Ol Yangfala Oli Askem . . .

?Olsem Wanem Mi Save Haremgud Long Papa Mama We Tufala i Karemaot Mi?

“Mi no save wan samting long saed blong stret papa mama blong mi, mo mi harem nogud tumas from.”​—⁠Barbara we i gat 16 yia blong hem.

“Mi mi no save nating stret ples we mi bon long hem mo hu ya stret papa mama blong mi. Plante taem mi no slip long naet, mi stap tingbaot samting ya nomo.”​—⁠Matt we i gat 9 yia blong hem.

“Taem mi rao long papa mama ya we tufala i karemaot mi, mi gat tingting se sipos mi stap wetem ‘rili’ papa mama blong mi, bambae tufala i kasem save moa long mi. I nogud we mi tingting olsemia, mo mi no save talemaot tingting ya long papa mama blong mi.”​—⁠Quintana we i gat 16 yia blong hem.

TRU tumas​—⁠laef i no isi long pikinini we narafala papa mama i karemaot hem. Plante yangfala oli gat filing olsem olgeta ya antap. Maet oli ting se i gud we oli traem faenem stret papa mama blong olgeta, mo se bambae oli glad moa sipos oli stap wetem stret papa mama blong olgeta. Mo i gat plante narafala samting tu we i had long olgeta.

Long ol pej bifo, yumi tokbaot sam nogud tingting we ol yangfala ya oli save gat.a Blong glad long laef blong olgeta, oli mas jenisim ol tingting ya. ?Be wanem sam trabol we oli fesem? ?Mo oli save mekem wanem blong winim ol trabol ya?

?Tufala i “Rili” Papa Mama Blong Mi?

Yangfala Jake we i gat 13 yia blong hem, i talem se bifo, hem i tingting oltaem long stret mama blong hem. From samting ya, hem i no joengud wetem papa mama we tufala i karemaot hem. Hem i tingtingbak long taem ya i se: “Sam samtaem mi kam kros nao mi talem se: ‘!Yu yu no rili mama blong mi​—⁠yu no gat raet blong panisim mi olsemia!’ ”

Yes, Jake i mas kasem save long ansa blong wan bigfala kwestin: ?Hu i “rili” mama blong hem? Sipos wan narafala papa mama i karemaot yu finis, maet yu tu yu stap tingbaot kwestin ya. Hemia i tru moa sipos yu stap ting se maet bambae stret papa mama blong yu i mekem i moa gud long yu i bitim papa mama ya we tufala i karemaot yu. Be traem tingbaot: ?Mama we i bonem yu, hem i “rili” mama blong yu jes from we hem i bonem yu?

Mama blong Jake i no agri long tingting ya. Jake i se: “Oltaem mama blong mi i talem se: ‘Mi mi rili mama blong yu. Nating se narafala mama i bonem yu, be naoia mi mi rili mama blong yu.’ ” Taem wan papa mama i tekem wan pikinini i kam long haos blong tufala mo tufala i givim wan ples blong slip long hem mo kakae, lukaotgud long hem mo givim ol samting we hem i nidim, tufala i “rili” papa mama blong hem. (1 Timoti 5⁠:⁠8) Ating loa blong kantri blong yu i agri long samting ya tu. ?Wanem tingting blong God long saed ya?

Tingbaot wan yangfala long taem bifo we wan man i tekem hem i kam olsem boe blong hem. Hemia Jisas Kraes we yumi evriwan i save long hem. Josef we hem i wan kapenta, hem i no stret papa blong Jisas. Be Josef i tekem Jisas i kam olsem stret pikinini blong hem. (Matiu 1:​24, 25) ?Olsem wanem? ?Taem Jisas i kam bigwan, hem i mekem stronghed from we i no wantem se Josef i bos long hem? Nogat. Jisas i kasem save se God i wantem we hem i obei long papa ya we i tekem hem i kam olsem boe blong hem. Jisas i savegud loa we Jeova i givim long ol yangfala blong Isrel. ?Wanem loa ya?

