Halpem Ol Woman We Oli Kasem Raf Fasin

?WANEM samting we yumi save mekem blong givhan long ol woman we oli stap kasem raf fasin? Faswan samting: Yumi mas kasem save long trabol blong olgeta. Plante taem i no ol kil long bodi nomo we i mekem i nogud long ol woman ya. Klosap oltaem man i sakem ol nogud tok tu blong daonem woman mo mekem hem i fraet, nao woman i harem se hem i nogud nating mo i no naf blong mekem wan samting.

Tingtingbak long Roxana we yumi tokbaot finis. Man blong hem i sakem plante tok long hem blong spolem filing blong hem. Roxana hem wan i talem se: “Hem i daonem gud mi wetem ol nogud tok blong hem. Hem i se: ‘Yu yu no skul gud. ?Olsem wanem yu save lukaot long ol pikinini sipos mi mi no stap? Yu yu wan les mama, yu no save mekem wan samting nating. Sipos yu ronwe long mi, ol bigman oli no save letem yu yu tekem ol pikinini.’ ”

Man ya i wantem bos strong long laef blong Roxana. Ale hem i no givim mane long Roxana, hem i no letem Roxana i yusum trak blong hem, mo hem i gobak long haos plante taem long wan dei blong jekem wanem we Roxana i stap mekem. Sipos Roxana i talem samting we hem wan i laekem, man ya i kros nao. From samting ya, Roxana i no moa talemaot tingting blong hem.

Yumi luk se i gat plante saed blong raf fasin we ol man oli stap mekem long ol woman blong olgeta. Blong sapotem ol woman ya, yumi mas lesin long olgeta mo soemaot sore. Tingbaot se, i had long wan woman blong tokbaot raf fasin we hem i stap kasem. Yu mas mekem tingting blong woman ya i strong, blong hem i save gohed blong traem winim trabol ya long spid we hem i naf blong mekem.

Sam woman oli singaot polis blong givhan long olgeta. Sipos polis i kam long haos blong blokem wan man we i stap kilim woman blong hem, maet samting ya i naf blong mekem man ya i luksave se fasin blong hem i nogud. Be i tru se, afta we trabol i godaon, plante taem tingting blong man se bambae i traehad blong jenisim fasin ya, i lus bakegen.

?Woman we i stap kasem raf fasin olsem, hem i mas ronwe long man blong hem? Baebol i no leftemap fasin ya we man mo woman i seraot. Be Baebol i no talem tu se wan woman i mas stap wetem wan man we i stap spolem helt blong hem mo i putum laef blong hem long denja. Kristin aposol Pol i raetem se: “Sipos woman i lego man blong hem, bambae i mas stap olsem nomo, i no mared bakegen. No sipos no, bambae i mas kambak blong joen gud bakegen long man blong hem.” (1 Korin 7:10-16) Taswe, Baebol i no agensem woman we i seraot long man blong hem sipos ol fasin we man ya i mekem oli nogud tumas. Disisen we woman ya i tekem, hem i bisnes blong hem nomo. (Galesia 6:5) Be i no mas gat wan we i pulum woman ya blong ronwe long man blong hem. Mo tu, i no mas gat wan we i fosem hem blong stap wetem wan man we i kilim hem nogud, sipos trabol ya i putum helt mo laef blong hem long denja, no sipos i stap spolem hem long saed blong spirit.

?Ol Man Blong Kilim Woman Oli Save Jenis?

Man we i kilim woman blong hem i brekem ol rul blong Baebol stret. Efesas 4:29, 31 i talem se: “Yufala i no mas talem ol rabis tok we i save spolem man. . . . Yufala i mas lego olgeta fasin blong kros, yufala i no mas holem kros, mo yufala i no mas kros kwik. Mo taem yufala i kros, yufala i no mas sakem tok blong yufala i go antap, mo yufala i no mas tok nogud long yufala. Mo yufala i mas finis long fasin ya we yufala i stap badfren long yufala.”

