Ol Man Blong Ridim Wekap! Oli Talem

Strong Tingting Long Taem Blong Disasta Tangkiu long stori ya “Strong Tingting Long Taem Blong Disasta—Dei We Tufala Taoa i Foldaon.” (Eprel-Jun, 2002) Stori ya i tajem hat blong mi bigwan, mo i mekem mi mi luksave se samting we yumi no tingbaot i save kamaot enitaem nomo. Mi harem nogud taem mi tingbaot hamas man oli lus.

S.B.R., Denmak

Tangkiu blong raetem “Prea Blong Tatiana.” Wota i stap ron long ae blong mi finis from stori ya we mi stap ridim, be taem mi ridim prea ya, mi mi krae bigwan. Mi mi prea se ol pikinini we oli lusum papa no mama blong olgeta long ol trabol ya we ol teroris oli mekem, bambae oli gru gud long saed blong spirit, olsem nao, bambae oli mitim papa no mama blong olgeta bakegen long niufala wol. Mo tu, stori ya i givhan long mi blong gat moa tangkiu from nambawan tingting we mi wetem ol narafala Witnes blong Jeova, mifala i gat long saed blong fiuja.

T. A., Japan

Mi mi stap long Jemani, be ol samting we i hapen long Septemba 11 i mekem mi mo famle blong mi i harem nogud tumas. Tri manis biaen, smol gel blong mi we i gat 9 yia blong hem, i stap dro ol pija yet blong wan plen we i stap sperem wan stori haos. Mifala i stap tingbaot wan dei long fiuja we ol nogud samting olsem bambae oli finis blong olwe.

E. G., Jemani

Taem mi harem nius long samting we i hapen long New York, mi prea long Jeova blong askem long hem blong givim paoa long olgeta we oli no ded taem stori haos ya i foldaon, mo blong givim strong tingting long saed blong wan gudfala fiuja long ol famle we oli bin lusum wan long olgeta long disasta ya. Taem mi ridim stori ya, mi luksave se God i harem prea blong mi wetem prea blong plante narafala tu. Mi luksave tu se ded i save kasem yumi enitaem, mo samting ya i pulum mi blong luklukgud long laef blong mi.

M. V., Itali

Mitufala i glad blong ridim ol tingting blong ol man we oli luk samting ya we i hapen. Ol tok blong ol man we oli laef tru long disasta ya, i mekem wota blong ae blong mitufala i ron. Mitufala i askem long Jeova blong givhan long olgeta we oli stap safa from trabol ya, mo mitufala i prea se Wekap! ya bambae i mekem olgeta oli haremgud bakegen. Mitufala i yangfala, taswe ol kwestin we oli pulum mitufala blong tingting gud long samting we mitufala i stap mekem long laef blong mitufala mo long ol samting we oli impoten moa long mitufala, oli leftemap tingting blong mitufala. Mitufala i hop se yufala i neva stop blong raetem Wekap!

T. M. mo A. P., Slovenia

Mi mi gat 14 yia, mo mi stap long namba tri yia long haeskul. Taem mi ridim stori ya, mi kasem save long bigfala fraet we ol man oli harem. Mi luk olsem wanem samfala oli lego laef blong olgeta blong sevem narafala. Mi bin harem nius long radio se plante man blong kilim faea oli ded, be taem mi ridim stori ya, nius ya i jes kasem hat blong mi. Mi krae taem mi ridim “Prea Blong Tatiana.” Long faswan yia long haeskul, papa blong mi tu i ded from wan sik. Prea ya i mekem mi mi tingbaot se, ‘?Mi mi olsem Tatiana, we niufala wol i rili wan trufala samting long tingting blong hem?’ Mi wantem givim Wekap! ya long ol tija blong mi long skul mo long plante fren blong mi. !Plis gohed blong raetem nambawan buk ya!

H. T., Japan

Niufala Plan Mi stat ridim Wekap! long 1978, mo i gud tumas blong luk olsem wanem buk ya i kam naes moa long ol yia we i pas. Taem mi stap tanem ol pej blong Wekap! blong Jenuware 8, 2002, mi luk ol samting we i rili pulum tingting blong mi. Nem blong ol stori i kliagud, mo ol pija oli nambawan. Plan blong buk ya i mekem se mi mi haremgud blong ridim. Mi sua se niufala plan ya bambae i pulum plante moa man we hat blong olgeta i stret, blong oli kam long Jeova.

V.P.L., Brasil