Fulap Man Oli Givhan Mo Soem Sore
OL MAN we oli glad blong givhan, oli kam long plante ples long Amerika mo long sam narafala kantri tu. Wan long olgeta ya, hemia Tom (pija blong hem antap), we i gat 29 yia blong hem. Hem i wan man blong kilim faea, we i kam long Ottawa, Kanada. Hem i talem long Wekap! se: “Mi luk long televisin ol samting we i hapen, mo mi wantem givhan long olgeta long New York we oli mekem semfala wok olsem mi. Ale, mi draevem trak blong mi i godaon long Fraede. Long Sarede, mi go luk olgeta long Graon Sero, hemia ples we disasta i hapen. Mi talemaot long olgeta se mi wantem givhan. Oli givim wok long mi blong karemaot ol doti. Mi wetem plante narafala, mifala i yusum ol baket nomo.
“Sloslou, mifala i savelem ol doti ya, mifala i stap lukaotem eni samting we i save givhan long mifala blong faenem ol man blong kilim faea we oli lus. Mi faenem wan tul we oli kolem Haligan, we mifala i stap yusum blong openem ol doa we oli fas, mo mi faenem sam smol haf blong paep blong sutum wota. Wok ya i slou. Samwe long 50 blong mifala i wok, mo mifala i tekem tu aoa blong fulumap ol doti long wan kameong.
“Long Mande, Septemba 17, mifala i faenem dedbodi blong sam man blong kilim faea. Long Tusde we i bin pas, olgeta ya oli hareap blong go insaed long stori haos ya. Bambae mi neva fogetem samting we i kamaot taem mifala i faenem olgeta. Olgeta man blong wok oli stop, oli tekemaot hat blong olgeta, mo oli stanap i stap nomo. Hemia blong soem respek long ol fren blong olgeta we oli ded.
“Taem mi stap long Graon Sero mo mi stap lukluk ol samting raonabaot, wan tingting i kasem mi, se laef blong yumi i save lus enitaem nomo. Mi tingting dip long laef blong mi, wok blong mi, mo famle blong mi. I tru se wok blong mi i denja, be mi mi harem gud tumas taem mi save givhan long narafala mo sevem laef blong samfala tu.”
Ol Witnes Oli Givim Help
Long faswan mo seken dei blong bigfala trabol ya, samwe 70 man oli ron i go long hedkwota blong ol Witnes blong Jeova blong faenem sefples. Samfala we oli lusum olting blong olgeta mo oli no moa gat rum long hotel, oli slip long hedkwota. Oli kasem klos mo kakae long ples ya tu. Samting we i moa impoten, oli kasem ol tok blong leftemap tingting mo blong mekem olgeta oli harem gud. Ol elda we oli bigman long ol Kristin fasin, olgeta nao oli mekem wok ya.
Mo tu, ol Witnes blong Jeova oli sanem long Graon Sero, ol tul mo ol samting we ol grup blong lukaotem mo sevem ol man oli nidim. Mo tu, ol trak oli stap blong karem ol man blong kilim faea oli go long ples we oli mas wok long hem. Ricardo (raetsaed, antap) i wan Witnes we i gat 39 yia blong hem, mo i mekem wok blong draevem ol trak blong karem doti. Hem wetem plante handred narafala, oli wok evri dei blong karemaot plante tan blong doti. Hem i talem long Wekap! se: “Ol samting we mifala i luk i mekem tingting blong mifala i trabol tumas. Ol man blong kilim faea oli harem nogud moa, taem oli stap lukaotem ol fren blong olgeta we oli lus finis. Mi luk we oli pulumaot wan man blong kilim faea we i laef i stap yet. Wan narafala fren blong olgeta, wan dedbodi i foldaon long hem i kilim hem i ded. Long taem ya, plante man blong kilim faea oli krae. Mi tu mi no moa save holemtaet mi, mi krae. Long dei ya, i no gat wan narafala grup blong man we oli soemaot strong tingting mo fasin no fraet, i winim olgeta ya.”
‘Samting We Yumi No Tingbaot i Save Kamaot Enitaem’
Plante taosen man oli ded long bigfala trabol ya. Long olgeta ya, i gat 14 Witnes we oli stap long tufala taoa ya no klosap long tufala, taem oli bosta. Joyce Cummings we i gat 65 yia mo i blong Trinidad, i go blong luk dokta blong tut we i stap klosap long Wol Tred Senta. Sore tumas, hem i go long sem taem we disasta ya i kamaot. Hem i no save pulum win from we smok i fulap tumas. Oli karem hem i go long hospital, be ol dokta oli no save sevem laef blong hem. Plante moa man oli safa olsem hem. Yes, “samting we yumi no tingbaot, i save kamaot long yumi enitaem nomo.” (Prija 9:11, NW ) !Ol man oli savegud woman ya se hem i wan strong woman blong prij!