Wan man we i stap talem se hem i folem Kraes be i stap kilim woman blong hem, hem i no lavem woman ya. Sipos hem i mekem nogud long woman blong hem, ol narafala gudfala wok blong hem oli blong nating nomo. Wan “man blong faet” i no naf blong kasem spesel wok long Kristin kongregesen. (1 Timoti 3:3; 1 Korin 13:1-3) Yes, Kristin kongregesen i gat raet blong sakemaot wan Kristin we i stap faerap long kros oltaem be i no tanem tingting blong hem from.—Galesia 5:19-21; 2 Jon 9, 10.

?Ol raf man oli save jenisim fasin blong olgeta? Yes, samfala oli mekem finis. Be, klosap oltaem, bifo we wan man olsem i save jenisim fasin blong hem, hem i mas (1) luksave se fasin blong hem i no stret, (2) wantem blong jenisim fasin blong hem, mo (3) lukaot help blong jenis. Ol Witnes blong Jeova oli luksave finis se Baebol i gat paoa blong pulum man blong jenisim fasin blong hem. Plante long ol man we oli intres we ol Witnes oli bin mekem Baebol stadi long olgeta, oli wokem wan strong tingting blong mekem God i glad. Ol niufala studen ya oli kasem save se Jeova God “i no laekem nating olgeta we oli laekem tumas blong mekem faet.” (Ol Sam 11:5) I tru, blong wan man olsem i jenisim fasin ya, i mas mekem moa i winim we hem i stop blong kilim woman blong hem. Hem i mas tekem wan niufala tingting long saed blong woman blong hem.

Taem wan man i kasem save blong God, hem i lanem se woman blong hem i no wan slef be hem i blong “givhan” long man, mo se woman i no daon moa long man be man i mas “ona” long woman blong hem. (Jenesis 2:18; 1 Pita 3:7) Hem i lanem tu se hem i mas gat sore mo i mas lesin long tingting blong woman blong hem. (Jenesis 21:12; Prija 4:1) Baebol stadi we ol Witnes blong Jeova oli glad blong mekem long ol man, i givhan finis long plante hasban mo waef. Long Kristin famle, i no mas gat wan man we i rul long nogud fasin, i bos strong tumas, no i mekem raf fasin.—Efesas 5:25, 28, 29.

“Tok blong God i wan samting we i laef, mo i stap wok.” (Hibrus 4:12) Taswe, waes we i stap long Baebol i save halpem ol mared man mo woman blong skelem ol trabol we oli kasem mo i save givim strong tingting long olgeta blong traem winim trabol ya. Antap long hemia, Baebol i givim wan gudfala promes we i sua blong kamtru, se bambae wol ya i jenis bigwan taem King we Jeova i putumap long heven i rul antap long ol man we oli obei long hem. Yes, long taem ya bambae i no moa gat raf fasin. Baebol i talem se: “Hem bambae i stap sevem ol puaman we oli stap singaot i go long hem, mo bambae i stap givhan long olgeta we oli sot long ol samting, mo i no gat man blong lukaot long olgeta. Olgeta we oli stap harem nogud aninit long han blong narafala man, hem bambae i tekemaot olgeta, i sevem olgeta.”—Ol Sam 72:12, 14.

[Tok makem poen blong pija long pej 12]

Long Kristin famle, i no mas gat wan man we i rul long nogud fasin, i bos strong tumas no i mekem raf fasin

[Bokis blong pija long pej 8]

Stretem Ol Rong Tingting

• Ol woman nao oli mekem man blong olgeta i kros, taswe hem i kilim olgeta.

