“Maet Bambae Hem i Jenisim Fasin Blong Hem”

ROXANAa i wan naesfala woman we i hapi mo i gat fo pikinini blong hem. Man blong hem i wan bigfala dokta long Saot Amerika. Roxana i talem se: “Man blong mi i gat gudhan blong switim ol woman, mo ol man tu oli laekem hem.” Be man blong Roxana i gat sam nogud fasin we ol fren blong hem oli no stap luk. “Long haos, hem i nogud, i mekem mi mi fraet. Hem i wan man blong jalus.”

Fes blong Roxana i soemaot wari we hem i gat. Hem i gohed blong storian i se: “Trabol ya i stat sam wik nomo afta we mitufala i mared. Mama blong mi wetem ol brata blong mi oli kam luk mitufala. Mi mi glad tumas blong toktok mo laf wetem olgeta. Be taem oli gohom, man blong mi i faerap long kros. Hem i kam olsem wan wael anamol, hem i girap, i holem mi, i sakem mi mi godaon long bed. Mi no save bilif se samting ya i stap hapen.”

Sore tumas, be hemia i stat nomo blong ol trabol we Roxana i kasem. Long ol yia afta we samting ya i hapen, man blong hem i kilim hem bakegen mo bakegen. Klosap evritaem man ya i folem sem fasin. Fastaem hem i kilim nogud Roxana, biaen hem i toktok gud long hem, i talem sore mo i promes se neva bambae i mekem samting ya bakegen. Blong smoltaem, hem i kamgud lelebet. Be biaen, trabol ya we i olsem wan rabis drim long Roxana, i stat bakegen. Roxana i talem se: “Mi stap tingting se maet bambae hem i jenisim fasin blong hem. Sam samtaem, mi ronwe long hem. Be oltaem mi gobak bakegen long hem.”

Roxana i fraet se wan dei maet raf fasin blong man blong hem i kam antap moa. Hem i se: “Hem i bin talem long mi se bambae hem i kilim mi mi ded, kilim ol pikinini i ded, mo biaen bambae hem i kilim hem wan i ded. Wan dei, hem i holem mi mo i wantem katem trot blong mi wetem sisis. !Wan narafala taem, hem i poenem wan masket long sora blong mi mo i sutum! Laki nomo we i no gat bolet long hem. Mi fraet we mi fraet, klosap mi ded from.”

Oli No Moa Tokbaot

Plante milian woman long wol oli kasem raf fasin long man blong olgeta, olsem Roxana.b Plante oli no tokbaot samting ya we i stap hapen long olgeta. Oli ting se sipos oli ripotem man blong olgeta, bambae i blong nating nomo. Plante man we oli stap kilim woman blong olgeta oli stap giaman long polis se oli no bin mekem olsem. Samfala oli talem se: “Woman blong mi i stap wari blong nating nomo” no “Woman blong mi i stap giaman.”

I stret we ol woman oli harem se oli stap sef long prapa haos blong olgeta. Be long ples ya nao oli stap fraet moa se bambae oli kasem kil. Mo plante taem ol narafala man oli sore long hemia we i mekem trabol ya, i no long hemia we i kasem kil. Samfala oli no save bilif se wan man we i bigman long vilej no taon i stap kilim woman blong hem. Tingbaot samting we i hapen long woman ya Anita. Hem i talemaot long klia ples ol raf fasin we man blong hem i stap mekem long hem. Be ol man raonabaot oli tinghae long man blong hem. Anita i talem se: “Wan man we mitufala i save hem i talem long mi se: ‘?Olsem wanem yu save tok nogud olsem long saed blong man blong yu we i wan gudfala man?’ !Wan narafala man i talem long mi se mi nao mi stap mekem man blong mi i kros tumas! Biaen, ol raf fasin blong man blong mi oli kam long klia ples. Nating se i olsem, sam fren blong mi oli ronwe long mi yet, oli no moa wantem toktok long mi. Oli ting se mi mas stap kwaet mo satem maot blong mi nomo. Oli se: ‘Raf fasin, hem i fasin blong olgeta man.’ ”

Stori blong Anita i soemaot olsem wanem plante man oli faenem i had blong kasem save long trabol we ol woman oli gat taem man blong olgeta i stap kilim olgeta. Maet wan man i stap talem se hem i lavem woman blong hem. ?Be wanem samting i stap pulum man olsem blong i mekem raf fasin long woman ya? ?Olsem wanem blong halpem ol woman we man blong olgeta i stap kilim olgeta?

[Futnot]

[Bokis/Foto blong pija long pej 4]

Plante Kaen Raf Fasin Long Famle

Wan pepa we Yunaeted Nesen i raetem long saed blong Finisim Raf Fasin Agensem ol Woman, i talem se “raf fasin agensem ol woman” i save minim “enikaen raf fasin we man i mekem long woman, we i save spolem hem no mekem hem i safa long saed blong bodi, seks, no tingting. Hemia i minim tu ol tok blong mekem hem i fraet, fasin blong fosem hem mo blong no letem hem i jus, nating se man i mekem samting ya long fored blong ol narafala man no taem tufala nomo i stap.” I gat ol raf fasin “long saed blong bodi, seks, mo tingting, we oli kamaot insaed long famle mo vilej. Sam long olgeta: man i kilim woman, man i fosem ol smosmol gel blong slip wetem hem, man i kilim woman from we famle blong woman i no givim naf samting long famle blong man taem hem i pem woman, man i repem woman blong hem, mo ol kastom we oli spolem ol woman olsem kastom blong katem mo blokem seks blong ol pikinini gel.”