Calvin Dawson (lukluk bokis) i wok long wan ofis we i pem mo salem ol samting. Ofis ya i stap long namba 84 stori blong taoa blong saot. Hem i stap long ofis blong hem, mo taem plen i sperem taoa blong not, hem i luk ol samting ya i klia nomo. Bos blong hem we i no stap long taem ya, i toktok i kam long telefon blong faenemaot wanem i hapen. Bos ya i talem se: “Calvin i stap traem blong talem long mi wanem we hem i lukluk. Hem i se: ‘!Ol man oli stap jamaot long ol windo!’ Mi talem long hem blong kamaot kwiktaem mo blong talem long ol narafala long ofis blong oli kamaot tu.” Be Calvin i no gat taem blong kamaot long taoa ya bifo we i bosta. Bos blong hem i gohed, i se: “Calvin i wan gudfala man, mifala evriwan i laekem hem, nating se sam long mifala i no bilif long Baebol. Mifala i respektem hem from we hem i ona gud long God mo from gudfala fasin blong hem blong sore long ol narafala.”
Wan narafala Witnes we i ded, hemia James Amato (raetsaed daon long narafala pej). Hem i gat fo pikinini, mo hem i wan kapten long New York faea dipatmen. Olgeta we oli save man ya, oli talem se hem i no save fraet long wan samting. “Hem i save go insaed long wan haos we faea i laet gud long hem, nating se ol narafala man oli stap ronwe.” James i no moa stap, be oli givim haenem long hem olsem jif blong faea dipatmen.
Wan narafala Witnes we i man blong kilim faea blong seven yia finis, hemia George DiPasquale. Hem i mared long Melissa, mo smol gel blong tufala, Georgia Rose, i gat tu yia blong hem. George i wan Kristin elda long kongregesen blong ol Witnes blong Jeova long Staten Aelan. Hem i stap long namba ten stori blong taoa blong saot taem taoa ya i foldaon. Hem tu i lusum laef blong hem blong traem sevem ol narafala.
Hemia tu nomo blong plante handred man blong kilim faea, polis, mo wokman we oli lusum laef blong olgeta taem oli traem blong sevem ol narafala. Tru ya, i no gat ol tok we i naf blong presem ol man ya we oli holem strong tingting, mo we oli no fraet long taem blong bigfala trabol ya. Mea blong New York, nem blong hem Rudolph Giuliani, i talem long wan grup blong man blong kilim faea we oli givim haenem long olgeta, i se: “Fasin blong yufala blong glad nomo blong gohed blong wok long taem we i had tumas, i mekem tingting blong mifala evriwan i strong. . . . I no gat wan . . . eksampol blong strong tingting mo fasin no fraet, we i winim hemia blong Faea Dipatmen blong New York.”
Wan Wok Blong Leftemap Tingting
Long ol dei afta long trabol ya, samwe 900,000 Witnes blong Jeova long Amerika oli mekem wan bigfala wok blong leftemap tingting blong olgeta we oli harem nogud. Lav we oli gat long ol man raonabaot long olgeta i pulum olgeta blong leftemap tingting blong olgeta we oli stap krae. (Matiu 22:39) Mo tu, taem oli prij, oli traem pulum tingting blong ol man i go long nambawan samting we bambae i mekem olgeta man oli harem gud long fiuja.—2 Pita 3:13.
Taem ol Witnes oli go storian wetem ol man, oli toktok wetem sore. Oli wantem yusum tok blong Baebol blong mekem narafala i haremgud. Oli traem blong folem fasin blong Kraes we i givim spel long tingting blong ol man. Kraes i talem se: “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud. Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala. Yufala i mas mekem olsem, from we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.”—Matiu 11:28-30.
Wan grup blong ol elda blong ol Witnes blong Jeova oli kasem raet blong go long Graon Sero blong storian mo leftemap tingting blong ol wokman. Ol man we oli harem tok blong olgeta, oli glad tumas. Ol Witnes ya oli talem se: “Wota i ron long ae blong ol man ya taem mifala i ridim ol vas long olgeta.” Sam wokman oli stap spel smol long wan bot we i saed long wof. “Tingting blong ol man ya i foldaon olgeta, oli benem hed blong olgeta, oli no save winim filing we oli gat from ol samting we oli bin luk. Mifala i sidaon wetem olgeta mo ridim sam vas blong Baebol. Oli talem tangkiu tumas long mifala, oli talem se oli rili nidim toktok ya blong leftemap tingting.”
