Ol Yangfala Oli Askem . . .

?Olsem Wanem Sipos Mi Mitim Wan We i Stap Long Klas Blong Mi?

“Evri Mande, i hadwok long mi blong go long skul. Sipos sam fren blong mi oli talem se oli bin luk mi long wiken, mi mekemap ol giaman stori blong talem long olgeta. Maet mi talem se mi stap goraon blong askem ol man blong givim mane from wan pati blong politik.”—James, Inglan.

“Long skul, ol yangfala we oli bin luk mi oli jikim mi. Hem i wan bigfala traem.”—Débora, Brasil.

?FROM wanem ol yangfala ya oli fraet se ol fren blong olgeta oli bin luk olgeta? ?Oli stap mekem wan kaen wok we i agensem loa? Nogat. Oli stap joen long wok we i moa impoten i bitim ol narafala wok long wol. Oli stap mekem wok we Jisas i talem se yumi mas mekem: “Yufala i mas go long ol man long olgeta ples long wol, blong pulum olgeta oli kam man blong mi. . . . Mo yufala i mas tijim olgeta blong oli folem olgeta tok ya we mi mi givim finis long yufala.”—Matiu 28:19, 20.

Folem wan stadi we Gallup i mekem long Amerika, klosap olgeta yangfala (90 pesen) oli bilif long God. Klosap stret haf blong olgeta oli go long jos evri wik. Plante oli joen long wok blong jos, olsem singsing long kwaea. Be smol nomo oli tokbaot God long ol fren blong olgeta long skul. Be, long saed blong ol Witnes blong Jeova, ol man long olgeta ples blong wol oli save se oli stap prij long evri haos. Plante taosen yangfala Witnes oli joen long wok ya.

Sipos yu yu wan yangfala Witnes, i sua se yu tu yu stap joen long wok ya blong prij. Be maet i no isi long yu. Maet yu yu olsem ol yangfala we yumi tokbaot finis, we oli wari se bambae oli mitim wan fren we i stap long klas blong olgeta. Wan yangfala long Inglan, nem blong hem Jennie, i talem se: “Samting we i moa nogud, hemia taem wan fren blong mi long skul i luk we mi jenisgud, mi putum wan sket, mo mi karem basket we i fulap long ol buk. Hemia i defren olgeta long lukluk blong mi taem mi stap long skul.”

Sam yangfala Kristin oli fraet tumas se bambae oli mitim wan fren blong klas blong olgeta, ale oli traem haed. Yangfala Leon i talem se: “Mi mi save wan yangfala Witnes we hem i go prij wetem wan jaket we i gat hat i joen long hem. Nao sipos hem i mitim wan fren blong hem, hem i pulum hat ya i kamdaon blong i kavremap fes blong hem.” Sam narafala yangfala oli no wantem prij long sam eria. Yangfala Simon i talem se: “Mi tingbaot we mi bin prea se bambae mifala i no prij long wan rod from we mi save se plante yangfala long klas blong mi oli stap long rod ya.”

I stret blong fraet smol taem yu mitim wan we yu save hem long wok blong prij. Be, sipos yu letem fraet ya i winim yu bambae samting ya i spolem yu. Alicia i wan yangfala long Jemani mo hem i talem se: “Tingting blong mi i nogud long saed blong wok blong prij. Mo samting ya i mekem i nogud long mi long saed blong spirit.”

?Be from wanem yu yu mas prij, antap moa, sipos yu faenem se wok ya i had long yu? Blong ansa long kwestin ya, bambae yumi tingbaot from wanem God i talem long yumi blong prij. Biaen, bambae yumi luk olsem wanem yu save winim fraet blong yu, sipos yu traehad mo yu gat strong tingting.

Yumi Mas Prij

Fastaem, i gud blong tingbaot se i no wan niufala samting mo i no narakaen blong serem bilif blong yumi wetem ol narafala. Stat long taem bifo olgeta, ol man mo woman we oli onagud long God, oli mekem samting ya. Fulap man oli save stori blong Noa we hem i wokem wan bigfala sip. (Jenesis 6:14-16) Be 2 Pita 2:5 i talem se Noa i “wan prija we i stap talemaot stret fasin” tu. Hem i harem se hem i mas givim woning long ol narafala long saed blong bigfala trabol we bambae i spolem wol.—Matiu 24:37-39.

Biaen, plante man Isrel oli serem bilif blong olgeta wetem ol man blong ol narafala laen, nating se oli no kasem oda blong prij long ol man ya. From samting ya, woman ya Rut we hem i no woman Isrel i kasem save long Jeova. Rut i talem tangkiu long mama blong man blong hem, hemia Nomi, we hem i woman Isrel. Hem i talem long Nomi se: “Ol man ples blong yu bambae oli man ples blong mi, mo God blong yu bambae i God blong mi.” (Rut 1:16) Biaen, King Solomon i tokbaot se plante man we oli no man Isrel bambae oli harem nius long saed blong “bigfala nem” blong Jeova, mo bambae oli kam wosip long haos blong Hem.—1 King 8:41, 42, NW.