Ona Long Papa Mama Blong Yu

Baebol i talem long ol yangfala se: “Oltaem bambae yufala i mas ona long papa mo mama blong yufala.” (Dutronome 5:​16) Plante taem Baebol i yusum tok ya “ona” blong minim respek, tinghae, mo tingbaot. Yu save soem ona long papa mama we tufala i karemaot yu, sipos yu yu kaen long tufala, yu respektem raet we tufala i gat blong bos long yu, yu lesin long tufala mo traem kasem save long tingting blong tufala, mo yu rere blong mekem samting we tufala i askem long yu.

?Be olsem wanem sipos tufala i strong tumas long yu? I tru, samting ya i save hapen. Olgeta papa mama oli sinman, nating se oli stret papa mama no nogat. Ol mastik mo slak fasin blong olgeta i save mekem i had blong obei long olgeta. Ale, long taem olsem, i isi blong yu stat tingting se yu no nidim blong obei long papa mama blong yu from we tufala i bin karemaot yu nomo. ?Be tingting ya i stret?

Traem tingbaot Jisas. Hem i wan man we i stretgud olgeta. (Hibrus 4:​15; 1 Pita 2:​22) Be papa ya we i karemaot hem, hem i no stretgud, mo mama ya we i bonem hem, hem tu i no stretgud. Taswe, ating sam samtaem Jisas i luksave se tufala i rong. ?Be hem i mekem stronghed taem Josef we i hed blong famle i mekem sam mastik? ?Hem i no lesin long advaes blong mama blong hem Meri, from we sam samtaem advaes ya i no stretgud? Nogat. Baebol i talem se taem Jisas i stap gruap, “oltaem hem i stap ona” long papa mama blong hem.​—⁠Luk 2:​51.

Nao tingbaot: Taem yu yu rao long papa mama we tufala i karemaot yu, maet yu ting se tufala i rong. Be yu no mas fogetem se yu tu yu sinman. From samting ya, maet yu nao yu rong. Nating se i olsem wanem, i moa gud we yu folem eksampol blong Jisas. (1 Pita 2:​21) Sipos yu mekem olsem, bambae i isi moa long yu blong obei. Be i gat wan risen blong obei long papa mama blong yu we i bigwan moa yet.

Baebol i talem se: “Ol pikinini. Oltaem yufala i mas obei long ol papa mo mama blong yufala, from we yufala i Kristin, mo fasin ya i save mekem Masta blong yumi i glad long yufala.” (Kolosi 3:​20) Yes, taem yu obei, yu mekem Papa blong yu long heven i glad. (Ol Proveb 27⁠:11) Mo hem i wantem we yu lanem blong obei, from we hem i wantem we yu tu yu glad. Afta we Baebol i talem long ol yangfala blong obei, hem i gohed se: “Sipos yufala i mekem olsem, bambae ol samting blong laef blong yufala i save ron gud, mo bambae laef blong yufala long graon ya, i longfala.”​—⁠Efesas 6:⁠3.

Fren Moa Wetem Papa Mama We Tufala i Karemaot Yu

Blong frengud wetem papa mama we tufala i karemaot yu, i no naf blong ona mo obei long tufala nomo. Ating yu yu wantem stap long wan famle we i gat lav mo filing insaed long hem. Papa mama ya nao i mas mekem se i gat ol fasin ya insaed long famle. Be yu yu save givhan bigwan. ?Olsem wanem?

Fastaem, yu save lukaot rod blong kam klosap moa long papa mama blong yu. Askem tufala blong tokbaot taem we tufala i yangfala, laef blong tufala, mo ol samting we tufala i intres long hem. Askem advaes blong tufala long sam samting we oli mekem tingting blong yu i trabol. Jusum wan taem we tufala i stap spel mo tufala i glad blong toktok wetem yu. (Ol Proveb 20⁠:⁠5) Seken samting, lukaot rod blong givhan long famle. Maet yu save mekem sam wok long haos no wan narafala wok we yu luk se i gat nid blong mekem.

