Lesingud Mo Lanem Samting
WAN stori long niuspepa ya Toronto Star i talem se: “Yumi lanem bighaf (85 pesen) blong ol save we yumi gat from ol samting we yumi harem. Nating se yumi pasem plante taem blong lesin, be maet yumi no stap lesingud, from we narafala samting i pulum ae blong yumi no yumi stap tingting long narafala samting. Mo tu, yumi fogetem 75 pesen blong ol samting we yumi harem. Samting ya i soemaot se yumi nidim blong traehad moa blong lesingud.
Wan ripot i talem se: “Stamba blong plante trabol long wol, hemia se ol man oli no lesingud.” Woman ya Rebecca Shafir, we i wan dokta blong givhan long ol man blong oli toktokgud tugeta, hem i ting se fasin ya we ol man oli no lesingud i wan long ol samting we i mekem se plante man oli kilim olgeta wan i ded, i save mekem raf fasin i kamaot bitwin ol yangfala long skul, i save mekem famle i seraot, mo i save lidim man blong tekem drag.
Ol sayentis we oli stadi long bisnes ya oli talem se yumi wanwan i gat ol defdefren fasin blong lesin. Samfala oli lesingud taem narafala i storian long saed blong ol man, mo oli wantem save long ol smosmol poen long wan stori. Sam narafala oli lesingud long ol haf blong stori we oli soem aksin, be oli no wantem se man i westem taem blong storian long ol smosmol poen. Niuspepa ya Star i talem se: “Taem tu man i storian, we wan i wantem save long saed blong ol man, mo wan i stap lesingud long saed blong ol aksin, maet tufala i no save toktokgud tugeta.”
Yumi luksave from wanem Jisas i makemgud se: “Tok ya we yufala i stap harem, yufala i mas tingting gud long hem.” (Luk 8:18) Taem yumi lesingud, yumi mekem i gud long hemia we i stap toktok long yumi. Mo i impoten blong lesingud sipos yumi wantem storian gud wetem narafala. Sam advaes blong givhan long yumi blong lesingud, hemia: Tanem baksaed long eni samting we i pulum ae blong yumi, lei i go fored lelebet, lukluk stret long ae blong man we i stap storian long yumi, ansa long hem, mo saksakem hed blong yumi. From we yumi nidim blong lesingud blong lanem samting, yumi evriwan i mas traehad blong kamgud moa long fasin ya blong lesingud.