?Nao sipos ol man ya blong God long taem bifo, oli bin serem bilif blong olgeta wetem ol narafala nating se oli no kasem oda blong mekem olsem, olsem wanem long yumi? ?Yu no ting se ol Kristin oli mas harem se samting ya i moa impoten blong mekem tede? Yes, yumi kasem oda ya finis blong talemaot “gud nius ya, se God i King blong olgeta man.” (Matiu 24:14) Yumi mas sem mak long aposol Pol, we hem i harem se hem i mas talemaot gud nius. (1 Korin 9:16) Laef blong yumi i dipen long samting ya. Rom 10:9, 10 i talem se: “Sipos yu talemaot we Jisas i . . . Masta blong yu, . . . God bambae i sevem yu. Taem yumi bilif long hem long hat blong yumi, God i mekem yumi kam stret man long fes blong hem, mo taem yumi talemaot tok ya, God i sevem yumi.”

?Weples yu yu save “talemaot tok ya”? Yu save tekem evri janis blong talemaot long eni man. Be fasin ya blong prij long olgeta haos wanwan i stap yet olsem beswan rod blong kasem ol man. (Ol Wok 5:42; 20:20) ?Yu ting se yu no nid blong joen long wok ya from we yu yu yangfala? Si yu mas. Long Sam 148:12, 13, Baebol i givim oda se: “Yufala ol gel wetem ol boe, yufala ol ololfala wetem ol pikinini tu, yufala i mas presem hem. Yumi evriwan i mas presem nem blong Hae God.”

Traem Ya Blong Prij Long Ol Fren

I tru, ating yu save sem mo fraet lelebet taem yu stap prij nao yu mitim wan yangfala we i stap long klas blong yu. Mo i stret nomo we yu wantem se ol narafala oli laekem yu. I no gat wan long yumi we i laekem taem narafala i jikim yumi, i laf long yumi, no i swea long yumi. Yangfala Tanya i talem se: “!Maot blong ol yangfala long skul i nogud tumas!” Taswe, i tru se bambae yu fraet long samting we ol yangfala long skul blong yu oli save mekem taem oli luk se yu jenisgud mo yu wokbaot wetem wan Baebol long han blong yu. Sore tumas, be ating bambae oli jikim yu. Felipe we hem i wan yangfala blong Brasil i talem se: “I gat wan boe long klas blong mi we i stap long sem stori haos olsem mi. Oltaem hem i jikim mi se: ‘!Saye, yu wokbaot wetem Baebol ya bakegen! ?Yu stap karem wanem samting long basket ya?’ ”

Taem oli jikim yumi olsem, hemia i no wan pleplei. Baebol i tokbaot Ismael mo brata blong hem Aesak we tufala i kamaot long sem papa Ebraham, be Ismael i gat defren mama. Ismael i jikim nogud brata blong hem. (Jenesis 21:9) Aposol Pol i tokbaot fasin ya we Ismael i mekem olsem wan bigfala rong. Long Galesia 4:29 (NW ), aposol ya i talem se fasin ya i olsem we Ismael “i stap givim kil” long Aesak.

Sem mak nao, Jisas i givim woning se samfala bambae oli agensem ol man blong hem. Hem i se: “Sipos ol man blong wol ya oli no laekem yufala oli agens long yufala, yufala i mas tingbaot we fastaem, olgeta oli no laekem mi oli agens long mi. Sipos yufala i man blong wol ya, bambae ol man blong wol ya oli save lavem yufala, from we yufala i man blong wol ya. Be yufala i no man blong wol ya, mi mi jusumaot yufala finis, mo mi tekemaot yufala long ol man blong wol ya. Taswe ol man blong wol ya oli no laekem yufala, oli agens long yufala.”—Jon 15:18, 19.

Taswe, yu we yu wan Kristin, yu mas rere blong kasem trabol samtaem. (2 Timoti 3:12) Nating sipos yu no tokbaot Baebol wetem ol fren blong yu, be maet samfala oli agensem yu yet, from we yu mekem ol gudfala fasin mo yu no joen wetem olgeta blong mekem i no stret. (1 Pita 4:4) Be, Jisas i leftemap tingting blong yumi, i se: “Yufala we ol man oli stap spolem nem blong yufala, mo oli stap mekem i nogud long yufala, mo oli stap giaman, oli stap talem ol rabis tok agens long yufala from we yufala i man blong mi, yufala i save harem gud.” (Matiu 5:11) ?Olsem wanem yu save harem gud taem oli jikim yu mo oli laf long yu? !Yu save harem gud from we yu save se yu stap mekem hat blong Jeova God i glad! (Ol Proveb 27:11) !Mo taem yu mekem God i glad, yu stap long rod blong kasem blesing ya blong laef we i no save finis!—Luk 10:25-28.

Ating i no evriwan long ol fren blong yu long skul, mo ating i no bighaf tu, we bambae oli agensem yu sipos oli luk yu long wok blong prij. Wan yangfala long Inglan, nem blong hem Angela, i talem se: “!Taem yu mitim wan yangfala blong skul long wok blong prij, plante taem hem i fraet moa i bitim yu!” Sam long olgeta, maet oli wantem save wanem tok we yu yu stap talemaot. Nating se i olsem wanem, plante yangfala Kristin oli stap kasem gudfala frut taem oli prij long ol fren blong olgeta long skul. Nekiswan stori we bambae i kamaot long Wekap! blong tokbaot bisnes ya, bambae i soemaot olsem wanem yu tu yu save karem gudfala frut long wok ya.

[Tok blong pija long pej 25]

Plante yangfala oli fraet se taem oli prij bambae oli mitim wan fren blong skul

[Tok blong pija long pej 27]

Yu neva mas sem long bilif blong yu sipos narafala i jikim yu from