?Be olsem wanem long stret papa mama blong yu? ?Sipos yu traem faenem tufala, no sipos tufala i faenem yu, samting ya bambae i spolem fasin fren we yu yu gat wetem papa mama we tufala i karemaot yu? Long ol yia we oli pas finis, ol grup we oli wok blong faenem ol gudfala papa mama blong karemaot ol pikinini, oli no givimaot save long ol stret papa mama, long saed blong pikinini we oli bin letem narafala i karemaot, mo oli no givim save long ol pikinini tu. Tede, rul ya i jenis long sam kantri, mo plante pikinini oli faenem stret papa mama blong olgeta we oli no save olgeta nating. Maet ol rul long saed blong karemaot pikinini oli defren bakegen long kantri blong yu.

Nating se i olsem wanem, i stap long yu nomo blong tekem disisen se bambae yu traem faenem stret papa mama blong yu no nogat. Maet disisen ya i no isi blong mekem. Ol yangfala we narafala papa mama i karemaot olgeta oli gat ol defdefren filing long saed ya. Samfala oli wantem tumas blong save stret papa mama blong olgeta, be samfala oli no wantem nating. Be yu mas save se plante yangfala we oli save stret papa mama blong olgeta, oli no lusum fasin fren we oli gat wetem papa mama we tufala i karemaot olgeta.

I gud blong askem advaes long papa mama we tufala i karemaot yu mo long ol fren blong yu long Kristin kongregesen we oli bigman long tingting blong olgeta. (Ol Proveb 15⁠:22) Tingtinggud long ol defdefren rod we yu save folem, mo no hareap blong mekem wan samting. Ol Proveb 14⁠:15 i talem se: “Man we i gat hed, hem i stap lukluk gud long rod we bambae i folem.”

Sipos yu tekem disisen blong lukaot stret papa mama blong yu, gohed blong soem long papa mama we tufala i karemaot yu se yu lavem mo yu respektem tufala. Olsem nao, taem yu save stret papa mama blong yu we oli lego yu longtaem finis, bambae yu holemtaet gudfala fasin fren mo lav we yu gat long papa mama we tufala i lukaotgud long yu mo tijim yu.

Fren Moa Wetem Papa Blong Yu Long Heven

Yangfala we wan narafala papa mama i karemaot hem, i save fraet oltaem se bambae niufala papa mama ya i ronwe mo livim hem i stap hem wan. Hem i save wari se maet tufala i lego hem olsem we stret papa mama blong hem i bin lego hem. Yumi kasem save long filing ya. Be i gud blong tingbaot waes tok ya: “Man we i gat lav i no save fraet. Lav we i stretgud i sakemaot fraet.” (1 Jon 4:​18, NW ) Yu no mas wari oltaem se maet yu lusum tufala we yu lavem tufala. I moa gud we yu yu traem blong lavem ol narafala tu, wetem olgeta evriwan long haos blong yu. Be i moa impoten yet blong lavem Papa blong yu long heven, Jeova God. Yu save trastem hem fulwan, hem i no save lego ol pikinini blong hem we oli holemstrong long hem. Hem i save mekem tingting blong yu i kwaet.​—⁠Filipae 4:​6, 7.

Catrina i wan pikinini we narafala papa mama i karemaot hem. Hem i talem se taem hem i ridim Baebol, samting ya i givhan bigwan long hem blong kam klosap long God mo blong glad mo karem frut long laef blong hem. Hem i tokbaot fasin ya blong fren wetem Jeova se “i impoten tumas from we Papa blong yumi long heven i save ol filing blong yumi.” Vas we Catrina i laekem moa hemia Ol Sam 27⁠:​10, we i talem se: “Papa mo mama blong mi, maet tufala i save lego mi, be yu [Jeova], oltaem nomo bambae yu stap lukaot gud long mi.”

[Futnot]

[Tok blong pija long pej 30]

Lukaot rod blong kam klosap moa long papa mama we tufala i karemaot yu