!Ol Ami We Oli Stap Maj!
“Mifala i stap long wan vilej long kantri ya Belis. Hem i wan niufala vilej we i gat plante bus klosap long hem. Wan moning, samwe long naen klok, ol ami oli maj i kam long haos blong mifala. Ol ami ya, hemia fulap fulap anis, we oli pas aninit long doa mo oli kamtru long enikaen smosmol hol we oli save faenem. Yes, oli stap lukaot ol bebet blong kakae. Mifala i no save blokem olgeta, mifala i mas aot long haos nomo blong wan no tu aoa, blong oli mekem wok blong olgeta fastaem. Taem mifala i kambak, haos i klingud, i no moa gat wan bebet nating i stap.”
SAMTING YA i stap hapen long plante ples long ol hot kantri olsem Belis, mo ol man long ol ples ya oli no kros long ol anis ya. Oli luk se ol anis ya oli klinimgud haos blong olgeta long ol bebet, olsem ol kakros mo ol narafala smosmol anamol. Biaen, i no gat wan doti nating i stap.
Ol anis we yumi stap tokbaot, ol man oli singaot olgeta se ol ami anis. Hemia from we laef mo wok blong olgeta i olsem ol ami.a Maet i gat plante handred taosen blong olgeta long wan grup, we oli no gat haos blong olgeta, be oli stap wokbaot olbaot long ol defdefren ples. Blong oli save spel smoltaem long wan ples, oli joejoenem ol leg blong olgeta raon long kwin blong olgeta mo ol pikinini blong hem, blong oli blokem olgeta. Mo tu, oli sanemaot sam grup blong anis blong oli lukaot kakae, maet oli lukaot ol bebet mo ol smosmol anamol olsem lised. Olgeta ya oli mekem laen blong wokbaot. Ol lida blong olgeta oli folem wan spesel fasin blong ami blong raonem ol bebet blong kasem olgeta. Oli mekem samting ya taem oli no harem smel blong wan bebet, ale oli no save wanem rod we oli mas folem. Ol wokman anis we oli go fastaem, oli stop, oli no moa maj. Be ol anis long en blong laen oli gohed nomo blong maj, mekem se laen i solap long medel, nao oli mas spred i goaot long tufala saed. Long fasin ya, laen i seraot i go long tu rod blong raonem ol bebet. Hemia sem fasin we ol ami oli folem taem oli wantem kasem enemi blong olgeta.
Ol ami anis ya oli stap folem wan program blong 36 dei. Oli maj blong 16 dei, nao biaen oli stap kwaet blong 20 dei blong kwin i lego ol eg blong hem. Afta, oli hanggri bakegen ale oli go maj bakegen. Sam laen blong olgeta oli bigwan olsem 10 meta. Long saedsaed blong laen ya, i gat ol spaeda, skopion, bebet, frog, mo lised, we oli stap traehad blong ronwe long ol anis. Ol pijin tu oli biaen long olgeta. Oli no wantem ol anis, be oli wantem kasem ol smosmol anamol we oli stap ronwe.
Baebol i talem long Ol Proveb 30:24, 25 se God i mekem ol anis oli “waes we i waes.” Tru ya, yumi sapraes long nambawan fasin blong God blong wokem ol anis.
[Futnot]
a Stori ya i stap tokbaot anis ya Eciton long Sentrol mo Saot Amerika.
[Tok blong pija long pej 31]
Ami anis
[Credit Line]
© Frederick D. Atwood
[Tok blong pija long pej 31]
Oli joejoenem ol leg blong olgeta blong mekem wan brij
[Credit Line]
© Tim Brown/www.infiniteworld.org