Plante man we mifala i toktok long olgeta afta long trabol ya, oli wantem wan samting blong ridim. Mifala i givimaot plante taosen smol buk, i fri nomo. Sam long ol buk ya i gat Taem Wan We Yu Laekem Hem Tumas i Ded, ‘Will There Ever Be a World Without War?,’ mo ?God i Rili Kea Long Yumi? Mo tu, i gat tufala Wekap! we mifala i givimaot plante long olgeta, hemia: “The New Look of Terrorism” (“Ol Niufala Fasin Blong Ol Teroris”) (Mei 22, 2001, Franis mo Inglis) mo “Coping With Post-traumatic Stress” (“Winim Wari We i Kamaot Afta Long Wan Bigfala Trabol”) (Ogis 22, 2001, Franis mo Inglis). Plante taem, ol Witnes oli tokbaot nambawan plan blong God blong mekem ol dedman oli laef bakegen. (Jon 5:28, 29; Ol Wok 24:15) Ating oli storian long plante milian man, wetem toktok ya we i leftemap tingting.
Trabol Ya i Mas Mekem Yumi Tingting
Ol disasta olsem hemia long New York i mas mekem yumi tingting long samting we yumi stap mekem long laef blong yumi. ?Yumi stap laef blong mekem ol samting we yumi nomo i wantem, no yumi stap traehad blong mekem ol narafala oli glad? Profet Maeka i askem se: ‘?Jeova i askem wanem long yu? Yu mas wokem stret fasin, yu mas laekem kaen fasin, mo yu mas wokbaot wetem God we tingting blong yu i stap daon. Hemia nomo hem i wantem.’ (Maeka 6:8, NW ) Tingting daon i mas pusum yumi blong lukluk i go long Tok blong God blong faenemaot gudfala fiuja blong ol dedman, mo wanem samting we God bambae i mekem i no longtaem, blong bambae Paradaes i kambak long wol ya. Sipos yu wantem save moa long saed blong ol promes blong Baebol, plis go toktok wetem ol Witnes blong Jeova long ples blong yu.—Aesea 65:17, 21-25; Revelesen 21:1-4.
[Bokis/Foto blong pija long pej 11]
(Lukluk niuspepa)
PREA BLONG TATIANA
Lena i woman blong Calvin Dawson we i lus. Hem i storian long man blong Wekap! long saed blong smol gel blong hem we i gat seven yia. Sam dei afta we smol gel ya i kasem save se papa blong hem bambae i no moa kambak long haos, Lena i mekem wan prea. Taem hem i finis, Tatiana i askem se: “?Mama, mi mi save mekem wan prea?” Mama i talem yes. Ale Tatiana i prea se: “Jeova, Papa blong mifala long heven, mifala i wantem talem tangkiu long yu from laef we mifala i gat tede mo from kakae ya. Mo mifala i wantem askem long yu blong yu givim tabu spirit long mi mo Mama blong mitufala i save stanap strong. Mo mifala i wantem askem long yu blong yu givim tabu spirit long Papa, blong hem i save strong taem bambae hem i kambak, mo blong hem i kambak we i naes, i gat paoa, i glad, mo i helti. Bambae mifala i luk hem bakegen. Long nem blong Jisas . . . mo, plis yu no fogetem blong mekem tingting blong Mama i strong. Amen.”
Lena i no sua sipos Tatiana i kasem save gud se papa blong hem i ded. Ale hem i talem se: “Tiana, prea ya i nambawan. ?Be, swithat, yu yu kasem save se Papa bambae i no moa kambak long yumitu?” Wantaem nomo, fes blong Tatiana i jenis, olsem we hem i sek. Hem i askem se: “?Bambae hem i no moa kambak?” Mama blong hem i talem se: “Yes. Mi ting se mi talem samting ya long yu finis. Mi ting se yu yu kasem save finis se Papa bambae i no moa kambak.” Tatiana i talem se: “!Be oltaem yu stap talem long mi se bambae hem i kambak long niufala wol!” Nao Lena i kasem save long mining blong toktok blong smol gel blong hem. Ale hem i se: “Sore Tatiana. Mi no bin kasem save long toktok blong yu. Mi mi ting se yu stap talem we Papa bambae i kambak tumora.” Biaen Lena i talem se: “Mi harem gud blong save se niufala wol i wan trufala samting long tingting blong hem.”