem tumas blong mekem ol samting we God i wantem,” “olgeta we oli gat sore long man,” “olgeta we tingting blong olgeta i klin gud,” mo “olgeta we oli man blong mekem pis.”—Matiu 5:1-9.
Sipos yu tingting dip long ol tijing blong Baebol, bambae yu luksave olsem wanem oli save lidimgud yu. I no gat wan narafala samting we i save givim gudfala advaes long yumi, olsem Baebol. Advaes blong hem i no jes ol toktok nomo. Hem i givhan long yumi evri taem, i no save mekem nogud frut i kamaot. Sipos yumi folem advaes blong Baebol, bambae hem i mekem i gud nomo long yumi.
Edukesen We i Givim Laef
Baebol i givhan long yumi naoia, be i no hemia nomo. Hem i givim promes blong laef long fiuja tu. Hem i tokbaot wan bigfala samting we bambae i kamaot blong klinim wol mo blong jenisim i kam wan naesfala ples we ol man blong God oli save stap long hem. Harem nambawan tok ya long saed blong fiuja: “!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:3, 4; Ol Proveb 2:21, 22.
Traem tingbaot. !Bambae i no moa gat pikinini we i siksik, i no moa gat hanggri, i no moa gat ol rabis sik we oli slakem gud bodi, mo i no moa gat soa! Wota blong ae bambae i no moa ron from ol samting we oli mekem yumi harem nogud, from yumi kros, no from tingting blong yumi i foldaon. Ol samting ya bambae oli finis. Ol enjel blong God bambae oli spolem ol rabis man, bambae i no moa gat ol man blong stil, ol man blong kilim man i ded, ol man blong giaman, mo ol man we oli mekem samting blong spolem pis blong yumi. Olgeta man bambae oli haremgud blong stap long prapa haos blong olgeta, bambae i no gat samting i mekem olgeta oli fraet.—Aesea 25:8, 9; 33:24; 65:17-25.
?Wanem tingting blong yu? ?Ol samting ya i gud? ?Bambae yu glad blong save moa long saed blong ol rul blong Baebol mo olsem wanem yu yu save folem olgeta blong harem gud naoia mo long fiuja? Sipos yes, plis singaot ol Witnes blong Jeova, bambae oli glad blong tijim yu olsem oli stap tijim plante narafala man long wol, blong yu yu kasem “edukesen we i givim laef.”