Plante man we oli stap kilim woman blong olgeta oli no ting se oli gat fol, oli talem se woman blong olgeta nao i mekem olgeta oli kros. Maet sam fren blong famle tu oli agri se woman i stronghed, taswe man i stap kilim hem. Be tingting ya i putum fol long hemia we i kasem kil, mo i mekem eskius blong hemia we i givim kil. Samting we i tru se, plante woman we man blong olgeta i stap kilim olgeta, oli rili traehad blong mekem man blong olgeta i glad. Mo tu, i no gat wan eskius we man i save talem we i mekem se i oraet blong hem i kilim woman blong hem. Buk ya The Batterer—A Psychological Profile i talem se: “Sam man we oli stap kilim woman blong olgeta, kot i sanem olgeta blong oli go luk wan dokta long saed blong tingting. Ol man olsem, raf fasin i stap holemtaet olgeta. Oli yusum raf fasin olsem wan rod blong lego kros mo blong leftemap tingting blong olgeta we i foldaon, mo oli yusum fasin ya olsem rod blong stap bos long narafala mo stretem ol rao mo daonem wari. . . . Plante long olgeta, oli no wantem luksave se oli gat wan problem, mo oli no ting se oli stap mekem wan nogud samting.”

• Dring i save pulum man blong kilim woman blong hem.

I tru, sam man oli raf moa taem oli dring. ?Be i stret blong talem se dring nao i stamba blong trabol ya? K. J. Wilson i raetem long buk ya, When Violence Begins at Home se: “Sipos man i dring, nao i kilim woman blong hem, hem i save putum fol i go long dring, i no long hem wan.” Buk ya i talem tu se: “I luk olsem se long ples blong yumi, sipos wan man we i drong i kilim woman blong hem, yumi mekem eskius se man ya i kilim hem from we hem i drong. Maet wan woman i tingbaot man blong hem olsem wan man blong dring no wan alkolik, i winim we hem i tingbaot hem olsem wan man blong kilim man.” Misis Wilson i soemaot se tingting ya i rong, i save pulum woman blong ting se “sipos man blong hem i no moa dring, bambae i no moa kilim hem.” Be samting ya i no tru.

Naoia, ol man blong stadi long bisnes ya oli talem se fasin blong drong mo fasin blong kilim woman, tufala i tu defren problem. ?From wanem oli talem olsem? From we, bighaf blong ol man we oli drong oli no kilim woman blong olgeta. Samfala we oli raetem buk ya When Men Batter Women, oli talem se: “Man we i kilim woman blong hem i stap gohed blong mekem samting ya from we hem i luk se long rod ya hem i save stap bos long woman blong hem, mekem hem i fraet, mo mekem hem i stap daon aninit long hem. . . . Sam man we oli stap kilim woman blong olgeta oli gat fasin ya blong tekem ol strong dring mo ol drag. Be i rong blong ting se strong dring mo ol drag nao oli pusum hem blong kilim woman blong hem.”

• Ol man we oli kilim woman blong olgeta oli mekem raf fasin long evriwan.

Plante man we oli kilim woman blong olgeta oli kaen gud long ol fren blong olgeta. Oli gat tu fes. Taswe, maet ol fren blong famle oli no bilif long ol stori we oli harem se man i stap kilim woman blong hem. Samting we i tru se, man we i stap kilim woman blong hem i yusum raf fasin ya olsem rod blong bos long woman blong hem.

• Ol woman oli no wari sipos man i kilim olgeta.

Ating samfala oli gat tingting ya from we oli no kasem save long filing blong wan woman we i no save faenem rod blong kamaot long trabol ya. Maet woman ya i go stap wetem sam fren blong hem blong wan no tu wik. ?Be biaen, bambae hem i mekem wanem? long had blong faenem wan wok, rentem wan haos mo lukaot long ol pikinini tu. Mo sipos hem i ronwe long man blong hem, maet loa blong kantri i no letem hem i karem ol pikinini blong hem. Sam woman oli bin traem blong ronwe, be man blong olgeta i faenem olgeta bakegen mo i karem olgeta oli kambak long haos. Samtaem oli fosem woman blong kambak, samtaem oli switim hem. Ol fren we oli no kasem save long samting ya, oli ting se woman i no harem nogud long raf fasin we man i mekem long hem. Be tingting ya i rong.